ເວັບໄຊ NY Post ລາຍງານ: ທ່ານ ມຸສຕາຟາ ອັນ-ຄາເດມີ, ນາຍົກລັດຖະມົນຕີອີຣັກ ລອດຊີວິດຈາກການລອບສັງຫານດ້ວຍໂດຣນຕິດອາວຸດທີ່ເຂົ້າໂຈມຕີເຮືອນພັກທ່ານນາຍົກໃນນະຄອນຫຼວງແບກແດດ ຂະນະທີ່ເຈົ້າໜ້າທີ່ຮັກສາຄວາມປອດໄພໄດ້ຮັບບາດເຈັບ 7 ຄົນ.

ເຫດການໂຈມຕີດັ່ງກ່າວເກີດຂຶ້ນໃນວັນທີ 7 ພະຈິກຜ່ານມາ ເມື່ອກຸ່ມກໍ່ການຮ້າຍໄດ້ໃຊ້ໂດຣນຕິດອາວຸດ 2 ລຳບຸກໂຈມຕີພື້ນທີ່ສີຂຽວຂອງເມືອງແບກແດກ ເຊິ່ງເປັນທີ່ຕັ້ງຂອງສະຖານທູດຕ່າງປະເທດ ແລະສຳນັກງານລັດຖະບານ ລວມທັງເຮືອນພັກຂອງທ່ານນາຍົກລັດຖະມົນຕີອີຣັກ ອັນໄດ້ສ້າງຄວາມແຕກຕື່ນແກ່ປະຊາຊົນທີ່ອາໄສຢູ່ພາຍໃນເມືອງດັ່ງກ່າວພໍສົມຄວນ ໂຊກດີບໍ່ມີລາຍງານຜູ້ເສຍຊີວິດ ແຕ່ມີເຈົ້າໜ້າທີ່ 7 ຄົນໄດ້ຮັບບາດເຈັບ.

ການໂຈມຕີໄດ້ເພີ່ມທະວີຄວາມຕຶງຄຽດຫຼາຍຂຶ້ນລະຫວ່າງລັດຖະບານຂອງທ່ານ ອັນ-ຄາເດມີ ແລະ ກອງກຳລັງຕິດອາວຸດ Shiite ທີ່ໄດ້ຮັບການສະໜັບສະໜູນຈາກອີຫຼ່ານ ເຊິ່ງປະຕິເສດຜົນການເລືອກຕັ້ງລັດຖະບານເມື່ອເດືອນຜ່ານມາ.