WMO ເຕືອນປາກົດການ “ເອວນິໂຢ່” ກຳລັງຈະກັບມາ ໃຫ້ໂລກກຽມພ້ອມຮັບມືກັບສະພາບອາກາດທີ່ຈະຮ້ອນຂຶ້ນ.

ອົງການອຸຕຸນິຍົມວິທະຍາໂລກ (WMO) ອົງກອນໜຶ່ງຂອງສະຫະປະຊາຊາດເປີດເຜີຍວ່າ ມີ 60% ທີ່ຈະເກີດປາກົດການ ເອວນິໂຢ່ (El Niño) ບໍ່ເກີນເດືອນກໍລະກົດນີ້ ແລະ ມີ 80% ທີ່ຈະເກີດເອວນິໂຢ່ບໍ່ເກີນເດືອນກັນຍາ.

“ເອວນິໂຢ່” ເປັນຮູບແບບສະພາບອາກາດທີ່ກ່ຽວຂ້ອງກັບອຸນຫະພູມເພີ່ມຂຶ້ນສູງທົ່ວໂລກ ລວມທັງຄວາມແຫ້ງແລ້ງທີ່ຈະເກີດຂຶ້ນໃນບາງສ່ວນຂອງໂລກ ແລະ ເກີດຝົນຕົກໜັກໃນບາງສ່ວນຂອງໂລກເຊັ່ນກັນ.

ເພັດເທລີ ທາລາສ (Petteri Taalas) ເລຂາທິການ WMO ລະບຸວ່າ ໂລກຄວນກຽມພ້ອມສຳລັບການພັດທະນາຂອງປາກົດການເອວນິໂຢ່ ທີ່ມັກກ່ຽວຂ້ອງກັບວາມຮ້ອນ ຄວາມແຫ້ງແລ້ງ ຫຼື ປະລິມານນ້ຳຝົນທີ່ເພີ່ມຂຶ້ນໃນສ່ວນຕ່າງໆຂອງໂລກ ອາດບັນເທົາໄພແຫ້ງແລ້ວໃນ Horn of Africa ແລະ ຜົນກະທົບອື່ນໆ ແຕ່ກໍກະຕຸ້ນໃຫ້ເກີດສະພາບອາກາດທີ່ຮຸນແຮງຂຶ້ນ ເຊິ່ງສິ່ງນີ້ໄດ້ເນັ້ນຍ້ຳເຖິງຄວາມຈຳເປັນ ໃນການເລີ່ມຄຳເຕືອນລ່ວງໜ້າເພື່ອໃຫ້ຄົນປອດໄພ.