ສຳນັກຂ່າວ Independent ລາຍງານໃນວັນທີ 10 ພະຈິກ 2021 ນີ້ວ່າ ລັດຖະສະພາຂອງປອກຕຸຍການ ໄດ້ອະນຸມັດກົດໝາຍສະບັບໃໝ່ທີ່ສະເໜີໂດຍພັກສັງຄົມນິຍົມ ເຊິ່ງເປັນພັກລັດຖະບານ ກໍານົດໃຫ້ບໍລິສັດຕ່າງໆ ຫ້າມຕິດຕໍ່ພະນັກງານນອກເໜືອເວລາເຮັດວຽກທີ່ໄດ້ຕົກລົງກັນໄວ້ ແລະ ຖືວ່າເປັນເລື່ອງທີ່ຜິດກົດໝາຍ.
ຂໍ້ກໍານົດດັ່ງກ່າວ ແມ່ນໜຶ່ງໃນມາດຕະການໃໝ່ ເພື່ອຄວບຄຸມການເຮັດວຽກຢູ່ທີ່ບ້ານ (Work from home) ແລະ ປ່ຽນແນວຄວາມຄິດຂອງການດຸ່ນດ່ຽງຊີວິດສ່ວນຕົວ ແລະ ຊີວິດການເຮັດວຽກ ຫຼັງມີການລະບາດຂອງພະຍາດ ໂຄວິດ-19 ໃນຊ່ວງ 18 ເດືອນທີ່ຜ່ານມາ ເຮັດໃຫ້ຮູບແບບການເຮັດວຽກຂອງຜູ້ຄົນປ່ຽນແປງໄປ.
ພາຍໃຕ້ກົດໝາຍສະບັບໃໝ່ ໄດ້ຖືກຮັບຮອງເອົາໃນວັນທີ 5 ພະຈິກ 2021 ທີ່ຜ່ານມານີ້, ບັນດາບໍລິສັດທຸລະກິດຕ່າງໆ ຖ້າຫາກສົ່ງຂໍ້ຄວາມ ຫຼື ອີເມວ ໃຫ້ພະນັກງານນອກເວລາທີ່ໄດ້ຕົກລົງກັນໄວ້ ຈະຕ້ອງຊ່ວຍຈ່າຍຄ່າໃຊ້ຈ່າຍພາຍໃນເຮືອນທີ່ເພີ່ມຂຶ້ນຈາກການເຮັດວຽກຈາກບ້ານ ເຊັ່ນ: ຄ່າອິນເຕີເນັດ ແລະ ຄ່າໄຟຟ້າ.
ນອກຈາກນັ້ນ, ນາຍຈ້າງຍັງຖືກຫ້າມບໍ່ໃຫ້ຕິດຕາມພາບການເຮັດວຽກຂອງພະນັກງານທີ່ເຮັດວຽກຢູ່ນອກເໜືອຈາກສໍານັກງານ ເພື່ອຄວາມປອດໄພໃນຄວາມເປັນສ່ວນຕົວ ແລະ ກຳນົດໃຫ້ຈັດກອງປະຊຸມແບບພົບປະກັນຢ່າງນ້ອຍໜຶ່ງຄັ້ງໃນທຸກໆ 2 ເດືອນ ເພື່ອແກ້ໄຂຄວາມໂດດດ່ຽວຂອງສະມາຊິກໃນທີມ.
ໃນຂະນະທີ່ພະນັກງານທີ່ມີລູກນ້ອຍ ເຂົາເຈົ້າມີສິດໄດ້ຮັບສິດທິຕາມກົດໝາຍຄືສາມາດເຮັດວຽກຢູ່ບ້ານໄດ້ ຈົນກວ່າລູກຈະມີອາຍຸຮອດ 8 ປີ ໂດຍບໍ່ຈໍາເປັນຕ້ອງໄດ້ຮັບການອະນຸມັດຈາກຝ່າຍການຈັດການ.
ກົດໝາຍສະບັບໃໝ່ນີ້ ຈະມີຜົນບັງຄັບນຳໃຊ້ກັບບໍລິສັດທີ່ມີພະນັກງານ 10 ຄົນຂຶ້ນໄປເທົ່ານັ້ນ. ໃນຂະນະທີ່ການສະເໜີ ສິດທິໃນການຕັດການເຊື່ອມຕໍ່ ຈະອະນຸຍາດໃຫ້ພະນັກງານທີ່ມີສິດທິຕາມກົດໝາຍ ທີ່ຈະປິດຂໍ້ຄວາມ ແລະ ອຸປະກອນທີ່ກ່ຽວຂ້ອງກັບການເຮັດວຽກຫຼັງຈາກຊົ່ວໂມງເຮັດວຽກສິ້ນສຸດລົງ ແມ່ນໄດ້ຖືກປະຕິເສດໂດຍສະມາຊິກຂອງສະພາຜູ້ຕ່າງໜ້າ ແລະ ຈະບໍ່ໄດ້ລວມຢູ່ໃນກົດຫມາຍໃໝ່.