ສຳນັກຂ່າວຕ່າງປະເທດລາຍງານໃນເຊົ້າວັນທີ 23 ມັງກອນ 2025 ເກີດເຫດສະຫຼົດຂຶ້ນທີ່ປະເທດກໍປູເຈຍ ເມື່ອມີບ້ານເສດຖີຫຼັງໜຶ່ງ ໄດ້ເຮັດການແຈກອັງເປົາເພື່ອສະເຫຼີມສະຫຼອງວັນກຸດຈີນ ຈາກນັ້ນປະຊາຊົນຈຳນວນຫຼາຍຈຶ່ງໄດ້ແຫ່ພາກັນໄປບ້ານຫຼັງດັ່ງກ່າວ ເມື່ອຈຳນວນຄົນເພີ່ມຫຼາຍຂຶ້ນເຮັດໃຫ້ ບາງຄົນເປັນລົມ ຈຶ່ງເກີດເປັນເຫດເຮັດໃຫ້ຄົນຢຽບກັນເສຍຊີວິດ 4 ຄົນ ແລະ ບາດເຈັບ 5 ຄົນ.

ເຈົ້າໜ້າທີ່ຕຳຫຼວດທ້ອງຖິ່ນໄດ້ໄປຮອດຈຸດເກີດເຫດຢ່າງວ່ອງໄວ ເພື່ອຊ່ວຍເຫຼືອອົບພະຍົບຜູ້ບາດເຈັບ ແລະ ຄຸ້ມຄອງການສັນຈອນບໍ່ໃຫ້ເກີດຄວາມແອອັດ ເພື່ອອຳນວຍຄວາມສະດວກໃນການກະຈາຍຝູງຊົນ.

ຕາມການລາຍງານຂອງເຈົ້າໜ້າທີ່ລະບຸວ່າ: ພາຍຫຼັງເຈົ້າຂອງບ້ານຊາບເກີດເຫດດັ່ງກ່າວ ​ເຈົ້າຂອງບ້ານກໍໄດ້ມອບ​ເງິນ​ໃຫ້​ຄອບຄົວ​ຜູ້​ເສຍ​ຊີວິດ 10 ລ້ານ​ຣຽວ ແລະ 2 ລ້ານ​ຣຽວ​ໃຫ້​ຜູ້ທີ່ໄດ້​ບາດ​ເຈັບ. ນອກຈາກນັ້ນ, ທ່ານ Khuong Sreng ເຈົ້າຄອງນະຄອນ ຫຼວງພະນົມເປັນ ໄດ້ປະກອບສ່ວນ 5 ລ້ານຣຽວ ໃຫ້ແກ່ຄອບຄົວຜູ້ເສຍຊີວິດແຕ່ລະຄົນ ແລະ ເງິນຊ່ວຍເຫຼືອຜູ້ບາດເຈັບອີກ 2 ລ້ານຣຽວ ພ້ອມທັງມອບໂລງສົບໃຫ້ຜູ້ເສຍຊີວິດ.

ແຫຼ່ງຂ່າວ: eacnews.asia