ສານປະຊາຊົນນະຄອນຫຼວງ ຕັດສິນຈຳຄຸກ 2 ຈຳເລີຍ ໃນຖານຄ້າຢາເສບຕິດ ປະເພດ ຢາບ້າ, ເຊິ່ງເຈົ້າໜ້າທີ່ສາມາດຈັບຕົວມາດຳເນີນຄະດີໃນເດືອນ ກັນຍາ 2021.
ອົງການໄອຍະການປະຊາຊົນນະຄອນຫຼວງວຽງຈັນ ໄດ້ຖະແຫຼງໄຈ້ແຍກການກະທຳຜິດຂອງພວກຈຳເລີຍ ຕໍ່ຄະນະສານອາຍາຂັ້ນຕົ້ນວ່າ: ທ້າວ ຄອນສະຫວັນ ອາຍຸ 43 ປີ ຢູ່ບ້ານທ່າແຂກ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ເລີ່ມເສບຢາບ້າ ແຕ່ເດືອນພຶດສະພາ 2020 ເປັນຕົ້ນມາ, ມາຮອດ ເດືອນສິງຫາ 2020 ໄດ້ຫັນຈາກຜູ້ເສບມາເປັນຜູ້ຂາຍ ທີ່ນຳມາຂາຍແມ່ນ ນາງ ຈັນນະພາ ອາຍຸ 23 ປີ ຂາຍຈຳນວນ 2 ຄັ້ງ ຄັ້ງລະ 100 ເມັດ ແລະ ໄດ້ແບ່ງຂາຍໃຫ້ໄວໜຸ່ມໃນເຂດບ້ານ.
ນາງ ຈັນນະພາ ສາລະພາບວ່າ: ເລີ່ມເສບຢາແຕປີ 2019, ຮອດເດືອນເມສາ 2020 ຈຶ່ງເຄື່ອນໄຫວຂາຍຢາບ້າ, ຫຼັງຈາກນັ້ນພໍເທົ່າໃດເດືອນກໍຖືກຕຳຫຼວດຈັບພ້ອມຂອງກາງ.
ຜ່ານການຄົ້ນຄວ້າຂໍ້ມູນ ແລະ ເອກະສານຕ່າງໆ ເຫັນວ່າມີຫຼັກຖານຮັດກຸມທີ່ໜັກແໜ້ນ ແລະ ພຽງພໍຢືນຢັນຕໍ່ການກະທຳຂອງຈຳເລີຍ, ຄະນະສານ ໄດ້ຕັດສິນຈຳຄຸກ ທ້າວ ຄອນສະຫວັນ ແລະ ນາງ ຈັນນະພາ ຜູ້ລະ 5 ປີ ພ້ອມທັງປັບໄໝຜູ້ລະ 10.000.000 ກີບ.
ແຫຼ່ງຂ່າວຈາກ ຄວາມສະຫງົບ