spot_img
Homeຂ່າວພາຍ​ໃນກວດພົບເຫັນອາຫານແຊ່ແຂງຫຼາຍລາຍການທີ່ໝົດອາຍຸຢູ່ສະບານເມືອງໄຊ ແຂວງອຸດົມໄຊ

ກວດພົບເຫັນອາຫານແຊ່ແຂງຫຼາຍລາຍການທີ່ໝົດອາຍຸຢູ່ສະບານເມືອງໄຊ ແຂວງອຸດົມໄຊ

Published on

ວັນທີ 17 ກໍລະກົດນີ້ ເຈົ້າໜ້າທີ່ກວດກາການຄ້າ ພະແນກອຸດສາຫະກໍາ ແລະ ການຄ້າແຂວງອຸດົມໄຊ ໄດ້ລົງເຄື່ອນໄຫວຕິດຕາມ ກວດກາ ການກຳນົດລາຄາ ແລະ ວາງຈຳໜ່າຍສິນຄ້າ ໂດຍສະເພາະແມ່ນປະເພດອາຫານແຊ່ແຂງທີ່ນຳເຂົ້າຈາກຕ່າງປະເທດຢູ່ 2 ຕະຫຼາດຄື: ຕະຫຼາດໜອງແມງດາ ແລະ ຕະຫຼາດໜອງແລ້ງ.

ຜ່ານການລົງກວດກາຕົວຈິງພົບວ່າ ມີອາຫານປະເພດຮອນດ໋ອກ, ໄສ້ອົ່ວ, ຕິນໄກ່ ແລະ ເຕົາຫູ້ ລວມມູນຄ່າທັງໝົດເກືອບ 3 ລ້ານກີບ ທີ່ແມ່ຄ້ານໍາມາວາງຈໍາໜ່າຍ ຈໍານວນໜຶ່ງໝົດອາຍຸການບໍລິໂພກແລ້ວ ແລະ ຈຳນວນໜຶ່ງເຫັນວ່າບໍ່ມີສະຫຼາກກຳນົດສິນຄ້າ. ຕໍ່ກັບບັນຫາດັ່ງກ່າວ ທາງເຈົ້າໜ້າທີ່ກວດກາການຄ້າແຂວງ ກໍໄດ້ຍຶດເອົາສິນຄ້າຈຳນວນດັ່ງກ່າວ ເພື່ອນຳໄປທຳລາຍຖິ້ມ ບາງລາຍການແມ່ນໄດ້ທຳລາຍກັບທີ່ ພ້ອມທັງໄດ້ສ້າງບົດບັນທຶກກັບເຈົ້າຂອງຮ້ານເພື່ອເປັນການຕັກເຕືອນ ຖ້າຫາກຍັງມີການລະເມີດຄັ້ງຕໍ່ໄປແມ່ນຈະໄດ້ປະຕິບັດຕາມລະບຽບກົດໝາຍ.

ທ່ານ ນາງ ໄມພອນ ສີລິວົງ ຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊໃຫ້ສຳພາດວ່າ ການລົງເຄື່ອນໄຫວຕິດຕາມລາຄາ ແລະ ກວດກາສິນຄ້າແມ່ນເປັນວຽກປົກກະຕິຂອງເຈົ້າໜ້າທີ່ກວດກາການຄ້າ ເພື່ອແນໃສ່ປົກປ້ອງຜູ້ບໍລິໂພກສິນຄ້າໃຫ້ມີຄວາມປອດໄພ ແລະ ໄດ້ຊົມໃຊ້ລາຄາທີ່ເໝາະສົມ.

ໂອກາດດັ່ງກ່າວ ທ່ານ ນາງ ໄມພອນ ສີລິວົງ ໄດ້ຮຽກຮ້ອງມາຍັງຜູ້ປະກອບການໃນການແກ້ໄຂສະພາບຄວາມຫຍຸ້ງຍາກຄືແນວນີ້ ການທີ່ນຳເຂົ້າສິນຄ້າມາວາງຈຳໜ່າຍ ໂດຍສະເພາະແມ່ນປະເພດສິນຄ້າທີ່ນຳເຂົ້າມາຈາກຕ່າງປະເທດໃຫ້ເປັນເຈົ້າການນຳກັນໃນການກວດກາຄຸນນະພາບສິນຄ້າ ໂດຍສະເພາະແມ່ນກວດກາອາຍຸການບໍລິໂພກຕ່າງໆຢ່າງລະອຽດ ຖ້າຫາກພົບເຫັນສິນຄ້າທີ່ໝົດອາຍຸ ຫຼື ບໍ່ມີສະຫຼາກກຳນົດສິນຄ້າແມ່ນບໍ່ຄວນນຳມາຈຳໜ່າຍໃຫ້ແກ່ລູກຄ້າ ພ້ອມນີ້ ຜູ້ບໍລິໂພກກໍເຊັ່ນດຽວກັນ ເວລາຊື້ກໍຕ້ອງກວດເບິ່ງອາຍຸການບໍລິໂພກເຊັ່ນດຽວກັນ ຖ້າໃກ້ໝົດອາຍຸ ຫຼື ໝົດອາຍຸແລ້ວແມ່ນບໍ່ຄວນນຳມາບໍລິໂພກ ເຊິ່ງອາດຈະເຮັດໃຫ້ອາຫານເປັນພິດຕໍ່ຕົນເອງ ແລ້ວຈະເກີດຜົນເສຍຫຼາຍຢ່າງຕາມມາ.

