ຈາກກໍລະນີທີ່ເຈົ້າເມືອງປາກລາຍ, ແຂວງໄຊຍະບູລີ ໄດ້ອອກແຈ້ງການ ສະບັບເລກທີ 297/ຈມປລ, ລົງວັນທີ 28 ກຸມພາ 2023 ໃຫ້ເກັບເງິນນໍາພະນັກງານ-ລັດຖະກອນ ແລະ ກໍາລັງປະກອບອາວຸດພາຍໃນເມືອງ ເພື່ອເປັນການປະກອບສ່ວນທຶນສົມທົບຈັດງານເທດສະການບຸນຜີໂຂນ ປະຈໍາປີ 2023 ເຮັດໃຫ້ສັງຄົມມີຄວາມສົນໃຈ ແລະ ເກີດມີຫາງສຽງໃນຫຼາຍໆດ້ານ.
ຕໍ່ກັບຫາງສຽງດັ່ງກ່າວ, ທ່ານ ກອງສີ ວົງສີ, ເຈົ້າເມືອງປາກລາຍ ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 1 ມີນາ ກ່ຽວກັບລາຍລະອຽດກ່ຽວກັບບຸນພະເວດຜີໂຂນຢູ່ເມືອງປາກລາຍ ປະຈໍາປີ 2023 ນີ້ ທີ່ຈັດຂຶ້ນໃນລະຫວ່າງວັນທີ 2-6 ມີນານີ້ ແມ່ນຍິ່ງໃຫຍ່ ແລະ ມີຫຼາຍກິດຈະກໍາ.
ເນື່ອງຈາກເທດສະການບຸນຜີໂຂນ ປະຈໍາປີ 2023 ຈັດຂຶ້ນຢ່າງຍິ່ງໃຫຍ່, ແຕ່ງົບປະມານຂອງເມືອງມີຈໍາກັດ, ດັ່ງນັ້ນ ຄະນະປະຈໍາພັກເມືອງໄດ້ປະຊຸມປຶກສາຫາລືກັນຫລາຍຄັ້ງ, ລວມເຖີງໄດ້ປະຊຸມເພື່ອຕົກລົງເຫັນດີຮ່ວມກັບບັນດາຜູ້ຕາງໜ້າອົງການປົກຄອງບ້ານພາຍໃນເທດສະບານເມືອງຮຽບຮ້ອຍແລ້ວ ຈິ່ງອອກແຈ້ງການເກັບເງິນສົມທົບທຶນການຈັດງານດັ່ງກ່າວນໍາພະນັກງານ-ລັດຖະກອນ ແລະ ກໍາລັງປະກອບອາວຸດ, ລວມເຖີງຂໍການສະໜັບສະໜູນຈາກບັນດາຫົວໜ່ວຍທຸລະກິດ ແລະ ປະຊາຊົນຢູ່ບັນດາບ້ານພາຍໃນເທດສະບານເມືອງ ເຊີ່ງທ່ານຢືນຢັນວ່າ: ທຸກຄົນແມ່ນເຫັນດີເຫັນພ້ອມໃຫ້ເກັບເງິນສົມທົບທຶນໃນຄັ້ງນີ້ ຍ້ອນບໍ່ມີລາຍຮັບທາງອື່ນອີກແລ້ວ ແລະ ໃນການຈັດງານຜ່ານມາກໍ່ເຄີຍມີການຂໍສະໜັບສະໜູນລັກສະນະແບບດຽວກັນນີ້ມາແລ້ວຫຼາຍຄັ້ງ ເພື່ອແນໃສ່ຮ່ວມກັນສືບທອດ ແລະ ປົກປັກຮັກສາບຸນຜີໂຂນຂອງເມືອງໄວ້ໃຫ້ຍືນຍົງຕະຫຼອດໄປ.
Cr. Lao Youth Radio FM 90.0 Mhz