Homeຂ່າວພາຍ​ໃນລັດຖະບານຈະດຳເນີນ 5 ມາດຕະການ ເພື່ອບັນລຸເປົ້າໝາຍຈະເລີນເຕີບໂຕທາງດ້ານເສດຖະກິດ.

ລັດຖະບານຈະດຳເນີນ 5 ມາດຕະການ ເພື່ອບັນລຸເປົ້າໝາຍຈະເລີນເຕີບໂຕທາງດ້ານເສດຖະກິດ.

Published on

ເພື່ອຮັບປະກັນໃຫ້ບັນລຸເປົ້າໝາຍຈະເລີນເຕີບໂຕທາງດ້ານເສດຖະກິດ ແລະ ບັນດາຄາດໝາຍທາງດ້ານມະຫາພາກທີ່ສະພາແຫ່ງຊາດໄດ້ຮັບຮອງ, ລັດຖະບານ ຈະສືບຕໍ່ປະຕິບັດຕາມ 6 ທິດທາງ, 4 ມາດຕະການຈັດຕັ້ງພັດທະນາເສດຖະກິດ-ສັງຄົມແຫ່ງຊາດ, 14 ມາດຕະການເພີ່ມເຕີມ, ໃນຂະນະດຽວກັນ ຈະປະຕິບັດ 5 ມາດຕະການບຸລິມະສິດ.

ສະຫາຍ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ຊີ້ແຈງຕໍ່ຄຳເຫັນຂອງຄະນະປະຈຳສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດໃນກອງປະຊຸມສະໄໝວິສາມັນ ເທື່ອທີ I ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດ, ທີ່ສະພາແຫ່ງຊາດ, ໂດຍການເປັນປະທານຂອງສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ.

ສະຫາຍ ນາຍົກລັດຖະມົນຕີ ໄດ້ຊີ້ແຈງວ່າ: ເພື່ອຮັບປະກັນໃຫ້ບັນລຸເປົ້າໝາຍຈະເລີນເຕີບໂຕທາງດ້ານເສດຖະກິດ ແລະ ບັນດາຄາດໝາຍທາງດ້ານມະຫາພາກ ທີ່ສະພາແຫ່ງຊາດໄດ້ຮັບຮອງແລ້ວ ຕາມມະຕິ 177/ສພຊ, ເຊິ່ງລັດຖະບານຈະສືບຕໍ່ປະຕິບັດຕາມ 6 ທິດທາງ ແລະ 4 ມາດຕະການຈັດຕັ້ງພັດທະນາເສດຖະກິດ-ສັງຄົມແຫ່ງຊາດ ປີ 2026 ແລະ 14 ມາດຕະການເພີ່ມເຕີມທີ່ສະພາແຫ່ງຊາດໄດ້ກຳນົດໃນມະຕິ 117/ສພຊ ໃຫ້ຕັ້ງໜ້າ, ແຂງແຮງ ແລະ ມີໝາກຜົນຕົວຈິງກວ່າເກົ່າ.

ພ້ອມນັ້ນ ຈະປະຕິບັດ 5 ມາດຕະການບຸລິມະສິດ ຄື: ຄຸ້ມຄອງເງິນເຟີ້ດ້ວຍການປະຕິບັດນະໂຍບາຍ ແລະ ລະບຽບການເງິນຕາ ເຊັ່ນ: ຮັກສາຄ່າເງິນກີບບໍ່ໃຫ້ມີການເໜັງຕີງຫຼາຍ, ປະຕິບັດອັດຕາດອກເບ້ຍທີ່ຍືດຍຸ່ນ ແລະ ເໝາະສົມ, ເພີ່ມຄັງສຳຮອງເງິນຕາໃຫ້ຫຼາຍຂຶ້ນ ໂດຍການລະດົມທຸກແຫຼ່ງລາຍຮັບເງິນຕາທີ່ມີ; ປະຕິບັດລະບຽບການ ການເງິນ ເພື່ອບັນລຸຄາດໝາຍລາຍຮັບຕາມແຜນ ແລະ ລື່ນແຜນຈາກພາສີ-ອາກອນ, ຫຼຸດຜ່ອນລາຍຈ່າຍທີ່ບໍ່ຈຳເປັນທີ່ເປັນການອຸດໜູນເກີນຂອບເຂດ; ເລັ່ງການຜະລິດສົ່ງອອກ ເຊັ່ນ: ໄຟຟ້າ, ແຮ່ທາດ, ກະສິກຳສັດ ແລະ ແປຮູບ, ທ່ອງທ່ຽວ, ການຂົນສົ່ງໂລຈິສຕິກ, ການບໍລິການຢູ່ດ່ານຊາຍແດນ, ທ່າບົກຕ່າງໆ ເຮັດໃຫ້ການຄ້າ, ການບໍລິການມີຄວາມສະດວກໂລ່ງລ່ຽນ ແລະ ປອດໄພ; ສຸມໃສ່ແກ້ໄຂໜີ້ສິນສາທາລະນະ ແລະ ເກັບກູ້ໜີ້ສິນຈາກວິສາຫະກິດ ເພື່ອບໍ່ໃຫ້ຄວາມສ່ຽງໜີ້ກາຍມາເປັນສິ່ງກົດດັນຄ່າເງິນກີບ ແລະ ອັດຕາເງິນເຟີ້; ສ້າງກົນໄກພົວພັນປະສານງານການບັນຊາບໍລິຫານທີ່ໂລ່ງລ່ຽນ, ໂປ່ງໃສ ແລະ ທັນສະໄໝ ໂດຍມອບໃຫ້ຂະແໜງການ ແລະ ພາກສ່ວນກ່ຽວຂ້ອງຮັບຜິດຊອບຢ່າງຈະແຈ້ງ ແລະ ມີກົນໄກຕິດຕາມການກວດກາ ປະເມີນຜົນການປະຕິບັດຕົວຈິງແຕ່ລະໄລຍະ.