ຕໍ່ກັບອາຫານທີ່ຍຶດມານັ້ນ ມາໃນວັນທີ 18 ກໍລະກົດ 2023 ທາງເຈົ້າໜ້າທີ່ກວດກາການຄ້າແຂວງ ໄດ້ນຳໄປຈູດທຳລາຍຖີ້ມ.

ແຫຼ່ງຂ່າວ ສະຖານີວິທະຍຸ ແລະ ໂທລະພາບ ແຂວງອຸດົມໄຊ

ບົດຄວາມຫຼ້າສຸດ

ປະຫວັດຫຍໍ້ຂອງ ສະຫາຍ ພົນເອກ ຄຳໄຕ ສີພັນດອນ

ສະຫາຍ ພົນເອກ ຄຳໄຕ ສີພັນດອນ ເກີດເມື່ອວັນທີ 8 ກຸມພາ 1924 ທີ່ບ້ານຫົວໂຂງພະໃຫຍ່, ເມືອງໂຂງ, ແຂວງສີທັນດອນ (ແຂວງຈຳປາສັກ ໃນປັດຈຸບັນ), ເປັນບຸດ...

ອາຊີບຕ້ອງຫ້າມ! ຕຳຫຼວດໄທວາງແຜນຈັບໜຸ່ມລາວ ຂັບລົດຈັກຮັບຈ້າງ ຍາດອາຊີບຄົນໄທ

ເຈົ້າໜ້າທີ່ຕຳຫຼວດໄທ ວາງແຜນຈັບໜຸ່ມລາວ ຍາດອາຊີບຄົນໄທ ຂັບລົດຈັກຮັບຈ້າງ ບໍລິເວນເຂດຫ້ວຍຂວາງ ກຸງເທບມະຫານະຄອນ ປະເທດໄທ. ສຳນັກຂ່າວໄທລາຍງານໃນວັນທີ 1 ເມສາ 2025 ຜ່ານມາ, ເຈົ້າໜ້າທີ່ຕຳຫຼວດໄທໄດ້ຮັບແຈ້ງຈາກສາຍຂ່າວ ກ່ຽວກັບເບາະແສວ່າ: ມີຊາຍຄ້າຍຄືກັບແຮງງານຕ່າງດ້າວ...

ທຳລາຍໃຫ້ໝົດ! ພະແນກ ອຄ ແຂວງຄຳມ່ວນ ທຳລາຍສິນຄ້າລະເມີດກົົດໝາຍ ມູນຄ່າ ເກືອບ 300 ລ້ານ ກວ່າກີບ

ພະແນກອຸດສາຫະກຳ ແລະ ການຄ້າແຂວງຄຳມ່ວນ ທຳລາຍສິນຄ້າທີ່ລະເມີດກົດໝາຍ, ລະບຽບການດ້ານການຄ້າ ແລະ ສິນຄ້ານອກລະບົບທີ່ອາຍັດມາໄດ້ໃນໄລຍະປີ 2024-2025 ຜ່ານມາ. ໃນຕອນບ່າຍວັນທີ 1 ເມສາ 2025 ຢູ່ທີ່ພະແນກອຸດສາຫະກໍາ ແລະ...

ສະຫະລັດອາເມລິກາ ປະກາດຈະເກັບພາສີນຳເຂົ້າພື້ນຖານ 10%

ທ່ານ ໂດນັລ ທຣຳມ ປະທານາທິບໍດີ ສະຫະລັດອາເມລິກາ ປະກາດຈະເກັບພາສີນຳເຂົ້າ 10% ສຳລັບສິນຄ້ານຳເຂົ້າທັງໝົດທີ່ເຂົ້າສູ່ສະຫະລັດ ສຳນັກຂ່າວຕ່າງປະເທດລາຍງານ ໃນວັນທີ 2 ເມສາ 2025 ນີ້, ທ່ານ...