ແຂວງສາລະວັນ ໄດ້ຮັບທຶນກໍ່ສ້າງໂຮງໝໍນ້ອຍ ຢູ່ບ້ານຄຳທອງ ເມືອງເລົ່າງາມ ແຂວງສາລະວັນ ໃນມູນຄ່າ 87 ພັນໂດລາສະຫະລັດ, ໂດຍໄດ້ຮັບທຶນຊ່ວຍເຫຼືອລ້າຈາກລັດຖະບານຢິ່ປຸ່ນ, ໃນໂຄງການເສີມສ້າງຄວາມໝັ້ນຄົງຂອງມະນຸດ ໃນຂັ້ນຮາກຖານປີ 2022, ໂຄງການກໍ່ສ້າງໂຮງໝໍນ້ອຍດັ່ງກ່າວ ເປັນອາຄານຊັ້ນດຽວ ຂະໜາດ: 11 X 17 ແມັດ, ລວມມີ 7 ຫ້ອງ, ໂຄງສ້າງເຮັດດ້ວຍເບຕົງເສີມເຫຼັກ, ເຊີ່ງຈະໄດ້ລົງມືຈັດຕັ້ງປະຕິບັດກໍ່ສ້າງໃນທ້າຍເດືອນ ມີນາ 2023 ແລະ ຈະໄດ້ສໍາເລັດໃນທ້າຍເດືອນ ກັນຍາ 2023.
ພິທີເຊັນສັນຍາມອບ-ຮັບ ທຶນດັ່ງກ່າວ ໄດ້ຈັດຂຶ້ນໃນວັນທີ 9 ມີນາ 2023, ທີ່ຫ້ອງປະຊຸມສະຖານເອກອັກຄະລັດຖະທູດຢິ່ປຸ່ນ ປະຈຳ ສປປ ລາວ ເຊັນມອບໂດຍ: ທ່ານ ໂຄບະຢາຊິ ເຄັນອິຈິ ເອກອັດຄະລັດຖະທູດປະຈຳ ສປປ ລາວ (ຕາງໜ້າລັດຖະບານຢີ່ປຸ່ນ), ເຊັນຮັບໂດຍ: ທ່ານ ດຣ ອາຄົມ ລ່ຳວິຈິດ ຫົວໜ້າພະແນກສາທາລະນະສຸກແຂວງສາລະວັນ ຕາງໜ້າເຈົ້າຂອງໂຄງການ (ຝ່າຍ ສປປ ລາວ), ໂດຍຊ້ອງໜ້າ ທ່ານ ປອ ວົງດາວ ພອນແກ້ວ ເຈົ້າແຂວງສາລະວັນ ແລະ ພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂິພິຍານ.
ແຫຼ່ງຂ່າວ ພະແນກສາທາແຂວງ