ສຳນັກຂ່າວໄທລາຍງານໃນວັນທີ 15 ກຸມພາ 2024 ນີ້: ທ່ານໝໍ ມະນູນ ລີຊະເວັງວົງ ແພດສະເພາະທາງໂຣກລະບົບການຫາຍໃຈ ໂຮງໝໍ ວິໄຊຍຸທອນ ປະເທດໄທ ໄດ້ອອກມາແບ່ງປັນໂພສຮູປ ພ້ອມຂໍ້ຄວາມລະບຸວ່າ: ຜູ້ປ່ວຍຍິງອາຍຸ 38 ປີ ເປັນໂຣກເລືອດຈາງ ແລະ ເກັດເລືອດຕ່ຳ 6 ປີ ເຊິ່ງບໍ່ມີຢາປະຈຳ ແລະ ບໍ່ກິນເຫຼົ້າ-ສູປຢາ, ບໍ່ມີອາການໄຂ້, ບໍ່ມີອາການໄອ, ບໍ່ເມື່ອຍ ແລະ ນ້ຳໜັກບໍ່ຫຼຸດລົງ ແຕ່ຜົນກວດຮ່າງກາຍປະຈຳປີ ພົບເຫັນຈຸດນ້ອຍໆ ຈຳນວນຫຼາຍກະຈາຍທົ່ວປອດທັງ 2 ຂ້າງ.
ສ່ວນການກວດຮ່າງກາຍປົກກະຕິ, ການຟັງປອດປົກກະຕິ, ລະດັບອອກຊີແຊນໃນເລືອດປົກກະຕິ, ເຈາະເລືອດເມັດເລືອດແດງ ແລະ ເກັດເລືອດຕ່ຳເລັກນ້ອຍ, ຄ່າຕັບໄຕປົກກະຕິ, ຄ່າມະເຮັງທຸກໂຕປົກກະຕິ ແຕ່ເມື່ອໃຊ້ຄອມພິວເຕີກວດປອດ ແລະ ຊ່ອງທ້ອງ ພົບຈຸດນ້ອຍໆ ໃນປອດຂະນາດ 0.8 ຊັງຕີແມັດກະຈາຍໄປທົ່ວປອດ ແລະ ມີກ້ອນໃນຕັບຂະນາດ 3.4 ຊັງຕີແມັດ.
ທາງດ້ານແພດໄດ້ທຳການເຈາະຊິ້ນສ່ວນໃນຕັບ ມາຍ້ອມ ແລະ ເພາະເຊື້ອ ແຕ່ບໍພົບເຊື້ອລາ ແລະ ເຊື້ອວັນນະໂຣກ ແຕ່ໄດ້ທຳການສົ່ງຊິ້ນສ່ວນໄປກວດຢູ່ພະແນກ ພະຍາດວິທະຍາ ແລະໄດ້ພົບ Epithelioid hemangioendothelioma ເປັນເນື້ອງອກ ຈັດເປັນມະເຮັງທີ່ຫາຍາກ ເຊິ່ງເປັນມະເຮັງຂອງເຊວທີ່ຢູ່ດ້ານໃນຂອງລອດເລືອດ ທີ່ພົບນ້ອຍທີ່ສຸດ ອາດເກີດກັບຄົນ 1 ໃນລ້ານ.
ທັງນີ້, ແພດຍັງໄດ້ຕິດຕາມຜູ້ປ່ວຍຢ່າງໃກ້ຊິດຕໍ່ໄປ ຖ້າຜູ້ປ່ວຍເລີ່ມມີອາການ ແພດຈະພິຈະລະນາມຸ້ງເນັ້ນໃນການຮັກສາ.