ແຂວງຊຽງຂວາງ ຈັດກອງປະຊຸມ ຜ່ານແບບແຜນຫໍຫລັກເມືອງ ແລະ ປະຕູໂຂງຂອງແຂວງ ໃນວັນທີ 13 ກຸມພາ 2024 ໂດຍການເປັນປະ ທານຂອງ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ມີຫົວໜ້າ-ຮອງຫົວໜ້າພະແນກການ, ອົງການແລະ ວິຊາການທີ່ກ່ຽວຂ້ອງເຂົ້າຮ່ວມ.
ໂອກາດນີ້, ຜູ້ເຂົ້າຮ່ວມ ໄດ້ຮັບຊົມແບບຫໍຫຼັກເມືອງ ແລະ ປະຕູໂຂງຂອງແຂວງ, ພ້ອມທັງໄດ້ປະກອບຄຳຄິດຄຳເຫັນ ເພື່ອໃຫ້ຫໍຫຼັກເມືອງ ແລະ ປະຕູໂຂງຂອງແຂວງ ເໝາະສົມກັບຈຸດພິເສດຂອງແຂວງ ທາງວັດທະນະທຳ, ປະຫວັດສາດ, ມູນເຊື້ອພິລະອາດຫານ, ໄຫຫີນອັນລືຊື່ ແລະ ພູມສັນຖານຂອງແຂວງ.
ພ້ອມນີ້, ທ່ານເຈົ້າແຂວງ ກໍໄດ້ສະຫຼຸບຄວາມຄິດເຫັນ ແລະ ຕົກລົງເປັນເອກະພາບເອົາຮູບແບບປະຕູໂຂງຕາມແບບທີ່ສະເໜີມາ, ແຕ່ປ່ຽນແປງເລັກນ້ອຍບາງຈຸດ, ສ່ວນຫໍຫຼັກເມືອງແມ່ນຕົກລົງໃຫ້ແຕ້ມແບບຕື່ມອີກ, ເພື່ອໃຫ້ມີຫຼາຍແບບມາສົບທຽບກັນ ແລະ ສະເໜີປັບປຸງແບບເກົ່າໃນບາງຈຸດ ເພື່ອເອົາມາຜ່ານກອງປະຊຸມຕື່ມອີກໃນຕໍ່ໜ້າ ເພື່ອຄັດເລືອກເອົາແບບຫໍຫຼັກເມືອງໃຫ້ຄູ່ບ້ານຄູ່ເມືອງ, ເລືອກເອົາແບບທີ່ເໝາະສົມທີ່ສຸດ, ເນື່ອງຈາກສ້າງແລ້ວຈະເປັນບ່ອນ ກາບໄຫວ້ ສັກກາລະບູຊາ. ພ້ອມນີ້, ທ່ານຍັງຮຽກຮ້ອງມາຍັງພາກສ່ວນທີ່ກ່ຽວຂ້ອງຈົ່ງໃຊ້ຄວາມຮູ້ຄວາມສາມາດໃນການອອກແບບຄັດເລືອກໃຫ້ເໝາະສົມທີ່ສຸດ ແລະ ມີມູນຄ່າການກໍ່ສ້າງທີ່ເໝາະສົມ.
ຂ່າວ: ບຸນມີ ແສງທຸມມີ