ບັນດາຜູ້ປະທ້ວງໃນສີລັງກາ ຍັງພາກັນຊຸມນຸມກັນໃນທຳນຽບປະທານາທິບໍດີ ແລະ ທຳນຽບນາຍົກລັດຖະມົນຕີ, ພວກເຂົາໄດ້ລະບຸວ່າ ຈະບໍ່ໄປໃສ ຈົນກວ່າປະທານາທິບໍດີ ແລະ ນາຍົກລັດຖະມົນຕີ ຈະລາອອກຈາກຕະແໜ່ງ.
ໃນວັນທີ 10 ກໍລະກົດ ທີ່ຜ່ານມານີ້, ອ້າງອີງຈາກ ບີບີຊີ ລາຍງານວ່າ: ກຸ່ມຜູ້ປະທ້ວງຍັງຊຸມນຸມກັນໃນທຳນຽບປະທານາທິບໍດີ ໃນກຸງໂຄລົມໂບ, ໂດຍມີປະຊາຊົນພາກັນເຂົ້າມາທ່ຽວຊົມຫ້ອງຕ່າງໆ ຫຼາຍຄົນກໍຖ່າຍຮູບກັບສິ່ງຂອງຕ່າງໆທັງພາຍໃນ-ພາຍນອກທຳນຽບ, ພາກັນຫຼິ້ນອຸປະກອນຕ່າງໆ, ລອຍນ້ຳໃນສະລອຍນ້ຳ ແລະ ນອນຫຼິ້ນຢູ່ເທິງຕຽງ.
ໂດຍຜູ້ປະທ້ວງໄດ້ບຸກເຂົ້າມາທຳນຽບປະທານາທິບໍດີ ແລະ ທຳນຽບນາຍົກລັດຖະມົນຕີ ຕັ້ງແຕ່ວັນທີ 9 ກໍລະກົດ ທີ່ຜ່ານມາ ເນື່ອງຈາກຄວາມບໍ່ພໍໃຈໃນສະພາບເສດຖະກິດ ທີ່ລັດຖະບານປ່ອຍໃຫ້ປະຊາຊົນປະເຊີນກັບວິກິດຄັ້ງທີ່ຮຸນແຮງທີ່ສຸດໃນຮອບ 70 ປີ ທັງມີພາວະຂາດແຄນພະລັງງານເຊື້ອໄຟ, ກາສ ແລະ ອາຫານ ຈຶ່ງເຮັດໃຫ້ປະຊາຊົນອອກມາປະທ້ວງໃນຫຼາຍເດືອນທີ່ຜ່ານມາ.
