ເຈົ້າໜ້າທີ່ສາທາລະນະສຸກເກົາຫຼີໃຕ້ ເລັ່ງຕິດຕາມຫາຄົນຈີນຄົນໜຶ່ງ ເຊິ່ງກວດພົບວ່າຕິດໂຄວິດ-19 ໄດ້ຫາຍໂຕໄປໃນລະຫວ່າງຢູ່ສູນກັກໂຕ ເຊິ່ງບຸກຄົນດັ່ງກ່າວອາດຈະຖືກຈຳຄຸກສູງສຸດ 1 ປີ ປັບໄໝປະມານ 10 ລ້ານວອນ ຖ້າຫາກຖືກຕັດສິນວ່າລະເມີດກົດ.
ໃນວັນທີ 4 ທັນວາ 2023 ສຳນັກຂ່າວ ຣອຍເຕີ ໄດ້ລາຍງານວ່າ: ມີຄົນຈີນ ກວດພົບເຊື້ອໂຄວິດ-19 ຫາຍໂຕໄປລະຫວ່າງຢູ່ສູນກັກໂຕທີ່ປະເທດເກົາຫຼີໃຕ້ ເຊິ່ງເຈົ້າໜ້າທີ່ເກົາຫຼີໃຕ້ລະບຸວ່າ ບຸກຄົນດັ່ງກ່າວມີຜົນກວດເປັນບວກ ພາຍຫຼັງທີ່ມາຮອດສະໜາມບິນນາໆຊາດອິນຊອນໃກ້ກຸງໂຊໃນວັນອັງຄານທີ່ຜ່ານມາ ແລະ ຖືກສົ່ງໄປທີ່ໂຮງແຮມເພື່ອຖ້າເຂົ້າຮັບການກັກໂຕ ແຕ່ໄດ້ຫາຍໂຕໄປໃນທີ່ສຸດ.
ຕອນນີ້ ເຈົ້າໜ້າທີ່ກຳລັງຕິດຕາມເພື່ອຊອກຫາໂຕຜູ້ກ່ຽວ ເພາະຖ້າລາວຖືກຕັດສິນວ່າລະເມີດກົດຄວບຄຸມ ແລະ ປ້ອງກັນພະຍາດຕິດຕໍ່ ກໍຈະຖືກຈຳຄຸກ 1 ປີ ຫຼື ປັບໄໝປະມານ 10 ລ້ານວອນ (135 ລ້ານກີບ) ຍັງຈະຖືກເນລະເທດ ແລະ ຫ້າມເຂົ້າປະເທດໃນໄລຍະໜຶ່ງອີກດ້ວຍ.
ປັດຈຸບັນນີ້ ມີຫຼາຍປະເທດທີ່ໄດ້ກຳນົດມາດຕະການຕ່າງໆຢ່າງເຂັ້ມງວດ ເພື່ອຮັບນັກທ່ອງທ່ຽວຈີນ.