Popcat ໄດ້ສ້າງປະກົດການຄວາມສົນໃຈໃນເຟນບຸກຢ່າງໄວວາໃນປະເທດລາວ ຫຼາຍຄົນອາດສົງໄສວ່າ Popcat ແມ່ນຫຍັງ ແລະ ເປັນຫຍັງຄົນຈໍານວນຫຼາຍຈຶ່ງໃຫ້ຄວາມສົນໃຈຫຼາຍປານນີ້?

Popcat ເປັນຊື່ຂອງເກມທີ່ສາມາດຫຼິ້ນຜ່ານບຣາວເຊີ ໂດຍມີຮູບແມວທີ່ໃຫ້ຄຣິກໃສ່ ເພື່ອໃຫ້ແມວໃນຮູບດັ່ງກ່າວອ້າປາກ ແລະ ສະລັບກັບປິດປາກຕາມທີ່ເຮົາຄຣິກ ໂດຍຈະມີໂຕເລກປາກົດຂຶ້ນຕາມຈໍານວນຄັ້ງທີ່ເຮົາຄຣິກລົງໄປ ເຊິ່ງຄົນທົ່ວໂລກໄດ້ພາກັນຫຼິ້ນຜ່ານທາງໂທລະສັບ ແລະ ຄອມພິວເຕີ, ຈໍານວນການຄຣິກກໍຈະນັບເປັນຄະແນນຂອງແຕ່ລະປະເທດກັນເລີຍ.

ສໍາລັບເກມ Popcat ແມ່ນຖືກສ້າງໂດຍ Joshua O’Sullivan, Edward Halis ແລະ Freddy Heppell ນັກສຶກສາສາຂາວິທະຍາກອນຄອມພິວເຕີ ຈາກ University of Sheffield ເລີ່ມເປີດໃຫ້ຫຼິ້ນໃນວັນທີ 11 ທັນວາ 2020 ທີ່ຜ່ານມາ ໂດຍການນໍາເອົາແມວທີ່ມີຊື່ວ່າ Oatmeal ທີ່ໂດ່ງດັງໃນອິນເຕີເນັດມາເປັນຕົວລະຄອນຫຼັກໃນເກມ.

ເຊິ່ງປັດຈຸບັນ, ລາວເຮົາແມ່ນກໍາລັງຢູ່ໃນອັນດັບທີ 14 (ອັບເດດລ່າສຸດວັນທີ 16 ສິງຫາ 2021 ເວລາ 9:00) ເຊິ່ງຂຶ້ນມາຈາກອັນດັບເກືອບທີ 70 ແລະ ຂຶ້ນມາອັນດັບທີ 14 ໄດ້ພຽງຊົ່ວຂ້າມຄືນເທົ່ານັ້ນ.