ເມື່ອບໍ່ດົນມານີ້, ຫຼາຍຄົນກໍຄົງຈະເຫັນຕາມສື່ສັງຄົມອອນລາຍຕ່າງໆກ່ຽວກັບປະເດັນໜຸ່ມຈີນຄົນໜຶ່ງທີ່ຕ້ອງຈົບຊີວິດຂອງຕົນເອງລົງ, ເມື່ອບໍ່ສົມຫວັງກັບຄວາມຮັກ.
ເຊິ່ງເລີ່ມຈາກມີຜູ້ນຳໃຊ້ສື່ອອນລາຍທ່ານໜຶ່ງໄດ້ແປເນື້ອໃນເລື່ອງລາວຄວາມຮັກອັນບໍ່ສົມຫວັງຂອງໜຸ່ມຄົນໜຶ່ງ ຢູ່ປະເທດຈີນຄົນນີ້ໂດຍມີເນື້ອໃນເລົ່າວ່າ: ຜູ້ຊາຍຄົນນີ້ເປັນ ເກມເມີ (ນັກຫຼິ້ນເກມອາຊີບ) ລະດັບຊາດ, ລາວຮັບຈ້າງຫຼິ້ນເກມໃຫ້ຄົນອື່ນ ໂດຍເກັບຄັ້ງລະ20-50 ຢວນ ແລະ ລາວໄດ້ໄປຕົກຫຼຸມຮັກກັບຜູ້ຍິງຄົນໜຶ່ງ ທາງອອນລາຍ ທັງສອງຄົບກັນໄດ້ສອງປີ, ຜູ້ຍິງຄົນນັ້ນບອກກັບລາວວ່າ ຢາກໄດ້ເງິນ 510.000 ຢວນ ເພື່ອໄປເປີດຮ້ານດອກໄມ້, ຜູ້ຊາຍຍ້າຍຈາກຫູນ່ານ ໄປ ຊົງຊິງ, ເຊົ່າຫ້ອງຢູ່ໃກ້ໆກັບຜູ້ຍິງ ເພື່ອຈະໄດ້ຢູ່ໃກ້ຊິດກັນ, ຜູ້ຊາຍຫາເງີນໂດຍການຮັບຈ້າງຫຼິ້ນເກມເດືອນໜຶ່ງໄດ້ປະມານ 1-2 ໝື່ນຢວນ ເງິນທັງໝົດໄດ້ໂອນໃຫ້ແຟນໝົດ, ເຫຼືອປະໄວ້ແຕ່ໜ້ອຍດຽວຄ່າກິນເຂົ້າ ແຕ່ລະຄາບກິນບໍ່ເກີນ 10 ຢວນ, ເພື່ອປະຢັດເງິນໃຫ້ແຟນໄດ້ໃຊ້ ລາວໃຊ້ຊີວິດຢູ່ແບບນັ້ນ 6 ເດືອນໃນຫ້ອງເຊົ່າ, ເຊິ່ງກິນແຕ່ເບີເກີ ລາຄາບໍ່ເກີນ 10 ຢວນເທົ່ານັ້ນ, ລາວຫາເງິນດ້ວຍການຮັບຈ້າງຫຼິ້ນເກມຢ່າງໜັກ ບໍ່ຫຼັບບໍ່ນອນຈົນຮາກອອກເລືອດ, ຫົວໜ້າແນະນຳໃຫ້ໄປໂຮງຫມໍ ລາວບໍ່ຍອມໄປ ຍ້ອນບໍ່ມີເງິນ ເພາະປະຢັດໄວ້ໃຫ້ແຟນໃຊ້ຈ່າຍ, ຜູ້ຍິງຄົນນັ້ນເອົາບັດຂອງຜູ້ຊາຍຄົນນັ້ນໃຫ້ໝູ່ໃຊ້ເງິນນຳ, ເລື່ອງນີ້ຝ່າຍຊາຍໄດ້ຖາມວ່າ: ເປັນຫຍັງຕ້ອງເຮັດແບບນີ້, ຖ້າຜູ້ຍິງໃຊ້ເອງຈະບໍ່ວ່າຫຍັງ ແຕ່ອັນນີ້ໃຫ້ໝູ່ໃຊ້ນຳ ກໍເລີຍມີການຜິດຖຽງກັນ. ຜູ້ຍິງໃຫ້ຄວາມຫວັງ ແລະຕົວະວ່າເດືອນ 5 ນີ້ຈະໝັ້ນກັນ, ຝ່າຍຊາຍເລີຍຕັ້ງໃຈຫາເງິນ ພໍໃກ້ຮອດເດືອນ 5 ທີ່ຈະມານີ້ ຜູ້ຍິງກັບບ່າຍບ່ຽງແລ້ວຫາເລື່ອງເພື່ອຢາກເລີກລາ, ເພາະຜ່ານມາຫຼອກໃຊ້ເງິນຜູ້ຊາຍຄົນນີ້ຊື່ໆ, ຜູ້ຊາຍຄົນນີ້ຮັບບໍ່ໄດ້ເລີຍຕັດສິນໃຈ ໂດດຂົວເພື່ອຈົບຊີວິດຕົວເອງ, ກ່ອນຕາຍຜູ້ຊາຍຄົນນີ້ໄດ້ຊື້ຊໍ່ດອກໄມ້ 760 ດອກໄປໄວ້ໃຫ້ຜູ້ສາວ, ເພື່ອເປັນສັນຍາລັກວ່າ ມື້ນີ້ພວກເຂົາສອງຄົນຮູ້ຈັກກັນຄົບຮອດ 760 ມື້, ຜູ້ຊາຍຄົນນີ້ສົ່ງຂໍ້ຄວາມກ່ອນຕາຍວ່າ: ເຈົ້າກັບຫູ່ນ່ານນຳຂ້ອຍບໍ? ແຕ່ ຜູ້ຍິງນັ້ນ ບໍ່ຕອບ, ກ່ອນຕາຍຜູ້ຊາຍປ່ຽນຮູບໂປຣໄຟລເປັນຂ້ອຍບໍ່ຢາກກິນເບີເກີ 10 ຢວນແລ້ວ ຂ້ອຍຢາກກິນແມັກໂດໂນ (ເພາະຜູ້ຊາຍມັກກິນ ພວກອາຫານ Fastfood ຫຼາຍ) ກ່ອນໂດດຂົວ ລາວໂອນເງິນກ້ອນສຸດທ້າຍທີ່ມີໃຫ້ຜູ້ຍິງຄົນນັ້ນ 66.000 ຢວນ ໂດຍຂຽນວ່າ “ເຕັມໃຈໃຫ້”.
ຈາກເລື່ອງລາວຄວາມຮັກອັນທຸມເທ ຈົນກາຍເປັນເລື່ອງລາວອັນແສນເສົ້າ ແລະ ສະເທືອນໃຈໃນຄັ້ງນີ້ ໄດ້ຖືກເຜີຍແຜ່ລົງໃນສື່ສັງຄົມອອນລາຍ ພາໃຫ້ຫຼາຍໆຄົນໄດ້ຮູ້ຈັກ ແລະ ກ່າວເຖິງຢ່າງເປັນວົງກວ້າງ, ຫຼາຍໆຄົນຕ່າງກໍຮູ້ສຶກສົງສານ ແລະ ເຫັນໃຈຊາຍໜຸ່ມຄົນນີ້ທີ່ຍອມທຸ່ມເທທຸກຢ່າງເພື່ອຄົນຮັກ, ແຕ່ສຸດທ້າຍແລ້ວກັບບໍ່ໄດ້ຄວາມຮັກທີ່ຈິງໃຈຕອບກັບມາເລີຍ, ເຊິ່ງຊາວຈີນຫຼາຍຄົນຕ່າງກໍໄດ້ນຳດອກໄມ້, ອາຫານ ແລະ ເຄື່ອງດື່ມໄປວາງໄວ້ອາໄລຕາມຂົວທີ່ຊາຍຄົນນນັ້ນໂດດລົງນໍ້າເພື່ອຈົບຊີວິດຕົນເອງ, ເພື່ອເປັນການສະແດງເຖິງດວງວິນຍານຂອງລາວຮັບຮູ້ວ່າ ຍັງມີອີກຫຼາຍໆຄົນທີ່ຮັກລາວ ແລະ ຢາກໃຫ້ລາວສານຝັນຕົນເອງໃນການໄດ້ກິນເບີເກີທີ່ລາຄາແພງ ຕາມທີ່ລາວໄດ້ຕັ້ງໃຈໄວ້.
ເຫດການໃນຄັ້ງນີ້, ກໍຍັງເປັນອີກໜຶ່ງບົດຮຽນໃຫ້ແກ່ທຸກຄົນໃນເລື່ອງຊີວິດຮັກ, ການທຸ່ມເທຄວາມຮັກເປັນສິ່ງທີ່ດີ ແຕ່ເມື່ອທຸ່ມເທແລ້ວບ່ໍໄດ້ຮັບຄວາມຮັກຕອບກັບເລີຍ, ກໍຄວນຖອຍອອກມາ ແລະ ກ່ອນທີ່ຈະຄິດສັ້ນເພື່ອຈົບຊີວິດແມ່ນໃຫ້ຄິດເຖິງຄົນທີ່ຮັກເຮົາບໍ່ວ່າຈະເປັນພໍ່ແມ່,ອ້າຍເອື້ອຍນ້ອງ,ໝູ່ເພື່ອນ ຄົນອ້ອມຂ້າງທີ່ຍັງຮັກເຮົາຢູ່ ແລະ ສຳຄັນທີ່ສຸດແມ່ນກັນຫັນມາຮັກຕົນເອງຫຼາຍຂຶ້ນ.