spot_img
Homeຂ່າວການພັດທະນາເລີ່ມເປີດໃຫ້ບໍລິການແລ້ວສໍາລັບການຂົນສົ່ງສິນຄ້າລາວ-ຈີນ ຈາກສະຖານີລົດໄຟວັງວຽງ

ເລີ່ມເປີດໃຫ້ບໍລິການແລ້ວສໍາລັບການຂົນສົ່ງສິນຄ້າລາວ-ຈີນ ຈາກສະຖານີລົດໄຟວັງວຽງ

Published on

ວັນທີ 13 ມັງກອນ 2022 ລາຍງານຈາກບໍລິສັດທາງລົດໄຟລາວ-ຈີນຈຳກັດ, ໃຫ້ຮູ້ວ່າ: ອີງຕາມຄວາມຮຽກຮ້ອງຕ້ອງການດ້ານການຂົນສົ່ງສິນຄ້າທີ່ນັບມື້ນັບເພີ່ມຂຶ້ນ,ເພື່ອໃຫ້ການບໍລິການດ້ານການຂົນສົ່ງສິນຄ້າດີຂຶ້ນ, ລົດໄຟລາວ-ຈີນຈິ່ງໄດ້ເປີດໃຫ້ບໍລິການຂົນສົ່ງສິນຄ້າສະຖານີວັງວຽງຂຶ້ນ, ເຊິ່ງຈະເລີ່ມໃຫ້ບໍລິການຢ່າງເປັນທາງການພາຍໃນອາທິດນີ້.

ສະຖານີວັງວຽງ ຕັ້ງຢູ່ແຄມທາງຫຼວງເລກ 13 ເມືອງວັງວຽງ, ແຂວງວຽງຈັນ, ລຽບຕາມທາງດ່ວນ, ລານສິນຄ້າສະຖານີວັງວຽງ ຕົ້ນຕໍແມ່ນດຳເນີນທຸລະກຳສິນຄ້າຂາເຂົ້າ-ຂາອອກ, ລານສິນຄ້າມີເສັ້ນທາງຂົນສົ່ງສິນຄ້າ 2 ເສັັ້ນທາງ, ເສັ້ນທາງທີ 1 ສາມາດເຮັດວຽກໜຶ່ງເທື່ອໄດ້ 18 ຕູ້ສິນຄ້າ, ເສັ້ນທາງທີ 2 ສາມາດເຮັດວຽກໜຶ່ງເທື່ອໄດ້ 11 ຕູ້ສິນຄ້າ. ລານສະຖານີວັງວຽງທັງໝົດ ສາມາດບັນຈຸຕູ້ຄອນເທນເນີໄດ້ 420 ຕູ້.

ຍ້ອນໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ໃນໄລຍະເປີດດຳເນີນການເບື້ອງຕົ້ນລົດໄຟລາວ-ຈີນ ຈິ່ງໄດ້ເປີດສະຖານີຂົນສົ່ງສິນຄ້າພຽງ 2 ແຫ່ງຄື: ສະຖານີຂົນສົ່ງສິນຄ້າວຽງຈັນໃຕ້ ແລະ ສະຖານີ ຂົນສົ່ງສິນຄ້ານາເຕີຍ. ພາຍຫຼັງທີ່ເປີດນຳໃຊ້ລານຂົນສົ່ງສິນຄ້າຢູ່ສະຖານີວັງວຽງແລ້ວ, ລົດໄຟລາວ-ຈີນກໍຈະມີຈຸດຂົນສົ່ງສິນຄ້າເພີ່ມຂຶ້ນເປັນ 3 ຈຸດ: ສະຖານີຂົນສົ່ງສິນຄ້າວຽງຈັນໃຕ້, ສະຖານີວັງວຽງ ແລະ ສະຖານີຂົນສົ່ງສິນຄ້ານາເຕີຍ (ສະຖານີບໍ່ເຕ່ນຖືວ່າເປັນດ່ານພາສີ, ດັ່ງນັ້ນ, ຈຶ່ງບໍ່ມີການດຳເນີນທຸລະກຳການຂົນສົ່ງສິນຄ້າ).

ກ່ອນຈະດໍາເນີນທຸລະການຂົນສົ່ງສິນຄ້າ, ເຈົ້າຂອງສິນຄ້າຕ້ອງເຊັນ “ສັນຍາການຈ່າຍຄ່າຂົນສົ່ງທາງລົດໄຟລ່ວງໜ້າ”, “ສັນຍາຄວາມປອດໄພການຂົນສົ່ງຕູ້ສິນຄ້າ” ແລະ “ສັນຍານຳໃຊ້ຕູ້ສິນຄ້າເຂົ້າ-ອອກສະຖານີສິນຄ້າ” ກັບບໍລິສັດທາງລົດໄຟລາວ-ຈີນ ແລະ ຕ້ອງໂອນເງິນມັດຈຳ ແລະ ຈ່າຍເງິນລ່ວງໜ້າເຂົ້າບັນຊີທີ່ກຳນົດໄວ້, ຫຼັງຈາກໄດ້ຮັບເງິນມັດຈໍາ ແລະ ເງິນລ່ວງໜ້າທີ່ຈ່າຍໃຫ້ແລ້ວ, ທ່ານກໍສາມາດໄປສະຖານີຂົນສົ່ງສິນຄ້າເພື່ອຮັບຕູ້ສິນຄ້າ, ຫຼັງຈາກທີ່ຕູ້ສິນຄ້າບັນທຸກສິນຄ້າຮຽບຮ້ອຍແລ້ວ ແລະ ໄດ້ສຳເລັດການແລ່ນຂັ້ນຕອນຜ່ານດ່ານພາສີແລ້ວ, ກໍຈະສາມາດສົ່ງອອກໄດ້.

