ອີງຕາມແຈ້ງການພະແນກກະສິກຳ ແລະ ປ່າໄມ້ແຂວງຈຳປາສັກ ລົງເມື່ອວັນທີ 28 ພຶດສະພາ 2024 ກ່ຽວກັບ ອະນຸຍາດໃຫ້ເຄື່ອນຍ້າຍ, ບໍລິໂພກ, ຊື້-ຂາຍ ຊີ້ນງົວ, ຄວາຍ, ແກະ, ແບ້ ຢູ່ແຂວງຈຳປາສັກ ຫຼັງຈາກທີ່ການລະບາດຂອງເຊື້ອພະຍາດໄຂ້ເລືອດດຳໃນໄລຍະ 2-3 ເດືອນທີ່ຜ່ານມາ.
ທ່ານ ຄໍາ ນິລາວົງ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ ກ່າວວ່າ: ເນື່ອງຈາກໃນຜ່ານມາ ເກີດມີການລະບາດຂອງພະຍາດສັດ ເຊິ່ງເລີ່ມແຕ່ ວັນທີ 15 ກຸມພາ 2024, ເບື້ອງຕົ້ນແມ່ນພົບເຫັນການເກີດພະຍາດໃນ 3 ບ້ານຂອງເມືອງຈໍາປາສັກ ຄື: ບ້ານໃໝ່ກາງ, ບ້ານຈິກທາງໂງ ແລະ ບ້ານໜອງຫີນ. ຕໍ່ມາພະແນກກະສິກຳ ແລະ ປ່າໄມ້ແຂວງ ໄດ້ລົງຕິດຕາມເກັບກຳຂໍ້ມູນ ພົບສັດຕາຍຢູ່ໃນ 6 ເມືອງ ຄື: ເມືອງຈຳປາສັກ, ສຸຂຸມາ, ໂພນທອງ, ຊະນະສົມບູນ, ປະທຸມພອນ, ເມືອງໂຂງ ແລະ ນະຄອນປາກເຊ ລວມມີ 21 ບ້ານ, ມີສັດຕາຍ 144 ໂຕ, ໃນນັ້ນ ຄວາຍ 16 ໂຕ, ງົວ 128 ໂຕ.
ຈາກສະພາບການດັ່ງກ່າວ ພະແນກກະສິກຳ ແລະ ປ່າໄມ້ແຂວງ ໄດ້ເອົາໃຈໃສ່ເຝົ້າລະວັງຢ່າງໃກ້ຊິດ ໂດຍໄດ້ອອກແຈ້ງການ ເລກທີ 387/ກປຂ.ຈສ, ລົງວັນທີ 7 ມີນາ 2024; ກ່ຽວກັບການເພີ່ມທະວີເຝົ້າລະວັງພະຍາດສັດ ແລະ ການຫ້າມບໍລິໂພກ, ການເຄື່ອນຍ້າຍສັດຢູ່ໃນເຂດທີ່ມີການລະບາດ, ຈາກການຕິດຕາມມາຮອດປະຈຸບັນ ສະພາບການລະບາດຂອງພະຍາດສັດແມ່ນໄດ້ຢຸດຕິລົງແລ້ວ ແລະ ໄດ້ຮັບການຢັ້ງຢືນ ສະພາບທາງດ້ານສຸຂະພາບຂອງສັດ ໃນ 9 ເມືອງ, ນະຄອນປາກເຊ ແມ່ນເຂົ້າສູ່ ສະພາບປົກກະຕິ.
ຍ້ອນແນວນັ້ນ, ພະແນກກະສິກຳ ແລະ ປ່າໄມ້ ອອກແຈ້ງການ ອະນຸຍາດໃຫ້ສາມາດເຄື່ອນຍ້າຍສັດ, ການບໍລິໂພກ ແລະ ການຊື້ – ຂາຍສັດ ປະເພດງົວ – ຄວາຍ, ແກະ, ແບ້ ຢູ່ແຂວງຈຳປາສັກ; ແຕ່ການເຄື່ອນຍ້າຍສັດ ຕ້ອງໄດ້ຮັບການຢັ້ງຢືນ ຫຼື ປະກອບເອກະສານເຄື່ອນຍ້າຍສັດ ໃຫ້ຄົບຖ້ວນ, ຖືກຕ້ອງຕາມຂັ້ນຕອນ, ລະບຽບການທີ່ກຳນົດໄວ້. ແນວໃດກໍຕາມ, ຂະແໜງຄວບຄຸມພະຍາດຕິດຕໍ່ ກໍຍັງສືບຕໍ່ຕິດຕາມເຝົ້າລະວັງກໍລະນີໃໝ່ ໂດຍອີງໃສ່ລະບົບເຝົ້າລະວັງປົກກະຕິ ແລະ ລົງໃຫ້ສຸຂະສຶກສາ ເພື່ອໃຫ້ຄວາມຮູ້ກ່ຽວກັບພະຍາດໄຂ້ເລືອດດໍາ ແກ່ປະຊາຊົນໃນບ້ານທີ່ເກີດການລະບາດ ແລະ ບ້ານທີ່ມີການບໍລິໂພກຊີ້ນງົວຕາຍດັ່ງກ່າວ ເພື່ອບໍ່ໃຫ້ປະຊາຊົນເອົາຊີ້ນງົວທີ່ຕາຍແລ້ວມາບໍລິໂພກອີກ.
ຂ່າວ-ພາບ: ທູນທອງໃຈ, ໜັງສືພິມຈຳປາໃໝ່