ສໍານັກຂ່າວຕ່າງປະເທດ ໄດ້ລາຍງານວ່າ ນາຍົກລັດຖະມົນຕີຂອງອັງກິດ ທ່ານ ບໍຣິສ ຈອນສັນ ໄດ້ເປີດເຜີຍວ່າ: ນັກວິທະຍາສາດຂອງພວກເຮົາກໍາລັງຮຽນຮູ້ຫຼາຍຂຶ້ນທຸກຊົ່ວໂມງ ແລະ ເຫັນໄດ້ວ່າເຊື້ອໂຄວິດໂອໄມຄອນຈະສາມາດແຜ່ເຊື້ອໄດຢ່າງວ່ອງໄວ ແລະ ສາມາດແຜ່ກະຈາຍລະຫວ່າງຜູ້ທີ່ໄດ້ຮັບການສັກວັກຊີນສອງເຂັມ.
ນອກຈາກນັ້ນ, ທ່ານຍັງໄດ້ກ່າວຕື່ມອີກວ່າ: “ພວກເຮົາຈໍາເປັນຕ້ອງເຮັດໃຫ້ການແຜ່ກະຈາຍຂອງໂຄວິດສາຍພັນນີ້ຊ້າລົງ ໂດຍປະຕິບັດມາດຕະການທີ່ຂອບເຂດຊາຍເພື່ອເຮັດໃຫ້ມັນເຂົ້າປະເທດອັງກິດໄດ້ຊ້າລົງເທົ່ານັ້ນ ແຕ່ກໍບໍ່ໄດ້ໝາຍຄວາມວ່າພວກເຮົາຈະສາມາດຢຸດມັນໄດ້”
ທັງນີ້ປະເທດອັງກິດຈະກໍານົດໃຫ້ຜູ້ທີ່ເດີນທາງເຂົ້າອັງກິດທຸກຄົນຈະຕ້ອງໄດ້ແຍກໂຕອອກໄປຈົນກວ່າພວກເຂົາຈະສາມາດສະແດງຜົນກວດແບບPCR ທີ່ເປັນລົບ ແລະ ລັດຖະບານກໍກໍາລັງຟື້ນຟູຄໍາສັ່ງໃຫ້ໃສ່ໜ້າກາກອະນາໄມໃນຮ້ານຄ້າ ແລະ ລະບົບຂົນສົ່ງສາທາລະນະ. ປັດຈຸບັນຊາວອັງກິດ ແລະ ຊາວຕ່າງຊາດທຸກຄົນທີ່ເດີນທາງເຂົ້າມາອັງກິດຈະຕ້ອງມີການກວດຫາເຊື້ອດ້ວຍ PCR ໃນມື້ທີສອງຫຼັງຈາກເດີນທາງມາຮອດອັງກິດ.