ສຳນັກຂ່າວຕ່າງປະເທດລາຍງານໃຫ້ຮູ້ວ່າ: ເມື່ອວັນທີ 18 ມັງກອນທີ່ຜ່ານມາເກີດເຫດເຮືອຂ້າມຟາກລຳໜຶ່ງ ຫຼົ້ມລົງໃນທະເລສາບຮານີ (Harni Lake) , ເມືອງວາໂດດາຣາ (Vadodara) , ລັດຄຸຊະຣາດ, ປະເທດອິນເດຍ, ເຊິ່ງເປັນຂະບວນໂດຍສານ ຂອງນັກຮຽນ ແລະ ຄູອາຈານທີ່ກຳລັງພາກັນໄປທັດສະນະສຶກສາ.
ທ່ານ ອະນຸພຳ ສິງ ເກລັອດ ເຈົ້າໜ້າທີ່ຕຳຫຼວດເມືອງດັ່ງກ່າວໄດ້ໃຫ້ຮູ້ວ່າ: ອຸບັດຕິເຫດທີ່ເກີດຂຶ້ນແມ່ນມີຜູ້ເສຍຊີວິດແລ້ວ 12 ຄົນ, ເປັນນັກຮຽນ 10 ຄົນແລະ ຄູອາຈານ 2 ຄົນ, ໃນຂະນະນີ້ເຈົ້າໜ້າທີ່ກຳລັງທຳການສືບສວນຫາສາເຫດທີ່ເຮັດໃຫ້ເຮືອລຳ ດັ່ງກ່າວຫຼົ້ມກາງທະເລສາບ, ແຕ່ຈາກການສືບສວນເບື້ອງຕົ້ນໃຫ້ຮູ້ວ່າ ຜູ້ໂດຍສານທັງໝົດແມ່ນບໍ່ໄດ້ມີການໃສ່ເສື້ອຊູຊີບໃນຂະນະທີ່ຢູ່ໃນເຮືອລຳດັ່ງກ່າວ.ເຮືອລຳນີ້ໄດ້ມີຜູ້ໂດຍສານທັງໝົດປະມານ 27 ຄົນ, ເຊິ່ງເຈົ້າໜ້າທີ່ສາມາດຊ່ວຍເຫຼືອຜູ້ປະສົບເຫດ ໄດ້ຈຳນວນ 7 ຄົນ ແລະ ນຳສົ່ງໂຮງໝໍທີ່ໃກ້ຄຽງໂດຍດ່ວນ.