ສື່ຂ່າວຕ່າງປະເທດ ລາຍງານວ່າ ຄວາມບໍ່ພໍໃຈເພີ່ມຂຶ້ນຫຼາຍໃນໝູ່ເຈົ້າໜ້າທີ່ລະດັບສູງຂອງທຳນຽບຂາວ ກ່ຽວກັບແນວທາງການດຳເນີນງານຂອງ ອີລອນ ມັສ ທີ່ຂະຫຍາຍອິດທິພົນຂອງລາວ ຢູ່ເໜືອໜ່ວຍງານລັດຖະບານອາເມລິກາ ກວ່າ 12 ແຫ່ງ ໂດຍຂາດການປະສານງານກັບທີມຂອງປະທານາທິບໍດີ ໂດໂນ ທຣຳ ຕາມລາຍງານຈາກແຫຼ່ງຂ່າວທີ່ຮັບຮູ້ເຖິງສະຖານະການ.
ຊູຊີ ໄວລ ຫົວໜ້າຄະນະດຳເນີນງານຂອງທ່ານ ໂດໂນ ທຣຳ ແລະທີມງານຂອງລາວຮູ້ສຶກຖືກກັນອອກຈາກວົງໃນ ເນື່ອງຈາກໜ່ວຍງານ DOGE ຂອງອີລອນ ມັສ ເດີນໜ້າເລີກຈ້າງເຈົ້າໜ້າທີ່ລັດຈຳນວນຫຼາຍ. ຂະນະດຽວກັນ ກໍເຂົ້າເຖິງຂໍ້ມູນທີ່ອ່ອນໄຫວ ແລະລົບກວນການເຮັດວຽກຂອງໜ່ວຍງານຕ່າງໆ ເຖິງແມ່ນວ່າ ຊູຊີ ໄວລ ແລະທີມງານຂອງລາວຈະໄດ້ມີການໂອ້ລົມກັບອີລອນ ມັສ ເພື່ອສະແດງຄວາມກັງວົນ ແຕ່ຍັງບໍ່ສາມາດລະບຸໄດ້ວ່າມີການປ່ຽນແປງໃດເກີດຂຶ້ນ.
ອີລອນ ມັສ ໃຫ້ສຳພາດທີ່ທຳນຽບຂາວເມື່ອວັນຄານທີ່ຜ່ານມາ ໂດຍຢືນຢັນວ່າທີມຂອງລາວ ແລະ ໂດໂນ ທຣຳ ເຮັດວຽກຮ່ວມກັນເປັນເອກະພາບ. ຢ່າງໃດກໍຕາມ ແຫຼ່ງຂ່າວລະບຸວ່າຄວາມຂັດແຍ້ງພາຍໃນຍັງຄົງມີຢູ່ ໂດຍສະເພາະໃນການເຂົ້າເຖິງຂໍ້ມູນ ແລະການສື່ສານທີ່ບໍ່ເປັນໄປຕາມຂະບວນການຂອງທຳນຽບຂາວ.
ຄວາມກັງວົນອີກປະເດັນໜຶ່ງ ຄືອີເມວທີ່ທີມຂອງອີລອນ ມັສ ສົ່ງໄປໃຫ້ເຈົ້າໜ້າທີ່ລັດ ໂດຍສະເພາະອີເມວເມື່ອວັນທີ 28 ມັງກອນ 2025 ເຊິ່ງສະເໜີເງິນຈູງໃຈໃຫ້ເຈົ້າໜ້າທີ່ລັດທະບານກາງ 2 ລ້ານຄົນລາອອກ, ແຫຼ່ງຂ່າວເຜີຍອີກວ່າອີເມວດັ່ງກ່າວ ບໍ່ໄດ້ຮັບການອະນຸມັດຈາກໄວລແລະທີມງານ.
ເຖິງແມ່ນວ່າອີລອນ ມັສ ຈະໄດ້ຮັບການສະໜັບສະໜຸນຈາກພັນທະມິດບາງສ່ວນຂອງໂດໂນ ທຣຳ ແຕ່ກໍມີເຈົ້າໜ້າທີ່ລະດັບສູງຂອງທຳນຽບຂາວ ທີ່ເບິ່ງວ່າວິທີການຂອງລາວສ້າງຄວາມວຸ້ນວາຍ ແລະຂາດຄວາມເປັນລະບົບ. ແນວໃດກໍຕາມ ທ່ານ ໂດໂນ ທຣຳ ຍັງຄົງກ່າວຊື່ນຊົມອີລອນ ມັສ ແລະທີມ DOGE ໂດຍລະບຸວ່າເປັນ “ອັດສະລິຍະ” ທີ່ຊ່ວຍຜັກດັນການປະຕິຮູບລັດຖະບານໃຫ້ມີປະສິດທິພາບຫຼາຍຂຶ້ນ.
ທີ່ມາ: Reuters