ພົນລະເມືອງລາວທີ່ອາໄສຢູ່ປະເທດໄທຈຳນວນ 3.849 ຄົນ ໄດ້ຮັບການສັກວັກຊີນປ້ອງກັນໂຄວິດ-19 ເຂັມທຳອິດ ໃນຊ່ວງວັນທີ 26-28 ຕຸລາ ຜ່ານມາ ຖືເປັນຕົວເລກທີ່ສູງກວ່າຈຳນວນຄົນລົງທະບຽນອອນລາຍເຊິ່ງໃນເບື້ອງຕົ້ນມີປະມານ 3.500 ຄົນ.
ທ່ານ ນະວະພອນ ຕັນໄພບູນກຸນ ຫົວໜ້າກຸ່ມງານວິຊາການ ແລະ ແຜນການຂອງກອງການຢາ ສໍານັກງານອະນາໄມ ໄດ້ກ່າວວ່າ: ພົນລະເມືອງລາວທີ່ອາໄສຢູ່ກຸງເທບ, ປະເທດໄທ ທີ່ໄດ້ຮັບການສັກວັກຊິນເຂັມທຳອິດແມ່ນຊະນິດຊີໂນແວັກ ແລະເຂັມສອງຈະເປັນແອັດສະຕາເຊນີກາ ໂດຍຈະເລີ່ມສັກໃນວັນທີ 16-18 ພະຈິກນີ້, ເຊິ່ງຂໍ້ດີຂອງສູດຂວ່າຍນີ້ ຈະຊ່ວຍໃຫ້ປະຊາຊົນໄດ້ຮັບເຂັມທີສອງໄວຂຶ້ນ ຫຼັງຈາກມີໄລຍະຫ່າງຈາກເຂັມ 1 ພຽງແຕ່ 3 ອາທິດ ແລະຈະເຮັດໃຫ້ຜູ້ຮັບວັກຊິນໄດ້ມີການສ້າງພູມຄຸ້ມກັນໄດ້ໄວຂຶ້ນ, ພ້ອມຢໍ້າວ່າ ທີມແພດແມ່ນໄດ້ເກັບຮັກສາວັກຊິນໃຫ້ຢູ່ໃນອຸນນະພຸມທີ່ມີມາດຕະຖານສູງ ແລະເປັນວັກຊິນທີ່ມີຄຸນນະພາບດີ.
ໂຄງການການສັກວັກຊິນດັ່ງກ່າວ ເປັນການຮ່ວມມື ລະຫວ່າງ ສະຖານທູດລາວ ປະຈໍາຣາຊະອານາຈັກໄທ, ສໍານັກງານກຸງເທບມະຫານະຄອນ ແລະໂຄງການຈິດອາສາປິ່ນປົວໂຄວິດ-19 ເພື່ອມິດຕະພາບ ລາວ-ໄທ 70 ປີ, ໂດຍໄດ້ເປີດໂອກາດໃຫ້ພົນລະເມືອງກໍາປູເຈຍ ແລະມຽມມາ ທີ່ອາໄສໃນກຸງເທບ ສາມາດສັກວັກຊິນໄດ້ເຊັ່ນກັນ.
ຂໍ້ມູນຈາກ: ຂ່າວສານປະເທດລາວ