ໃນນັ້ນ, ໃນການຈຳກັດການນໍາເຂົ້າສິນຄ້າຟຸມເຟືອຍ ແລະ ສິນຄ້າທີ່ພາຍໃນສາມາດຜະລິດໄດ້ແລ້ວຕໍ່ບັນຫານີ້, ປັດຈຸບັນລັດຖະບານໄດ້ສຸມໃສ່ບັນດາສິນຄ້າຟຸມເຟືອຍ ທີ່ພາໃຫ້ເກີດການໄຫຼອອກຂອງເງິນຕາຕ່າງປະເທດ ໄດ້ແກ່ສິນຄ້າໝວດພາຫະນະທີ່ມີມູນຄ່າສູງ, ເຫຼັກ ແລະ ຊີມັງ, ຜະລິດຕະພັນເຫຼົ້າ ແລະ ຢາສູບທຸກຊະນິດ, ທົບທວນການຈັດຕັ້ງປະຕິບັດມະຕິ 06/ລບ ແລະ ແຈ້ງການ ສະບັບເລກທີ 602/ຫສນຍ ວ່າດ້ວຍການໂຈະຊົ່ວຄາວການນໍາເຂົ້າລົດນໍ້າມັນເຊື້ອໄຟ, ລົດທີ່ບໍ່ມີຕົວແທນຈໍາໜ່າຍທາງການ ແລະ ການວາງມາດຕະການແກ້ໄຂຜົນກະ ທົບໃນຕໍ່ໜ້າ, ກະກຽມອອກຂໍ້ຕົກລົງ ວ່າດ້ວຍການຄຸ້ມຄອງນໍາເຂົ້າ ແລະ ສົ່ງອອກວັດຖຸມີຄ່າ.

ກະກຽມອອກແຈ້ງການກ່ຽວກັບມາດຕະການຄຸ້ມຄອງ ການນໍາເຂົ້າສິນຄ້າເຄື່ອງດື່ມທີ່ມີທາດເຫຼົ້າ ແລະ ຢາສູບທຸກຊະນິດ, ວຽກງານດັດສົມວິສາຫະກິດນໍາເຂົ້າຍານພະຫານະ ແລະ ປັດຈຸບັນ ໄດ້ຄົ້ນຄວ້າ ພິຈາລະນາອອກແຈ້ງການດັດສົມວິສາຫະກິດນໍາເຂົ້າ-ສົ່ງອອກສິນຄ້າ ແລະ ບໍລິການ ໂດຍມອບໃຫ້ກະຊວງອຸດສາຫະກຳ ແລະ ການຄ້າ ເປັນເຈົ້າການສົມທົບກັບພາກສ່ວນກ່ຽວຂ້ອງກຳນົດແຜນດັດສົມ ແລະ ຈັດຕັ້ງປະຕິບັດຕາມພາລະບົດບາດ ພາກສ່ວນໃດຄຸ້ມຄອງທຸລະກິດໃດ ແມ່ນມອບໃຫ້ພາກສ່ວນນັ້ນເປັນເຈົ້າການດັດສົມ, ທຸລະກິດທີ່ບໍ່ມີພາກສ່ວນໃດຮັບຜິດຊອບ ແມ່ນມອບໃຫ້ກະຊວງອຸດສາຫະກຳ ແລະ ການຄ້າເປັນເຈົ້າການດັດສົມ.

ແຫຼ່ງທີ່ມາ: ວາລະສານປ້ອງກັນຊາດ

ບົດຄວາມຫຼ້າສຸດ

ແຂວງຊຽງຂວາງ ໄດ້ຊີ້ແຈງເຫດການປາຕາຍ ແມ່ນເກີດມາຈາກ ບຸກຄົນລັກລອບແຊ່ແຮ່ຄໍາ

ໃນວັນທີ 19 ພະຈິກ 2026, ຄະນະທີມງານສະເພາະກິດເມືອງແປກ ແຂວງຊຽງຂວາງ ໄດ້ຊີ້ແຈງເຫດການປາຕາຍເປັນຈໍານວນຫລາຍໃນນໍ້າຫ້ວຍຫີນລາຍ ລະຫວ່າງຊາຍແດນບ້ານຍວນ ແລະ ບ້ານໂພນງາມເໜືອ ເມືອງແປກ ແມ່ນເກີດມາຈາກ ບຸກຄົນລັກລອບແຊ່ແຮ່ຄໍາທີ່ບໍ່ຖືກຕ້ອງຕາມກົດໝາຍ ຢູ່ບ້ານໂພນງາມເໜືອ....

ໂດຍຕອບສະໜອງຄໍາເຊື້ອເຊີນຂອງສະຫາຍ ຢູນ ເຈີງ ໂຮ, ລັດຖະມົນຕີກະຊວງພົວພັນເສດຖະກິດກັບຕ່າງປະເທດ ແຫ່ງ ສປປ ເກົາຫຼີ, ສະຫາຍ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ...

ໄລຍະ 9 ເດືອນ ປີ 2026, ແຂວງອັດຕະປື ກໍ່ຄືພະແນກໂຍທາທິການ ແລະ ຂົນສົ່ງແຂວງ ໄດ້ເປັນເຈົ້າການຕິດຕາມ ແລະ ຄວບຄຸມຄຸນນະພາບໂຄງການກໍ່ສ້າງ-ສ້ອມແປງຂົວ-ທາງ ທີ່ເປັນໂຄງການສືບຕໍ່ ຈໍານວນ...

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ ໄດ້ຕ້ອນຮັບ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ)...