ວັນທີ 06 ກັນຍາ 2024 ຜ່ານມາເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຄຳມ່ວນ ໄດ້ນຳຕົວຜູ້ຖືກຫາຊື່ ທ້າວ ນັນທະພອນ ພຽນທຳດີ (ບອນ ຫຼື ຕີ) ອາຍຸ 36 ປີ ອາຊີບ ຄ້າຂາຍຢູ່ບ້ານ ທຸ່ງທອງ ເມືອງໜອງບົວ ແຂວງນະຄອນສະຫວັນ (ປະເທດໄທ) ມາເຮັດແຜນປະກອບຄຳຮັບສາລະພາບໃນຄະດີປຸ້ນຊັບ (ປຸ້ນຄຳ) ຢູ່ຮ້ານຂາຍຄຳ ຕະຫຼາດສຸກສົມບູນ (ຫຼັກ3) ເມືອງທ່າແຂກ ແຂວງຄຳມ່ວນ.
ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຄຳມ່ວນ ໄດ້ລາຍງານຮູ້ວ່າ: ເຫດການການປຸ້ນຄຳເກີດຂຶ້ນເມື່ອວັນທີ 1 ກັນຍາ 2024 ຜ່ານມາ ,ໂດຍມີຄົນຮ້າຍ 1 ຄົນ ໄດ້ຂັບຂີ່ລົດຈັກ ຍີ່ຫໍ້ ຮອນດາ ຮຸ່ນ ຟໍຊ່າ ສີຂາວ-ດຳ ບໍ່ຕິດປ້າຍທະບຽນ ແລ້ວໃສ່ໝວກກັນກະທົບສີດຳ (ປິດບັງໃບໜ້າ) ມາຈອດຢູ່ໜ້າຮ້ານ ໄດ້ມີການຈົກປືນສັ້ນ ສາກເອົາລູກປືນເຂົ້າລຳກ້ອງ ເຂົ້າມານາບຂູ່ຜູ້ເສຍຫາຍພ້ອມໄດ້ເວົ້າວ່າ ໃຫ້ເອົາຄຳອອກມາໃຫ້ໄວໆ ! ເຮັດໃຫ້ຜູ້ເສຍຫາຍຢ້ານກົວຈຶ່ງໄດ້ຈັບເອົາສາຍຄໍຄຳຢູ່ໃນຕູ້ສົ່ງໃຫ້ຄົນຮ້າຍ ຈຳນວນ 4 ເສັ້ນ ນໍ້າໜັກເສັ້ນລະ 2 ສະຫຼຶງ ລວມນ້ຳໜັກຈຳນວນ 2 ບາດ ຈາກນັ້ນຄົນຮ້າຍກໍ່ໄດ້ແລ່ນຂຶ້ນລົດຈັກ ແລະ ຂັບຂີ່ເອົາຕົວຫຼົບໜີ.
ຕໍ່ເຫດການດັ່ງກ່າວ ເຈົ້າໜ້າທີ່ວິຊາສະເພາະໄດ້ຮີບຮ້ອນປະສານສົມທົບກັບພາກສ່ວນທີ່ກ່ຽວຂ້ອງລົງເກັບກຳຂໍ້ມູນຫຼັກຖານໃນສະຖານທີ່ເກີດເຫດພ້ອມເອົາຄຳໃຫ້ການພະຍານບຸກຄົນ ແລະພາບຈາກກ້ອງວົງຈອນປິດຢູ່ສະຖານທີ່ເກີດເຫດ ແລະ ຕາມເສັ້ນທາງທີ່ຄົນຮ້າຍເອົາຕົວຫຼົບໜີ ພ້ອມທັງຂຶ້ນບັນຊີເປົ້າໝາຍຢ່າງຊັດເຈນ ແລະຈັດວາງກຳລັງຕິດຕາມຢ່າງໃກ້ຊິດ ຈຶ່ງສາມາດຮູ້ໄດ້ເປົ້າໝາຍ ຊື່ ທ້າວ ນັນທະພອນ ພຽນທຳດີ (ບອນ ຫຼື ຕີ) ອາຍຸ 36 ປີ ອາຊີບ ຄ້າຂາຍ ເຊື້ອຊາດໄທ ສັນຊາດ ໄທ ຕົກມາຮອດວັນທີ 4 ກໍລະກົດ 2024 ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຄຳມ່ວນ ກໍ່ໄດ້ປະສານສົມທົບກັບ ເຈົ້າໜ້າທີ່ ປກສ ແຂວງສະຫວັນນະເຂດ ເພື່ອເຂົ້າກັກຕົວເປົ້າໝາຍຢູ່ຮ້ານຄ້າແຫ່ງໜຶ່ງໃນນະຄອນໄກສອນ ແຂວງສະຫວັນນະເຂດ ພ້ອມທັງ ອາວຸດ ປືນສັ້ນ CZ ສີ ດຳ-ເທົາ ເລກລະຫັດ F249501 ພ້ອມລູກ ຈຳນວນ 28 ລູກ, ລົດຈັກ 1 ຄັນ ຍີ່ຫໍ້ ຮອນດາ ຮຸ່ນ ຟໍຊ່າ ສີຂາວ-ດຳ ບໍ່ຕິດປ້າຍທະບຽນ ທີ່ໃຊ້ກໍ່ເຫດມາດຳເນີຄະດີ.
ຜ່ານການສອບສວນຂອງເຈົ້າໜ້າທີ່ ຜູ້ຖືກຫາ ໄດ້ໃຫ້ການຮັບສາລະພາບວ່າໄດ້ລົງມືກະທຳ ໃນການກໍ່ເຫດໃຊ້ອາວຸດປືນ ປຸ້ນເອົາຄຳຈາກຜູ້ເສຍຫາຍແທ້ ພາຍຫຼັງໄດ້ສາຍຄໍຄຳແມ່ນເອົາໄປຂາຍໄດ້ເງິນຈຳນວນ 50,000 ບາດ ແລ້ວນຳໄປໃຊ້ຈ່າຍຫຼີ້ນກິນຟຸມເຟືອຍຈົນໝົດ.
ດັ່ງນັ້ນ ເຈົ້າໜ້າທີ່ວິຊາສະເພາະຈຶ່ງໄດ້ນຳຕົວຜູ້ກ່ຽວມາເຮັດແຜນປະກອບຄຳຮັບສາລະພາບເພື່ອດຳເນີນຄະດີຕາມຂັ້ນຕອນຂອງກົດໝາຍ.
ແຫຼ່ງຂ່າວ: MediaLAOS