ຈາກກໍລະນີທີ່ມີວີດີໂອກຸ່ມຄົນໂຍນບ້ວງເພື່ອຄ້ອງໃສ່ໂຕຍິງສາວ ທີ່ໄດ້ໂພສລົງໃນສື່ສັງຄົມອອນລາຍເມື່ອວັນທີ 14 ກຸມພາ ທີ່ຜ່ານມາ, ເມື່ອຫຼາຍຄົນໃນສັງຄົມເຫັນວີດີໂອດັ່ງກ່າວຕ່າງກໍເກີດສຽງວິພາກວິຈານ ແລະ ຕຳນິຕິຕຽນເຖິງຄວາມບໍ່ເໝາະສົມຢ່າງເປັນວົງກວ້າງ.

ຫຼ້າສຸດເມື່ອວັນທີ 16 ກຸມພາທີ່ຜ່ານມາ, ໂຮງແຮມດັ່ງກ່າວ ໄດ້ອອກມາຖະແຫຼງການເພື່ອຊີ້ແຈງກ່ຽວກັບເຫດການທີ່ເກີດຂຶ້ນວ່າ: ຂໍລາຍງານມາຍັງຫົວໜ້າພະແນກຕໍາຫຼວດທ່ອງທ່ຽວນະຄອນຫຼວງວຽງຈັນໃນວັນທີ 14 ເດືອນກຸມພາ ປີ 2024, ເວລາ 18:00 ໂມງ, ເລື່ອງກໍລະນີທີ່ມີຄິບບໍລິສັດຈັດກິດຈະກໍາ ເຜີຍແຜ່ອອກສູ່ສື່ສັງຄົມອອນລາຍຕ່າງໆທີ່ເຫັນວ່າ ມັນເປັນກິດຈະກໍາທີ່ຈັດອອກມານັ້ນບໍ່ຄ່ອຍເໝາະສົມທາງບໍລິສັດສ້າງກິດຈະກໍາກໍ່ເພື່ອສ້າງຄວາມມ່ວນຊື່ນເພື່ອຕ້ອນຮັບລູກຄ້າທີ່ມາໃຊ້ບໍລິການຢູ່ທາງຮ້ານຂອງພວກເຮົາເທົ່ານັ້ນ ແລະ ບ້ວງທີ່ໂຍນນັ້ນກໍ່ເປັນບ້ວງທີ່ເບົາເພາະກ່ອນຈະຈັດກິດຈະກໍາດັ່ງກ່າວນັ້ນທາງພະນັກງານເອງກໍໄດ້ທົດລອງກ່ອນແລ້ວ, ການກະທໍາດັ່ງກ່າວບໍ່ໄດ້ມີເຈດຕະນາຢ່າງອື່ນຖ້າຫາກມີຫຍັງທີ່ເຮັດຜິດພາດແບບນີ້ເກີດຂື້ນອີກກໍພ້ອມຮັບຟັງຮັບແນະນໍາຈາກທາງຂັ້ນເທິງເພື່ອແກ້ໄຂ້ບັນຫາດັ່ງກ່າວຕໍ່ໜ້າຈະບໍ່ໃຫ້ມີເລື່ອງລັກສະນະແບບນີ້. ດັ່ງນັ້ນ,ຈຶ່ງແຈ້ງມາຍັງທ່ານຮັບຊາບເພື່ອແກ້ໄຂບັນຫາດັ່ງກ່າວຕາມທາງທີ່ຄວນດ້ວຍ.

ທັງນີ້, ການຈັດກິດຈະກຳຖືວ່າເປັນເລື່ອງທີ່ດີ, ແຕ່ຜູ້ຈັດຕ້ອງໄດ້ຄຳນຶງເຖິງຮູບແບບ ແລະ ວິທີການຫຼີ້ນກິດຈະກຳນັ້ນໃຫ້ຮອບຄອບວ່າ ມີຄວາມສ້າງສັນ, ມີຄວາມເໝາະສົມ, ອັນຕະລາຍ ແລະ ກະທົບຫຍັງຫຼືບໍ່… ບໍ່ດັ່ງນັ້ນ, ກິດຈະກຳທີ່ສ້າງຂຶ້ນມາ ກໍຈະກາຍເປັນສິ່ງທີ່ບໍ່ຄວນເຮັດຫຼາຍກວ່າ.