ວັນທີ 2 ກັນຍາ 2021 ເວັບໄຊ້ Japan Times ລາຍງານວ່າ ກະຊວງສາທາລະນະສຸກຍີ່ປຸ່ນ ຖະແຫຼງວ່າ ໄດ້ກວດພົບໂຄວິດ-19 ສາຍພັນ Mu ເຊິ່ງອົງການອະນາໄມໂລກຈັດໃຫ້ເປັນສາຍພັນທີ່ຕ້ອງມີການສັງເກດການ (variant of interest) ເຊິ່ງກວດພົບຈາກ ຜູ້ທີ່ເດີນທາງມາຈາກຕ່າງປະເທດ 2 ລາຍ, ຜູ້ປ່ວຍລາຍທໍາອິດແມ່ນ ເພດຍິງ ອາຍຸ 40 ປີ ເຊິ່ງເດີນທາງມາຈາກສະຫະລັດອາຣັບເອມິເຣດ ເມື່ອວັນທີ 26 ມິຖຸນາ ແລະ ອີກລາຍໜຶ່ງແມ່ນ ເພດຍິງ ອາຍຸ 50 ປີ ເດີນທາງມາຈາກສະຫະລາດຊະອານາຈັກ ເມື່ອວັນທີ 5 ກໍລະກົດ ໂດຍທີ່ຮ່າງກາຍຂອງທັງສອງຄົນ ບໍ່ໄດ້ສະແດງອາການເຈັບໄຂ້.

ໂຄວິດ-19 ສາຍພັນ Mu ຫຼື B.1.621 ພົບຄັ້ງທໍາອິດໃນປະເທດໂຄລອມເບຍ ເມື່ອເດືອນ ມັງກອນ ທີ່ຜ່ານມາ ກ່ອນທີ່ຈະມີການແຜ່ລະບາດໃນອັບຟຣິກາໃຕ້ ແລະ ຢູໂຣບ. ເຊິ່ງຂະນະນີ້ ແມ່ນກວດພົບການແຜ່ລະບາດຂອງ Mu ບໍ່ຕໍ່າກວ່າ 40 ປະເທດ
ອົງການອະນາໄມໂລກລະບຸວ່າ ສາຍພັນດັ່ງກ່າວມີການກາຍພັນທີ່ຊີ້ວ່າ ມີແນວໂນ້ມທີ່ສາມາດຫຼີກລ່ຽງພູມຄຸ້ມກັນ ຫຼື ຕໍ່ຕ້ານຕໍ່ວັກຊີນ.

ຢ່າງໃດກໍຕາມ, ຈໍາເປັນຕ້ອງມີການສຶກສາເພີ່ມຕື່ມຕໍ່ໄປ ເພື່ອທໍາຄວາມເຂົ້າໃຈກ່ຽວກັບການແຜ່ເຊື້ອ ແລະ ຄວາມສາມາດໃນການຫຼີກລ່ຽງພູມຄຸ້ມກັນຂອງເຊື້ອສາຍພັນດັ່ງກ່າວ.