ບໍລິສັດທາງລົດໄຟລາວ-ຈີນ ຈັດຊື້ລົດໄຟ EMU ເພີ່ມອີກຫນຶ່ງ 1 ຂະບວນ, ຄາດວ່າຈະເດີນທາງມາເຖີງ ສປປ ລາວ ໃນໄວໆ ນີ້.
ທ່ານ ອານົງເດດ ເພັດໄກສອນ, ຮອງຜູ້ອໍານວຍການບໍລິສັດທາງລົດໄຟລາວ-ຈີນ ໃຫ້ສໍາພາດຕໍ່ສື່ມວນຊົນລາວ- ຈີນ ໃນວັນທີ 20 ກັນຍາ 2023 ທີ່ສະຖານີລົດໄຟຫລວງພະບາງ ວ່າ: ລົດໄຟ EMU ທີ່ຈັດຊື້ມາໃຫມ່ນີ້ ເພື່ອເອົາມາຮອງຮັບການຂົນສົ່ງໂດຍສານ ທັງສາຍພາຍໃນ ແລະສາຍສາກົນ ເພື່ອຮອງຮັບການເພີ່ມຂື້ນຂອງຜູ້ໂດຍສານ ໂດຍສະເພາະໃນໂອກາດປີທ່ອງທ່ຽວລາວ 2024 ທີ່ຈະມາເຖີງນີ້.

ປັດຈຸບັນ ບໍລິສັດທາງລົດໄຟລາວ-ຈີນ ບໍລິການລົດໄຟໂດຍສານທັງຫມົດ ຈໍານວນ 5 ຂະບວນຂະບວນຕໍ່ວັນ, ໃນນີ້ ມີຂະບວນ EMU ຈໍານວນ 4 ຂະບວນ ແລະ ອີກ 1 ຂະ ບວນແມ່ນຂະບວນທໍາມະດາ.

ອິງຕາມຂໍ້ມູນຈາກບໍລິສັດທາງລົດໄຟລາວ-ຈີນ, ນັບແຕ່ມື້ເປີດນໍາໃຊ້ລົດໄຟ ລາວ – ຈີນ ມາຮອດ ວັນທີ 17 ກັນຍາ 2023 ໄດ້ຂົນສົ່ງຜູ້ໂດຍສານທັງຫມົດຈຳນວນ 3.197.600 ຄົນ, ສະເລ່ຍ 4.889ຄົນ/ມື້ ແລະ ສະຖິຕິສູງ ສຸດ 10.197ຄົນ/ມື້.
ໃນນີ້ ສະເພາະພາຍໃນປີ 2023 ມາຮອດວັນທີ 17 ກັນ ຍານີ້ ສາມາດຂົນສົ່ງໂດຍສານໄດ້ຈຳນວນ 1.759.900 ເທື່ອຄົນ ເພີ່ມຂຶ້ນ 103,7% ເມື່ອທຽບໃສ່ໄລຍະດຽວກັນຂອງປີ 2022, ຂົນສົ່ງໂດຍສານສະເລ່ຍ 6.768 ຄົນ/ມື້. ໃນນີ້ນັບແຕ່ໄດ້ເປີດບໍລິການຂະບວນລົດໄຟຂ້າມແດນນັບແຕ່ວັນທີ 13 ເມສາ 2023 ເປັນຕົ້ນມາ ໄດ້ຂົນສົ່ງຜູ້ໂດຍ ສານຂ້າມແດນບັນລຸໄດ້ 61.698 ຄົນ. ໃນນັ້ນຈຳນວນຜູ້ໂດຍສານເດີນທາງອອກນອກປະເທດ ຈຳນວນ 31.781ຄົນ, ສະເລ່ຍ 201 ຄົນ/ມື້ ແລະ ຜູ້ໂດຍສານທີ່ເດີນທາງເຂົ້າມາລາວຈຳນວນ 29.917 ຄົນ, ສະເລ່ຍ 190 ຄົນ/ມື້.

ທີ່ມາ: ວິທະຍຸກະຈາຍສຽງແຫ່ງຊາດລາວ