ລົດ​ໄຟຂົນ​ສົ່ງ​ສິນ​ຄ້າ​ສາ​ກົນສອງຂະບວນທຳ​ອິດຕາມທາງລົດ​ໄຟລາວ-ຈີນ​ ໄດ້ເດີນ​ທາງມາເຖິງຈຸດໝາຍທັງປະເທດ ​ລາວ ແລະ ຈີນ.

ຕາມການລາຍງານຂ່າວຂອງ CRI-FM93 ຮູ້ວ່າ: ລົດ​ໄຟຂົນ​ສົ່ງ​ສິນ​ຄ້າ​ສາ​ກົນຖ້ຽວ 21051 ທີ່​ເປັນຖ້ຽວ​ທຳ​ອິດຕາມທາງລົດ​ໄຟລາວ-ຈີນ ​​ທີ່​ອອກ​ເດີນ​ທາງ​ຈາກ​ນະ​ຄອນ​ຄຸນມິງ ​ໄດ້​ເດີນ​ທາງ​ຮອດນະ​ຄອນ​ຫຼວງວຽງ​ຈັນ​ ໃນ​ຕອນກາງຄືນຂອງວັນ​ທີ 4 ທັນ​ວາ. ຂະ​ນະ​ດຽວ​ກັນ, ​ລົດ​ໄຟ​​ຂົນ​ສົ່ງ​ສິນ​ຄ້າ​ສາ​ກົນ​ຖ້ຽວ 21052 ທີ່​ເປັນຖ້ຽວ​ທຳ​ອິດທີ່​ອອກ​ເດີນ​ທາງ​ຈາກນະ​ຄອນ​ຫຼວງວຽງ​ຈັນ​ ໃນ​ວັນ​ທີ 3 ທັນ​ວາ ​ ​ກໍ່ໄດ້​ເດີນ​ທາງ​ໄປ​ຮອດ​​ສະ​ຖາ​ນີບໍ່​ຫານ​ຂອງ​ຈີນ ໃນຕອນບ່າຍຂອງວັນ​ທີ 4 ທັນ​ວາ, ເຊິ່ງ​ເປັນ​ຂີດ​ໝາຍ​ສະ​ແດງ​ໃຫ້​ເຫັນ​ວ່າ ເສັ້ນ​ທາງ​ລົດ​ໄຟ​ລາວ-ຈີນ ໄດ້​​ບັນ​ລຸການ​ຂົນ​ສົ່ງ​ຂ້າມ​ຊາດ​ຢ່າງ​ເປັນ​ທາງ​ການ.

ການ​ແລ່ນ​ລົດ​ໄຟ​​ຂົນ​ສົ່ງ​ສິນ​ຄ້າ​ສາ​ກົນຕາມທາງລົດ​ໄຟລາວ-ຈີນ ຕະຫຼອດສາຍ ​ຈະ​ໃຊ້​ເວ​ລາ​ພຽງ​ແຕ່​ 30 ຊົ່ວ​ໂມງ​ເທົ່າ​ນັ້ນ, ຂະນະທີ່ການຂົນສົ່ງຕາມເສັ້ນທາງຫຼວງຈະໃຊ້ເວລາຫຼາຍກວ່າ 48 ຊົ່ວໂມງ. ຢ່າງໃດກໍຕາມ, ໄລຍະການເປີດນຳໃຊ້ເສັ້ນທາງລົດໄຟລາວ-ຈີນເບື້ອງຕົ້ນ, ພາກ​ສ່ວນທາງ​ລົດ​ໄຟ​ຂອງ​ລາວ ແລະຈີນ ​ໄດ້​ວາງ​ແຜນ​ການ​ແລ່ນ​ລົດ ໂດຍຈະມີລົດ​ໄຟ​ຂົນ​ສົ່ງ​ສິນ​ຄ້າ 2 ຖ້ຽວຕໍ່ວັນ ພາຍ​ໃ​ຕ້​ສະ​ພາບ​ການ​ປ້ອງ​ກັນ ​ແລະ​ຄວບ​ຄຸມ​ພະ​ຍາດ​ໂຄວິດ -19 ຄື​ລະ​ຫວ່າງ​ສະ​ຖາ​ນີຄຸ​ນ​​ມິງ​ແລະສະ​ຖາ​ນີ​ນະ​ຄອນ​ຫຼວງວຽງ​ຈັນ​ໃຕ້.