ຈາກກໍລະນີ ລົດໃຫຍ່ ຍີ່ຫໍ້ຟໍຈູນເນີ້ສີເທົາ ເກີດອຸບັດເຫດຕຳກັບລົດໃຫຍ່ອີກ 2 ຄັນ ທີ່ຖະໜົນສຸພານຸວົງ ເມືອງຈັນທະບູລີ ນະຄອນຫຼວງວຽງຈັນ.
ພັທ ພອນໃຈ ພາມຸງຄຸນ ຮອງຫົວໜ້າກອງບັນຊາການປ້ອງກັນຄວາມສະຫງົບເມືອງຈັນທະບູລີ ໄດ້ໃຫ້ສຳພາດໃນລາຍການ ວາລະແຫ່ງຊາດການແກ້ໄຂບັນຫາຢາເສບຕິດ ວ່າ: ໃນວັນທີ 15 ມິຖຸນາ 2023 ເວລາປະມານ 00:00 ໂມງ ທີ່ຜ່ານມາ, ທາງເຈົ້າໜ້າທີ່ຕຳຫຼວດຈະລາຈອນໄດ້ຮັບແຈ້ງຈາກປະຊາຊົນວ່າ: ມີອຸບັດເຫດເກີດຂຶ້ນ ແລະ ເຈົ້າໜ້າທີ່ກໍໄດ້ລົງໄປກວດກາສະຖານທີ່ຕົວຈິງ ໄດ້ພົບເຫັນຢາເສບຕິດ ປະເພດຢາບ້າຢູ່ໃນລົດ ຈຳນວນ 28 ເປົາ, ນ້ຳໜັກລວມ 559 ກິໂລກຣາມ, ມີທັງໝົດ 5.494.000 ເມັດ, ສ່ວນຜູ້ຂັບຂີ່ແມ່ນໄດ້ເອົາຕົວຫຼົບໜີ.
ພາຍຫຼັງທາງເຈົ້າໜ້າທີ່ຈະລາຈອນພົບເຫັນ ກໍໄດ້ປະສານງານສົມທົບກັບ ກົມວິຊາສະເພາະ ແລະ ພະແນກການວິຊາສະເພາະທີ່ກ່ຽວຂ້ອງ ເພື່ອຮ່ວມກັນເຄື່ອນໄຫວຊອກຫາກຸ່ມດັ່ງກ່າວ, ປັດຈຸບັນແມ່ນຈັບກຸ່ມເປົ້າໝາຍໄດ້ຈຳນວນໜຶ່ງ ແລະ ຍັງຢູ່ໃນຂັ້ນຕອນການສືບສວນຂອງເຈົ້າໜ້າທີ່ຫາກຸ່ມດັ່ງກ່າວຕໍ່ໄປ.
—–
Cr. ໂທລະພາບນະຄອນຫຼວງ