ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ໃນວັນທີ 2 ກຸມພາ 2022 ສະຖາບັນກຸມມານເວດສາດອາເມລິກາ (AAP) ແລະ ສາມາຄົມໂຮງໝໍເດັກນ້ອຍຂອງສະຫະລັດອາເມລິກາ (CHA) ໄດ້ເປີດເຜີຍວ່າເດັກນ້ອຍໃນສະຫະລັດອາເມລິກາຕິດເຊື້ອໂຄວິດ-19 ຫຼາຍກວ່າ 3.5 ລ້ານຄົນ ໃນເດືອນມັງກອນທີ່ຜ່ານມາ ໂດຍຈໍານວນຜູ້ຕິດເຊື້ອໃນກຸ່ມເດັກນ້ອຍແມ່ນເພີ່ມສູງຂຶ້ນຢ່າງກະທັນຫັນໃນລະຫວ່າງການແຜ່ລະບາດຂອງພະຍາດໂຄວິດ-19 ສາຍພັນໂອໄມຄຣອນ ເຊິ່ງຈາກສະຖິຕິພົບວ່າມີເດັກນ້ອຍທີ່ຕິດເຊື້ອສະສົມຫຼາຍກວ່າ 11.4 ລ້ານຄົນ ແລະ ກວດພົບເຊື້ອໃນສອງອາທິດກ່ອນປະມານ 2 ລ້ານຄົນ.

ສະຫະລັດອາເມລິກາໄດ້ລາຍງານການກວດພົບຜູ້ຕິດເຊື້ອໂຄວິດ-19 ໃນກຸ່ມເດັກນ້ອຍເພີ່ມຂຶ້ນຫຼາຍກວ່າ 100,000 ຄົນ ຕິດຕໍ່ກັນເປັນອາທິດທີ 25 ແລ້ວ ແລະ ກວດພົບຕື່ມອີກປະມານ 6.4 ລ້ານຄົນ ນັບຕັ້ງແຕ່ອາທິດທໍາອິດຂອງເດືອນກັນຍາ 2021.