ເວັບໄຊ້ Thairath ໄດ້ລາຍງານວ່າ: ໃນວັນທີ 6 ກັນຍາ 2021 ທີ່ຜ່ານມາໄດ້ມີນັກໂທດຊາວປາເລສໄຕ໌ຈໍານວນ 6 ຄົນ ລົບໜີອອກຈາກຄຸກກິວໂບອາທາງພາກເໜືອຂອງປະເທດອິດສະລາແອນ ທີ່ມີລະບົບການຮັກສາຄວາມປອດໄພສູງທີ່ສຸດ ໂດຍນັກໂທດກຸ່ມນີ້ໄດ້ໃຊ້ເວລາຫຼາຍກວ່າ 1 ປີ ໃນການລັກຂຸດຂຸມພາຍໃນຫ້ອງນໍ້າໃຫ້ເປັນທາງອອກໃຫ້ເຊື່ອມຕໍ່ກັບອຸໂມງໂຄງສ້າງຂອງຄຸກ ແລະ ກໍພາກັນໜີອອກໄປ.
ທາງດ້ານຕໍາຫຼວດຂອງອິດສະລາແອນໄດ້ເປີດເຜີຍວ່າ ຕອນທໍາອິດບໍ່ມີໃຜຮູ້ວ່າມີນັກໂທດລັກໜີອອກໄປ ຈົນໄດ້ຮັບແຈ້ງຈາກຊາວນາຄົນໜຶ່ງທີ່ພົບເຫັນຊາຍ 6 ຄົນນຸ່ງຊຸດນັກໂທດ ແລ່ນຜ່ານທົ່ງນາໄປ ແລະ ທາງດ້ານຕໍາຫຼວດກໍໄດ້ອອກຄໍາສັ່ງໃຫ້ປິດເສັ້ນທາງທຸກສາຍ ເພື່ອຄົ້ນຫານັກໂທດທັງ 6 ຄົນ.
ສ່ວນທາງດ້ານວິທະຍຸຂອງກອງທັບອິດສະລາແອນໄດ້ຄາດການວ່ານັກໂທດທີ່ຫຼົບໜີອາດຈະໄດ້ຮັບຄວາມຊ່ວຍເຫຼືອຈາກບຸກຄົນພາຍນອກ ແລະ ເຊື່ອວ່ານັກໂທດຈະໜີເຂົ້າໄປໃນເມືອງເຈນີນ ເຊິ່ງເປັນພື້ນທີ່ຮັບຮອງຂອງທາງການປາເລສໄຕ໌.
ນອນຈາກນີ້, ໃນລາຍງານຍັງໄດ້ລະບຸວ່າ ໃນບັນດານັກໂທດທີ່ລົບໜີໄປແມ່ນມີອະດີດຫົວໜ້າພັກການເມືອງຟາຕາ ແລະ ອີກ 5 ຄົນທີ່ເປັນສະມາຊິກໃນຂະບວນການເຄື່ອນໄຫວຈີຮັດອິດສະລາມ ເຊິ່ງສ່ວນໃຫຍມີໂທດຕິດຄຸກຕະຫຼອດຊິວິດໃນຂໍ້ຫາພົວພັນກັບການໂຈມຕີອິດສະລາແອນໃນຊ່ວງເຫດການລຸກຂຶ້ນຕໍ່ສູ້ຂອງປະຊາຊົນຊາວປາເລສໄຕ໌ ໃນຊ່ວງຕົ້ນປີ ຄສ 2000.