ເກີດເຫດບໍ່ຄາດຝັນເທິງເຄື່ອງບິນ ຊີ-17 ຂອງກອງທັບສະຫະລັດອາເມລິກາ ຂະນະລຳລຽງຊາວອາຟການິດສະຖານຫຼາຍຮ້ອຍຊີວິດອອກຈາກນະຄອນຫຼວງກາບູນ, ປະເທດອາຟການິດສະຖານ ກໍມີແມ່ຍິງຖືພາທ້ອງແກ່ລາຍໜຶ່ງເກີດອາການເຈັບທ້ອງກະທັນຫັນພ້ອມໃຫ້ກຳເນີດລູກນ້ອຍເທິງຍົນທີ່ກຳລັງບິນກາງອາກາດ ກ່ອນຈະລົງຈອດທີ່ຖານທັບໃນເຢຍລະມັນພ້ອມນຳສົ່ງສອງແມ່ລູກເຂົ້າໂຮງໝໍຢ່າງປອດໄພ.
ເຫດການດັ່ງກ່າວເກີດຂຶ້ນໃນວັນທີ 22 ສິງຫາ, ທາງເຟດບຸກເພດຈ໌ Air Mobility Command ຫຼື ກອງບັນຊາການຂົນສົ່ງທາງອາກາດສະຫະລັດອາເມລິກາໄດ້ເຜີຍແພ່ພາບການຊ່ວຍເຫຼືອແມ່ຍິງຖືພາທີ່ເຈັບທ້ອງພ້ອມເກີດລູກເທິງເຄື່ອງບິນ. ເບື້ອງຕົ້ນ, ແມ່ຍິງຄົນດັ່ງກ່າວມີອາການແຊກຊ້ອນຍ້ອນຄວາມດັນເລືອດຕໍ່າ ເຮັດໃຫ້ກັບຕັນຍົນຕັດສິນໃຈຄວບຄຸມເຄື່ອງບິນໃຫ້ຕໍ່າລົງກວ່າ 10,000 ຟຸດ ເພື່ອເພີ່ມຄວາມດັນອາກາດພາຍໃນຍົນ ທັງເປັນການຊ່ວຍຮັກສາສະເຖຍລະພາບ ແລະ ຊ່ວຍຊີວິດແມ່ໄດ້.
ທັນທີທີ່ເຄື່ອງບິນລຳດັ່ງກ່າວລົງຈອດທີ່ຖານທັບອາກາດໃນເຢຍລະມັນ, ທັງເຈົ້າໜ້າທີ່ ແລະ ທີມງານແພດກໍໄດ້ຮີບຮ້ອນເຂົ້າຊ່ວຍເຫຼືອສອງແມ່ລູກພ້ອມນຳສົ່ງຕົວໄປໂຮງໝໍທີ່ຢູ່ໃກ້ຄຽງຢ່າງປອດໄພ.