ໃນທ້າຍອາທິດທີ່ຜ່ານມາ, ກອງບັນຊາການ ປກສ ເມືອງອຸທຸມພອນ ແຂວງສະຫວັນນະເຂດ ໄດ້ສຶກສາອົບຮົມ ກຸ່ມເປົ້າໝາຍໄວໜຸ່ມ ທີ່ຂັບຂີ່ລົດໄວ ໃຊ້ສຽງດັງໃນຢາມກາງຄືນ ແລະ ຍຶດລົດ 18 ຄັນ ທີ່ດັດແປງສະພາບເຕັກນິກລົດໂດຍການເຂົ້າຮ່ວມຂອງທ່ານ ພັນໂທ ສາຄອນ ສີສຸກ ຮອງຫົວໜ້າກອງບັນຊາການ ປກສ ເມືອງ ມີບັນດາຄະນະພະແນກວິຊາການ ນັກຂັບຂີ່ ພ້ອມທັງຜູ້ປົກຄອງເຂົ້າຮ່ວມ.

ທ່ານ ພັນຕີ ຄຳຕັນ ຮຽນໄຊບຸນຍະເລດ ຮອງຫົວໜ້າພະແນກກອງບັນຊາການ ປກສ ເມືອງ ໄດ້ຍົກໃຫ້ເຫັນບາງມາດຕາຂອງກົດໝາຍວ່າດ້ວຍການສັນຈອນທາງບົກ ກ່ຍວກັບມາດຕະການຕໍ່ຜູ້ລະເມີດກົດລະບຽບການສັນຈອນທີ່ດັດແປງ ສະພາບເຕັກນິກໃຊ້ສຽງດັງກວນເມືອງເກີນຂອບເຂດ ບໍ່ໃສ່ໝວກກັນກະທົບ ໃນເວລາຂັບຂີ່ລົດ ໃຊ້ເສັ້ນທາງຫຼວງທີ່ຖືກຕ້ອງ ແລະ ບັນຫາອື່ນໆ

ສຳລັບໄວໜຸ່ມທີ່ມາສຶກສາອົບຮົມໃນຄັ້ງນີ້ແມ່ນຢາກໃຫ້ຮູ້ຈັກລບະບຽບກົດໝາຍຂອງການຂັບຂີ່ ລົດຕາມທ້ອງທະໜົນຫຼວງ ຮູ້ຈັກກົດລະບຽບຂອງຈະລາຈອນ ພ້ອມທັງຮຽກຮ້ອງໃຫ້ພໍ່ແມ່ຜູ້ປົກຄອງຕ້ອງໄດ້ເອົາໃຈໃສ່ຕິດຕາມລູກຫຼານຂອງຕົນ, ບໍ່ໃຫ້ໄປດຶກດືນ ບໍ່ໃຫ້ມີການຂັບລົດໄວ ໃຊ້ສຽງດັງທີ່ສ້າງຄວາມລົບກວນໃຫ້ຜູ້ອື່ນ ສ່ວນລົດທີ່ເຈົ້າໜ້າທີ່ກັກມາໃນຄັ້ງນີ້ມີທັງໝົດ 18 ຄັນ ໃນນີ້ມີດັດແປງສະພາບເຕັກນິກປະກອບມີ : ຢາງນ້ອຍ, ທໍ່ດັງ, ໃຊ້ສຽງດັງເກີນຂອບເຂດ ພ້ອມນີ້ຈຶ່ງຮຽກຮ້ອງມາຍັງທຸກພາກສ່ວນຈົ່ງເອົາໃຈໃສ່ ການປະຕິບັດລະບຽບ ແລະ ເປັນເຈົ້າການໃຫ້ພໍແມ່ຜູ້ປົກຄອງເອົາໃຈໃສ່ ສຶກສາອັບຮົມລູກຫຼານຂອງຕົນ ແລະ ນັກຂັບຂີ່ແຕ່ລະຄົນໃຫ້ເຂົ້າໃຈ ທັງປະຕິບັດຢ່າງເຂັ້ມງວດ ພ້ອມທັງເຮັດບົດບັນທຶກ ກັບພໍ່ແມ່ຜູ້ປົກຄອງ ແລະ ອຳນາດການປົກຄອງຕື່ມອີກ.