ພິທີມອບ-ຮັບໂຄງການກໍ່ສ້າງ, ປັບປຸງ, ສ້ອມແປງ ອາຄານຫໍພິພິທະພັນແຂວງຈຳປາສັກ.
ວັນທີ 11 ເມສາ 2025, ໄດ້ມີພິທີມອບ-ຮັບໂຄງການກໍ່ສ້າງ, ປັບປຸງ, ສ້ອມແປງ ອາຄານຫໍພິພິທະພັນແຂວງຈຳປາສັກ ແຕ່ກ່ອນແມ່ນອາຄານຫ້ອງການພະແນກການຕ່າງປະເທດແຂວງ ຫຼື ອາຄານເກົ່າຫ້ອງວ່າການແຂວງ. ພິທີຈັດຂຶ້ນຢູ່ບໍລິເວນເດີ່ນດ້ານໜ້າກໍພິພິທະພັນດັ່ງກ່າວ ໂດຍການໃຫ້ກຽດເຂົ້າຮ່ວມຂອງ ທ່ານອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ທ່ານ ຫງວຽນ ຕວັນ ແຄງ ກຳມະການຄະນະປະຈໍາພັກແຂວງ ຮອງປະທານ ຜູ້ປະຈຳການຄະນະກຳມະການປະຊາຊົນແຂວງບິ່ງດິ້ງ ສສ ຫວຽດນາມ, ທ່ານ ນາງ ຕ້າ ເຟືອງ ຢູງ ກົງສູນໃຫຍ່ແຫ່ງ ສສ ຫວຽດນາມ ປະຈຳ 4 ແຂວງພາກໃຕ້ ທີ່ນະຄອນປາກເຊ. ມີການນຳແຂວງ, ການນໍາພະແນກການກົມກອງທີ່ກ່ຽວຂ້ອງອ້ອມຂ້າງແຂວງ, ການນຳ ແລະ ພະນັກງານ – ລັດຖະກອນພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຈຳປາສັກ ພ້ອມດ້ວຍຄະນະຜູ້ແທນແຂວງບິ່ງດິ້ງ ແລະ ບໍລິສັດຮັບເໝົາກໍ່ສ້າງສ້ອມແປງເຂົ້າຮ່ວມ.
ໂອກາດກ່າວມອບ, ທ່ານ ຫງວຽນ ຕວັນ ແຄງ ກຳມະການຄະນະປະຈໍາພັກແຂວງ ຮອງປະທານ ຜູ້ປະຈຳການຄະນະກຳມະການປະຊາຊົນແຂວງບິ່ງດິ້ງ ມີຄໍາເຫັນວ່າ: ວ່າ: ການຊ່ວຍເຫຼືອກໍ່ສ້າງ, ປັບປຸງ ສ້ອມແປງ ອາຄານຫໍພິພິທະພັນ ແກ່ແຂວງຈຳປາສັກ ຄັ້ງນີ້ ເປັນການຊ່ວຍເຫຼືອທີ່ມີຄວາມໝາຍສຳຄັນ ເພື່ອຊ່ວຍໃນການຍົກລະດັບປັບປຸງວຽກງານຫໍພິພິທະພັນຂອງແຂວງ ໃຫ້ມີໃບໜ້າໃໝ່, ກາຍເປັນບ່ອນສຶກສາຄົ້ນຄວ້າ ແລະ ເປັນສູນການຮຽນຮູ້ດ້ານປະຫວັດສາດ, ວັດທະນະທຳ ລວມທັງການພົວພັນຮ່ວມມື ລະຫວ່າງ ແຂວງຈໍາປາສັກ-ແຂວງບິ່ງດິ້ງ ແລະ ອື່ນໆ.
ໂອກາດກ່າວຮັບ, ທ່ານອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ກໍມີຄຳເຫັນວ່າ: ອາຄານຫໍພິພິທະພັນ ທີ່ແຂວງບິ່ງດິ້ງໃຫ້ການຊ່ວຍເຫຼືອດ້ານທຶນຮອນໃນການກໍ່ສ້າງ, ປັບປຸງ ສ້ອມແປງ ຈະກາຍເປັນສະຖານທີ່ທ່ອງທ່ຽວໜຶ່ງຂອງແຂວງຈຳປາສັກ ໃນການຕ້ອນຮັບແຂກພາຍໃນ ແລະ ຕ່າງປະເທດ ທີ່ເຂົ້າມາທ່ອງທ່ຽວ.ເພື່ອສືບຕໍ່ປັບປຸງອາຄານຫ້ອງການ, ຫໍສະໝຸດ ແລະ ພື້ນທີ່ ໃຫ້ມີຄວາມສົມບູນແບບທາງດ້ານພື້ນຖານວັດຖຸ, ອຸປະກອນ ແລະ ມີປະສິດທິພາບ ແຂວງຈຳປາສັກຍັງມີຄວາມຈຳເປັນທີ່ຕ້ອງການທຶນໃນການປັບປຸງ-ສ້ອມແປງໂຄງການດັ່ງກ່າວເປັນຕົ້ນແມ່ນບັນດາໜ້າວຽກທີ່ຈະເກີດຂຶ້ນໃໝ່ ຄື: ວຽກປັບປຸງຫໍສະໝຸດ, ອາຄານເຮັດວຽກ, ກໍ່ສ້າງບ່ອນຈອດລົດ, ປ້ອມຍາມ, ປັບປຸງເດີ່ນ, ທາງເບຕົງ, ໝໍ້ແປງໄຟ ແລະ ອຸປະກອນອື່ນໆ. ແຕ່ແນວໃດກໍຕາມ, ໃນນາມຕາງໜ້າໃຫ້ຄະນະພັກ-ອົງການປົກຄອງແຂວງຈຳປາສັກ ຂໍສະແດງຄວາມຂອບໃຈເປັນຢ່າງສູງ ຕໍ່ການນຳແຂວງບິ່ງດິ້ງ ແລະ ການນຳແຂວງຈຳປາສັກ,ກົງສຸນໃຫຍ່ແຫ່ງ ສສ ຫວຽດນາມ ປະຈຳ 4 ແຂວງພາກໃຕ້ ທີ່ນະຄອນປາກເຊ, ບໍລິສັດ ຈິດຈະເລີນ ກໍ່ສ້າງ ຈຳກັດ, ບັນດາພະແນກ, ຂະແໜງການທີ່ກ່ຽວຂ້ອງ ທີ່ໄດ້ເອົາໃຈໃສ່ໃນການຕິດຕາມ ແລະ ອຳນວຍຄວາມສະດວກໃນດ້ານຕ່າງໆຈົນເຮັດໃຫ້ໂຄງການດັ່ງກ່າວມີຜົນສຳເລັດຕາມຄາດໝາຍທີ່ວາງໄວ້.
ແຫຼ່ງຂ່າວ: ໜັງສືພິມຈຳປາໃໝ່