ວັນທີ 14 ພະຈິກ 2021 ສໍານັກຂ່າວ CNN ລາຍງານວ່າ ທາງການໂອຕຣິດ ປະກາດໃຊ້ມາດຕະການລ໋ອກດາວກັບປະຊາຊົນຫຼາຍລ້ານຄົນ ທີ່ຍັງບໍ່ໄດ້ຮັບວັກຊີນ ຫຼື ສັກວັກຊີນຍັງບໍ່ຄົບໂດສ ເລີ່ມແຕ່ວັນທີ 15 ພະຈິກນີ້ ເປັນຕົ້ນໄປ ເພື່ອຮັບມືກັບຕົວເລກຜູ້ຕິດເຊື້ອເພີ່ມຂຶ້ນທີ່ຈະກາຍເປັນສະຖິຕິໃໝ່.
ນາຍົກລັດຖະມົນຕີໂອຕຣິດ (Austria) Alexander Schallenberg ກ່າວເມື່ອວັນທີ 14 ພະຈິກທີ່ຜ່ານມາວ່າ: ຈໍາເປັນຕ້ອງເພີ່ມອັດຕາການສັກວັກຊີນໃນແຕ່ລະບ້ານ ຍ້ອນຍັງຢູ່ໃນລະດັບທີ່ຕໍ່າຫຼາຍໃນຕອນນີ້.
ນາຍົກລັດຖະມົນຕີ ກະຊວງສາທາລະນະສຸກ ໂອຕຣິດ Wolfgang Mückstein ລະບຸວ່າ ພາຍໃຕ້ມາດຕະການໃໝ່ຂອງໂອຕຣິດ ປະຊາຊົນທີ່ອາຍຸຕໍ່າກວ່າ 12 ປີ ຈະໄດ້ຮັບການຍົກເວັ້ນຈາກການລ໋ອກດາວ ແຕ່ຜູ້ທີ່ມີອາຍຸ 12 ປີຂຶ້ນໄປ ທີ່ຍັງບໍ່ໄດ້ຮັບວັກຊີນ ຫຼື ຍັງບໍ່ໄດ້ຮັບວັກຊີນຄົບໂດສ ຈະສາມາດອອກຈາກບ້ານໄດ້ໃນກໍລະນີທີ່ຈໍາເປັນເທົ່ານັ້ນ ເຊັ່ນອອກໄປເຮັດວຽກ ຫຼື ຊື້ເຄື່ອງໃຊ້ຕ່າງໆ ໂດຍຈະປະຕິບັດມາດຕະການດັ່ງກ່າວຢ່າງໜ້ອຍ 10 ມື້ ເຊິ່ງຈະມີການກວດສອບທີ່ເຄັ່ງຄັດໂດຍຕໍາຫຼວດປະຈໍາຢູ່ພື້ນທີ່ຕ່າງໆ.
ໂອຕຣິດ ເປັນໜຶ່ງໃນປະເທດທີ່ມີອັດຕາການສັກວັກຊີນໂຄວິດຕ່ຳສຸດໃນຢູໂຣບຕາເວັນຕົກ ໂດຍມີ 65% ຂອງປະຊາກອນທັງໝົດທີ່ໄດ້ຮັບວັກຊີນຄົບໂດສແລ້ວ ໃນຂະນະທີ່ມີປະຊາກອນຈໍານວນຫຼາຍທີ່ຍັງຕໍ່ຕ້ານ ແລະ ອອກມາຕັ້ງຄໍາຖາມກ່ຽວກັບວັກຊີນໂຄວິດ-19 ເຊັ່ນກັນ.