ຜູ້ເຄາະຮ້າຍ ອາຍຸ 32 ປີ ປະຊາຊົນເມືອງເລົ່າງາມ ແຂວງສາລະວັນ ໄດ້ພົບກັບຄອບຄົວເປັນຄັ້ງທຳອິດ ໃນຮອບ 17 ປີ ພາຍຫຼັງທີ່ຕົກເປັນເຫຍື່ອຂອງນາຍໜ້າຄ້າແຮງງານລາວ-ໄທ ຕົວະໄປເຮັດວຽກຢູ່ບາງກອກ ປະເທດໄທ ຕັ້ງແຕ່ອາຍຸຍັງບໍ່ທັນຮອດ 15 ປີ ຢູ່ໃນເຮືອນຫຼັງໜຶ່ງ ໃນຖານະເປັນຄົນໃຊ້ ຢູ່ປະເທດໄທ ໂດຍທີ່ນາຍຈ້າງບໍ່ໄດ້ໃຫ້ຄ່າຈ້າງເລີຍ.
ໃນວັນທີ 23 ພຶດສະພາ 2023 ທີ່ດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ: ທາງການໄທໄດ້ສົ່ງມອບຕົວເຫຍື່ອຂອງນາຍໜ້າຄ້າແຮງງານ ໃຫ້ກັບເຈົ້າໜ້າທີ່ຂອງແຂວງຈຳປາສັກ ແລະ ແຂວງສາລະວັນ, ພ້ອມນີ້ ທາງການໄທກໍໄດ້ມອບເງິນຊ່ວຍເຫຼືອໃນການດຳເນີນຄະດີ ແລະ ຈາກການປັບໄໝນາຍຈ້າງ ຈຳນວນ 180.000 ບາດ ໃຫ້ຜູ້ກ່ຽວນຳໄປໃຊ້ສ້າງຊີວິດໃໝ່ ຢູ່ບ້ານເກີດ.
ຕາງໜ້າກົມສະຫວັດດີການ ແລະ ຄຸ້ມຄອງແຮງງານ ບາງກອກ ປະເທດໄທ ໄດ້ໃຫ້ສຳພາດວ່າ: ທາງການໄທກໍໄດ້ປະສານງານກັບສຳນັກງານສະວັດດີການແຂວງອຸບົນ ເພື່ອໃຫ້ເປັນໂຕແທນ ມອບເງິນທີ່ໄດ້ຮຽກຮ້ອງຈາກນາຍຈ້າງ ຈຳນວນ 180.000 ບາດ ເຊິ່ງນາຍຈ້າງກໍເອົາເງິນມາຈ່າຍ ເພື່ອສົ່ງມອບໃຫ້ກັບລູກຈ້າງ.
ການຊ່ວຍເຫຼືອໄດ້ເກີດຂຶ້ນໃນວັນທີ 13 ມີນາ 2023 ໂດຍເຈົ້າໜ້າທີ່ຈາກພາກສ່ວນແຮງງານຈາກ ສປປ ລາວ, ອົງການສາກົນ ແລະ ຕຳຫຼວດ ໄດ້ນຳໝາຍຄົ້ນ ເພື່ອໄປຊ່ວຍລູກຈ້າງຢູ່ໃນເຮືອນທີ່ເຮັດວຽກຢູ່ ຫຼັງຈາກເຈົ້າໜ້າທີ່ໄທໄດ້ຮັບແຈ້ງຈາກຍາດພີ່ນ້ອງຜູ້ເຄາະຮ້າຍທີ່ຢູ່ ສປປ ລາວ ວ່າ ຜູ້ກ່ຽວໄດ້ເຮັດວຽກຢູ່ເຮືອນຫຼັງດັ່ງກ່າວເປັນເວລາດົນແລ້ວ ນາຍຈ້າງບໍ່ໃຫ້ຄ່າຈ້າງ ແລະ ບໍ່ສາມາດອອກຈາກເຮືອນຫຼັງນັ້ນໄດ້ ນອກຈາກຈະຖືກຕົວະໄປເຮັດວຽກຢູ່ໄທແຕ່ຍັງນ້ອຍແລ້ວ ກໍຍັງຖືກກັກຕົວຢູ່ແຕ່ໃນເຮືອນຕະຫຼອດໄລຍະ 17 ປີ.
ເຖິງຢ່າງໃດກໍຕາມ ປັດຈຸບັນ ຜູ້ເຄາະຮ້າຍຄົນດັ່ງກ່າວກໍໄດ້ກັບຄືນປະເທດແລ້ວ ແຕ່ມູນນິທິເຄືອຄ່າຍສົ່ງເສີມ ຄຸນນະພາບຊີວິດແຮງງານ ທີ່ມີສ່ວນສຳຄັນໃນການຊ່ວຍເຫຼືອໃນຄັ້ງນີ້ກໍຍັງມີຄວາມເປັນຫ່ວງຕໍ່ກັບການໃຊ້ຊີວິດຂອງຜູ້ເຄາະຮ້າຍຄົນນີ້ ຍ້ອນຜູ້ກ່ຽວໄດ້ຖືກພາມາເຮັດວຽກແຕ່ຍັງນ້ອຍ ແລະ ຖືກກັກບໍ່ໃຫ້ອອກໄປໃສ ບໍ່ເຄີຍຈັບເງິນ ຈຶ່ງຕ້ອງກັງວົນເລື່ອງການປັບຕົວເມື່ອຢູ່ກັບສັງຄົມ.
ແຫຼ່ງຂ່າວ RFA Lao