ອາກາດເລີ່ມໜາວແລ້ວ ໂດຍສະເພາະຕອນເຊົ້າ ແລະ ຕອນຄໍ່າໆ ເປັນໄລຍະເວລາທີ່ໃຜຫລາຍໆຄົນອາບນ້ຳກັນແມ່ນບໍ່ ? ແນ່ນອນວ່າ ໂຕຊ່ວຍໃນລະດູໜາວແບບນີ້ກໍ່ໜີບໍ່ພົ້ນ ເຄື່ອງເຮັດນ້ຳອຸ່ນ ເພື່ອຊ່ວຍຜ່ອນຄາຍຄວາມໜາວ ເຊິ່ງການ ອາບນ້ຳອຸ່ນ ມີທັງຂໍ້ດີ ແລະ ຂໍ້ເສຍເຊັ່ນກັນ ມາເບິ່ງດີກວ່າວ່າ ມີຫຍັງແນ່ ແລະ ເຮົາຈະແກ້ໄຂບັນຫາ ໜາວໆນີ້ໄດ້ແບບໃດ
ຂໍ້ດີຂອງການ ອາບນ້ຳອຸ່ນ
– ກະຕຸ້ນການໄຫລວຽນຂອງເລືອດ ການອາບນ້ຳອຸ່ນເປັນຜົນດີີຕໍ່ສຸຂະພາບຂອງຜູ້ອາບ ສາຍນ້ຳອຸ່ນ ອຸນຫະພູມທີ່ເໝາະສົມຈະຊ່ວຍກະຕຸ້ນການໄຫລວຽນຂອງເລືອດໃຫ້ໄປທົ່ວຮ່າງກາຍ
– ການອາບນ້ຳອຸ່ນຊ່ວຍເຮັດໃຫ້ຮ່າງກາຍຮູ້ສຶກຜ່ອນຄາຍ ແລະ ເກີດການຕື່ນໂຕ ຊ່ວຍປິ່ນປົວບັນເທົາຄວາມປວດເມື່ອຍ ແລະ ຄວາມເຄັ່ງຕຶງຂອງກ້າມຊີ້ນຕາມຮ່າງກາຍ
– ປາສະຈາກສິ່ງສົກກະປົກອຸດຕັນຮູຂຸມຂົນ ການອາບນ້ຳໃນອຸນຫະພູມທີ່ເໝາະສົມ ຈະຊ່ວຍປິ່ນປົວຜິວພັນ ຊະລ້າງໄຂມັນເທິງຜິວໜັງ ແລະ ເຮັດຄວາມສະອາດເລິກເຖິງຮູຂຸມຂົນໄດ້ດີກວ່າ
– ເພີ່ມຄວາມສົດຊື່ນ ຄືນຄວາມກະຕືລືລົ້ນ ເພາະສາຍນ້ຳອຸ່ນຈະຫລຸດປະຈຸບວກ ແລະ ເພີ່ມປະຈຸລົບຮອບຂ້າງໃນອາກາດຂະນະອາບນ້ຳຊ່ວຍເຮັດໃຫ້ຫາຍໃຈໄດ້ຄ່ອງຂຶ້ນ ຮູ້ສຶກສົດຊື່ນພາຍຫລັງຈາກອາບນ້ຳ
ຂໍ້ເສຍຂອງການ ອາບນ້ຳອຸ່ນ
– ຖ້າຫາກ ອາບນ້ຳອຸ່ນ ໃນອຸນຫະພູມທີ່ບໍ່ເໝາະສົມ ແລະ ດົນເກີນໄປ ຈະເຮັດໃຫ້ຜິວແຫ້ງເສຍ ແຕກລອກ ແລະ ຮູຂຸມຂົນກວ້າງຂຶ້ນ ເພາະນ້ຳອຸ່ນຈະລ້າງນ້ຳມັນເທິງຜິວອອກໄປຫລາຍ ເຮັດໃຫ້ຜິວແຫ້ງເສຍ ແລະ ເກີດການລະຄາຍເຄືອງໄດ້
– ຖ້າຫາກ ອາບນ້ຳອຸ່ນ ບໍ່ຄວນໃຊ້ຜະລິດຕະພັນເຮັດຄວາມສະອາດຜິວທີ່ມີຟອງຫລາຍໆ ເພາະຈະດຶງຄວາມຊຸ່ມຊື່ນໄປຈາກຜິວ ແລະ ບໍ່ຄວນເຊັດຖູຜິວແຮງໆ ເພາະຈະຍິ່ງເຮັດໃຫ້ຜິວລອກຫລາຍຂຶ້ນ
– ການແຊ່ນ້ຳຮ້ອນດົນກາຍ 30 ນາທີ ຈະເຮັດໃຫ້ເລືອດລົງມາຫລໍ່ລ້ຽງທີ່ຜິວໜັງ ສົ່ງຜົນໃຫ້ໄປລ້ຽງສະຫມອງບໍ່ພໍ ເຮັດໃຫ້ອ່ອນເພຍ ວິນວຽນຫົວອາດຈະເປັນລົມໄດ້
– ຖ້າຫາກ ອາບນ້ຳອຸ່ນ ແລະ ສະຜົມດ້ວຍນ້ຳອຸ່ນຈະເຮັດໃຫ້ຜົມແຫ້ງ ແລະ ເກີດລັງແຄໄດ້ ຍິ່ງໃນລະດູໜາວແບບນີ້ເຮັດໃຫ້ຜົມ ແລະ ໜັງຫົວແຫ້ງຢູ່ແລ້ວ ຍິ່ງສະຜົມດ້ວຍນ້ຳອຸ່ນຍິ່ງເປັນການກະຕຸ້ນໃຫ້ຜົມແຫ້ງຟູ ແລະ ເກີດລັງແຄຂຶ້ນໄດ້ຫລາຍກວ່າເກົ່ານໍາອີກ
ຄຳແນະນຳໃນການ ອາບນ້ຳອຸ່ນ
– ໃນການ ອາບນ້ຳອຸ່ນ ໃນລະດູໜາວ ຄວນປັບອຸນຫະພູມຮ່າງກາຍດ້ວຍການເອົານ້ຳເທຢູ່ຕີນກ່ອນ ແລະ ຄ່ອຍໆໄລ່ຂຶ້ນມາ ຢ່າຮີບຮ້ອນລາດທັງໂຕກ່ອນໂດຍທີ່ຍັງບໍ່ປັບອຸນຫະພູມຮ່າງກາຍ ເພາະອາດຈະເຮັດໃຫ້ເຮົາເປັນຫວັດໄດ້
– ຫລັງຈາກ ອາບນ້ຳອຸ່ນ ໃນໄລຍະທ້າຍໆໃຫ້ອາບນ້ຳອຸ່ນກັບນ້ຳເຢັນ ເພື່ອປິດຮູຂຸມຂົນ ແລະ ປັບສົມດຸນຂອງຜິວໜັງ ເຮັດໃຫ້ຜິວແຫ້ງເສຍໜ້ອຍລົງໄດ້
– ໄລຍະເວລາໃນການອາບນ້ຳອຸ່ນທີ່ດີຕໍ່ສຸຂະພາບຄື 10-15 ນາທີ ບໍ່ຄວນດົນກາຍ 30 ນາທີ
– ຫລັງຈາກ ອາບນ້ຳອຸ່ນ ຄວນທາຄີມບຳລຸງຜິວເພື່ອເພີ່ມຄວາມຊຸ່ນຊື່ນ ປ້ອງກັນຜິວແຫ້ງແຕກໄດ້ອີກທາງໜຶ່ງ