ສຳນັກຂ່າວ ເອເອັຟພີ ລາຍງານໃນວັນທີ 15 ກຸມພາ 2024 ນີ້ກ່ຽວກັບຄວາມຄືບໜ້າສະຖານະການສະເທືອນຂວັນໃນລັດແຄນຊັດ ສະຫະລັດອາເມຣິກາ ຫຼັງເກີດເຫດການກາດຍິງ ຂະບວນການສະເຫຼີມສະຫຼອງໄຊຊະນະຂອງທີມ ແຄນຊັດ ຊີຕີ້ ຊິບ ທີ່ຄວ້າແຊ້ມຊູເປີໂບ ໃນການແຂ່ງຂັນຊິງແຊ້ມອາເມຣິກັນຟຸດບອນ ຄັ້ງທີ 58 ໃນ ວັນພຸດ ທີ 14 ກຸມພາ 2024 ຜ່ານມາ.
ເຫດການດັ່ງກ່າວ ເຮັດໃຫ້ມີຜູ້ເສຍຊີວິດຢ່າງນ້ອຍ 1 ຄົນ ແລະ ບາດເຈັບອີກ 21 ຄົນ ໃນຈຳນວນນີ້ມີ 7 ຄົນອາການສາຫັດ ແລະ ເຈົ້າໜ້າທີ່ໄດ້ນຳຕົວສົ່ງໂຮງໝໍເປັນທີ່ຮຽບຮ້ອຍແລ້ວ ຂະນະດຽວກັນເຈົ້າໜ້າທີ່ໄດ້ຈັບກຸມຕົວຜູ້ຕ້ອງສົງໃສໄດ້ແລ້ວ 3 ຄົນ ແລະ ຢູ່ໃນລະຫວ່າງການສອບສວນຂອງເຈົ້າໜ້າທີ່ເພື່ອຫາສາເຫດ ແລະ ແຮງຈູງໃຈໃນການລົງມືກໍ່ເຫດ.
ກ່ອນໜ້ານີ້ໃນການແຂ່ງຂັນຮອບຊິງຊະນະເລີດອາເມຣິກັນຟຸດບອນ NFL ທີ່ສະໜາມ ອັນລີຈຽນ ສະເຕດ້ຽມ ໃນລັດເນວາດ້າເມື່ອວັນທີ 11 ກຸມພາ 2024 ຜ່ານມາ, ລະຫວ່າງທີມ ແຄນຊັດ ຊິຕີ້ ຊິບ ແຊ້ມເກົ່າພົບກັບ ຊານຟານຊີສໂກ ອະດີດແຊ້ມ 5 ສະໄໝ ເຊິ່ງເປັນທາງ ແຄນຊັດ ຊິຕີ້ ຊິບ ສາມາດເອົາຊະນະໄດ້ໃນຊ່ວງຕໍ່ເວລາພິເສດດ້ວຍຄະແນນ 25 ຕໍ່ 22 ສາມາດຄວ້າແຊ້ມໄດ້ເປັນສະໄໝທີ 4.