ພິທີ​ຖະແຫຼງ​ຂ່າວ​ກ່ຽວ​ກັບໂຄງການ​ຄຸ້ມ​ຄອງ ​ການ​ນຳ​ໃຊ້​ໃບເກັບ​ເງິນ​ອາກອນ​ແບບ​ມີ​ລາງວັນ ພາຍ​ໃນ​ນະຄອນຫຼວງ​ວຽງ​ຈັນ ໄດ້​ມີ​ຂຶ້ນ​ໃນ​ວັນ​ທີ 20 ມັງກອນ 2015 ທີ່​ໂຮງແຮມ​ດອນ​ຈັນ​ພາເລດ ນະຄອນຫຼວງ ໂດຍ​ທ່ານ ບຸນ​ທົງ ໝັ້ນ​ອາ​ນົງ ຫົວໜ້າ​ພະແນກ​ສ່ວຍ​ສາ​ອາກອນ ນະຄອນຫຼວງ ພ້ອມ​ນີ້ ມີ​ທ່ານ​ຮອງ​ພະແນກ ຕາງໜ້າ​ກຸ່ມ​ບໍລິສັດ ພະນັກ​ງານ​ວິຊາ​ການ​ກ່ຽວຂ້ອງ ແລະ ສື່​ມວນ​ຊົນ​ເຂົ້າ​ຮ່ວມ.

ທ່ານ​ຫົວໜ້າ​ພະ​ແນກ​ສ່ວຍສາ​ອາກອນ ນະຄອນຫຼວງ ໄດ້ກ່າວ​ວ່າ: ໂຄງການ​ຄຸ້ມ​ຄອງ​ການນຳ​ໃຊ້​ໃບ​ເກັບ​ເງິນ​ອາກອນ​ແບບມີ​ລາງວັນ​ນີ້ ເຊິ່ງ​ເປັນ​ໂຄງການໜຶ່ງ​ທີ່​ຄາດ​ວ່າ​ຈະ​ສ້າງ​ຄວາມ​ປະທັບ​ໃຈ ​ໃຫ້​ກຸ່ມ​ປະຊາຊົນ​ຈຳນວນບໍ່​ໜ້ອຍ ເຊິ່ງ​ມັນ​ຈະ​ຊ່ວຍ​ປົກ​ປັກຮັກສາ​ສິດທິ ແລະ ຜົນ​ປະໂຫຍດຂອງ​ຜູ້​ເສຍ​ອາກອນ ແລະ ຜູ້​ບໍ​ລິໂພກ ໂຄງການ​ດັ່ງກ່າວ​ບໍ່​ພຽງ ແຕ່​ຈະ​ສ້າງ​ສິ່ງ​ຈູງ​ໃຈໃຫ້​ລາງວັນ​ແກ່​ຜູ້​ບໍລິໂພກ ຫຼື ຜູ້​ຊື້​ເທົ່າ​ນັ້ນ ຍັງ​ເປັນ​ການ​ເກັບ​ກຳ​ຂໍ້​ມູນ​ທາງດ້ານ​ບັນຊີຊື້-ຂາຍໃຫ້​ແກ່​ຜູ້​ປະກອບ​ການ ພ້ອມ​ທັງ​ສາມາດ​ຄິດໄລ່​ຈຳນວນ​ອາກອນ ​ທີ່​ຈະ​ມອບ​ໃນ​ແຕ່​ລະ​ເດືອນ​ຂອງ​ຕົນ​ເອງ ດ້ວຍຄວາມ​ແນ່ນອນ ປອດ​ໃສ ເປັນ​ທຳ ປາສະຈາກ​ການ​ຕໍ່​ລອງ.

ການຈັດຕັ້ງ​ປະຕິບັດ​ໂຄງການດັ່ງກ່າວ​ ຈະ​ໄດ້​ຂະຫຍາຍ​ການນຳ​ໃຊ້​ໄປ​ສູ່​ຂົງເຂດ​ລັດ ທີ່​ສະໜອງ​ການ​ບໍລິການ​ຕໍ່​ປະຊາຊົນທຸກ​ຊັ້ນ​ຄົນ ລ້ວນ​ແຕ່​ໄດ້​ລຸ້ນ​ໂຊກຮັບ​ລາງວັນ​ເຊັ່ນ​ດຽວ​ກັນ ໂດຍສະເພາະແມ່ນ ​ການ​ນຳ​ໃຊ້​ເພື່ອເກັບ​ພາສີ​ທີ່​ດິນ ເກັບ​ທຳນຽມຄ່າ ບໍລິການ ແລະ ລາຍ​ຮັບ​ວິຊາການ​ອື່ນໆ.

ສຳລັບ​ໂຄງການ​ດັ່ງກ່າວ​ ຈະໄດ້​ຈັດ​ຕັ້ງ​ປະຕິບັດ​ທົດ​ລອງ​ລົງພາຍ​ໃນນະຄອນຫຼວງ​ວຽງ​ຈັນ ເລີ່ມ​ແຕ່​ວັນ​ທີ 1 ກຸມພາ 2015 ເປັນຕົ້ນ​ໄປ ເຊິ່ງ​ມີ​ໄລຍະ​ເວລາ 3 ປີ ຫຼັງ​ຈາກ​ນັ້ນ ຈະ​ຂະຫຍາຍໄປ​ສູ່​ແຂວງ​ອື່ນໆ​ໃນ​ທົ່ວ​ປະເທດ ສຳລັບ​ມູນ​ຄ່າ​ທີ່​ສາມາດ​ນຳ​ໃຊ້ໃນ​ການ​ເກັບ​ອາກອນ ນັບ​ແຕ່ 2 ພັນ​ກີບ​ຂຶ້ນ​ໄປ ເຊິ່ງ​ຄາດ​ວ່າ​ຈະມີ​ລາຍ​ຮັບ​ຈາກ​ການ​ນຳ​ໃຊ້ໃບເກັບ​ອາກອນ​ມູນ​ຄ່າ​ເພີ່ມ​ແບບ​ ມີລາງວັນ ເຖິງ 800 ກວ່າ​ຕື້​ກີບ ເຊິ່ງ​ທຽບ​ກັບ​ປີຜ່ານມາ ​ລາຍ​ໄດ້ອາກອນ​ໃນ​ປີຜ່ານມາ​ໄດ້​ພຽງ 600 ກວ່າ​ຕື້​ກີບ​ເທົ່າ​ນັ້ນ.