ເຈົ້າໜ້າທີ່ກວດພົບຢາເສບຕິດລວມແລ້ວ 6 ກິໂລກຣາມ ທີ່ຢູ່ລົດເມ 4 ຄັນ ຢູ່ທີ່ດ່ານສາກົນລາວບາວ ລາວ-ຫວຽດນາມ ແຂວງກວາງຈີ້ ປະເທດຫວຽດນາມ ໂດຍເຈົ້າໜ້າທີ່ໄດ້ຈັບຄົນຫວຽດນາມ 8 ຄົນ ໃນຂໍ້ຫາລັກລອບຂົນສົ່ງຢາເສບຕິດ.
ສຳນັກຂ່າວຫວຽດນາມໄດ້ລາຍງາຍວ່າ: ໃນຕອນເຊົ້າວັນພຸດ ທີ 11 ມັງກອນ 2023 ເຈົ້າໜ້າທີ່ຢູ່ດ່ານສາກົນລາວບາວ ໄດ້ດຳເນີນການກວດກາກະເປົາໃນລົດໂດຍສານຈຳນວນ 2 ຄັນ ທີ່ຫາກໍເດີນທາງຂ້າມມາໃນວຽດນາມ ລົດທັງສອງແມ່ນຕິດປ້າຍທະບຽນຫວຽດນາມ ເຊິ່ງພົບເຫັນຢາເສບຕິດ 1 ຫໍ່ ຢູ່ໃນລົດເມທັງສອງຄັນ ຢ່າງໃດກໍຕາມຢາເສບຕິດບໍ່ໄດ້ຖືກຍຶດ ແລະ ຍັງວາງໄວ້ລົດເມຄືນ ແລະ ເບິ່ງຄືວ່າບໍ່ມີການດຳເນີນການຫຍັງເທື່ອ.
ແຕ່ຫຼັງຈາກນັ້ນເຈົ້າໜ້າທີ່ພາສີໄດ້ສົມທົບກັບຕໍາຫຼວດ ແລະ ອອກກວດຕາມຊາຍແດນເພື່ອຕິດຕາມລົດເມທັງສອງຄັນດັ່ງກ່າວ.
ໃນເວລາຕໍ່ມາຂອງມື້ດຽວກັນ ກໍໄດ້ຈັບ 3 ຄົນ ທີ່ກຳລັງຮັບຢາເສບຕິດມາຈຳນວນ 2 ຫໍ່ ທີ່ແຂວງທົວທຽນເຫ (Thua Thien–Hue) ທີ່ຕິດກັບແຂວງກວາງຈີ້ ໃນນັ້ນເຈົ້າໜ້າທີ່ຕຳຫຼວດພົບເຫັນຢາເສບຕິດປະມານ 1,8 ກິໂລກຣາມ.
ຜ່ານການກວດກາເຮືອນທີ່ຜູ້ຖືກຫາທັງ 3 ຄົນ ພົບເຫັນຢາບ້າອີກ 40 ເມັດ ແລະ ເຄຕາມີນ 100 ກຣາມ.
ກ່ອນໜ້ານັ້ນ ໃນວັນທີ 8 ມັງກອນ 2023 ເຈົ້າໜ້າທີ່ດ່ານສາກົນລາວບາວ ລາວ-ຫວຽດນາມ ກໍພົບເຫັນຢາເສບຕິດຢູ່ລົດເມ 2 ຄັນ ທີ່ເຂົ້າມາຫວຽດນາມ ເຊິ່ງຄັນໜຶ່ງແມ່ນລົດຫວຽດນາມ ຄັນໜຶ່ງແມ່ນລົດລາວ.
ໃນຕອນແລງຂອງມື້ດຽວກັນ ຕຳຫຼວດໄດ້ຈັບຜູ້ຖືກຫາ 5 ຄົນ ທີ່ໄດ້ຮັບເຄື່ອງຢູ່ນະຄອນດ່ານັງ ຕຳຫຼວດໄດ້ພົບເຫັນຢາເສບຕິດ 4,4 ກິໂລກຣາມທີ່ເຊື່ອງໄວ້ຢູ່ໃນກະເປົາ.
ຫວຽດນາມ ແມ່ນສູນຄ້າຢາເສບຕິດທີ່ສຳຄັນ ເຖິງວ່າຈະມີກົດໝາຍວ່າດ້ວຍຢາເສບຕິດທີ່ເຄັ່ງຄັດທີ່ສຸດໃນໂລກ.