ຕາມການລາຍງານຂອງຜູ້ຮັບຜິດຊອບພະແນກດຳເນີນການຂອງບໍລິສັດທາງລົດໄຟລາວ-ຈີນໃຫ້ຮູ້ວ່າ: ນັບແຕ່ໄດ້ເປີດໃຫ້ບໍລິການລົດໄຟລາວ-ຈີນເປັນຕົ້ນມາ, ຂະບວນລົດໄຟຂົນສົ່ງສິນຄ້າຈາກນະຄອນຫຼວງວຽງຈັນໄປຈີນແມ່ນມີສະພາບຮັດຕົວ, ລາຍການຂົນສົ່ງສິນຄ້າຂອງທາງລົດໄຟລາວ-ຈີນແມ່ນມີຈຳນວນຫຼວງຫຼາຍ, ສິນຄ້າທີ່ສົ່ງໄປຈີນຕົ້ນຕໍແມ່ນຢາງພາລາ, ເຂົ້າ, ຖ່ານ, ແຮ່ເຫລັກ ແລະອື່ນໆ, ສ່ວນສິນຄ້າທີ່ສົ່ງມາລາວຕົ້ນຕໍແມ່ນ ປຸຍ, ຜະລິດຕະພັນກົນຈັກໄຟຟ້າ ແລະອື່ນໆ, ນອກຈາກນີ້ຍັງມີສິນຄ້າເຢັນທີ່ຂົນສົ່ງໄປໄທ. ມາຮອດວັນທີ 12 ມັງກອນປີ 2022, ປະລິມານການຂົນສົ່ງສິນຄ້າຂອງທາງລົດໄຟລາວ-ຈີນໄດ້ບັນລຸ 60.000ໂຕນ. ໃນຕໍ່ໜ້າ ບໍລິສັດທາງລົດໄຟລາວ-ຈີນ ຈະສືບຕໍ່ບໍລິການຂົນສົ່ງສິນຄ້າໃຫ້ດີ, ຍົກໃຫ້ເຫັນປະໂຫຍດທີ່ເປັນເອກະລັກສະເພາະຂອງການຂົນສົ່ງທາງລົດໄຟ, ຕັ້ງໜ້າປະກອບສ່ວນຊຸກຍູ້ການສົ່ງອອກສິນຄ້າຄຸນນະພາບສູງຂອງລາວ ເພື່ອສົ່ງເສີມການພັດທະນາເສດຖະກິດຂອງລາວ.

ແຫຼ່ງຂ່າວຈາກ: Lao National Radio

ບົດຄວາມຫຼ້າສຸດ

ປະກາດການແຕ່ງຕັ້ງ ຮອງເລຂາພັກ ແຂວງ-ຮອງເຈົ້າແຂວງ ສາລະວັນ

ໃນວັນທີ 18 ກັນຍາ 2024 ແຂວງສາລະວັນ ໄດ້ຈັດພິທີປະກາດ ແຕ່ງຕັ້ງຮອງເລຂາພັກແຂວງ, ຮອງເຈົ້າແຂວງໆສາລະວັນ, ທີ່ສະໂມສອນແຂວງ, ໃຫ້ກຽດເຂົ້າຮ່ວມເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ...

ເປີດຢ່າງເປັນທາງການ ກອງປະຊຸມເຈົ້າຄອງນະຄອນຫຼວງອາຊຽນ ປີ 2024

ກອງປະຊຸມເຈົ້າຄອງນະຄອນຫຼວງອາຊຽນ (MGMAC) ແລະ ກອງປະຊຸມເວທີເຈົ້ານະຄອນອາຊຽນ (AMF) ປີ 2024  ເປີດຂຶ້ນຢ່າງເປັນທາງການໃນວັນທີ 18 ກັນຍານີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ສປປ ລາວ,...

ພິຈາລະນາ ສະເໜີຂໍໃຫ້ອະໄພຍະໂທດ ແກ່ນັກໂທດ ປະຈໍາປີ 2024

ໃນຕອນເຊົ້າວັນທີ 18 ກັນຍາ 2024 ນີ້ ຢູ່ທີ່ຫ້ອງປະຊຸມຂອງອົງການໄອຍະການປະຊາຊົນສູງສຸດ ໄດ້ຈັດກອງປະຊຸມຄະນະກໍາມະການອະໄພຍະໂທດ ລະດັບຊາດ ເພື່ອຄົ້ນຄວ້າພິຈາລະນາການສະເໜີຂໍໃຫ້ອະໄພຍະໂທດ ແກ່ນັກໂທດປະຈໍາປີ 2024 ໂດຍການເປັນປະທານຂອງ ພົນເອກ ວິໄລ...

ແຈ້ງເຕືອນໄພສະບັບທີ 2 ພາຍຸຫນູນເຂດຮ້ອນ ໃນລະຫວ່າງວັນທີ 18 – 22 ກັນຍາ 2024

ພາຍຸດີເປຣຊັນ ກາລັງເຄື່ອນທີຢູ່ເຂດທະເລຈີນໃຕ້ ຕອນກາງ ດ້ວຍຄວາມໄວ 25 ກິໂລແມັດຕໍ່ ຊົ່ວໂມງ ຊຶ່ງໃນເວລາ 8 ໂມງ 25 ນາທີ ມີຈຸດສູນ ກາງ...