ຍອດຜູ້ຕິດເຊື້ອໂຄວິດ-19 ໃນສະຫະລັດອາເມລິກາພຽງໜຶ່ງອາທິດຂອງຕົ້ນເດືອນນີ້ ມີຈຳນວນສູງເຖິງ 7.101 ຄົນ, ໃນນັ້ນເສຍຊີວິດ 1.507 ຄົນ ເຖິງແມ່ນກຸ່ມຄົນທີ່ຕິດເຊື້ອດັ່ງກ່າວຈະໄດ້ຮັບວັກຊີນປ້ອງກັນໄວຣັສຄົບຖ້ວນແລ້ວກໍຕາມ.
ສຳນັກຂ່າວຊີເອັນເອັນລາຍງານວ່າ: ປັດຈຸບັນປະຊາກອນອາເມລິກາ 164 ລ້ານກວ່າຄົນໄດ້ຮັບການສັກວັກຊີນປ້ອງກັນໂຄວິດ-19 ຄົບຖ້ວນ ຂະນະທີ່ 0.005% ຕິດເຊື້ອໂຄວິດຈົນຕ້ອງໄດ້ເຂົ້າປິ່ນປົວຢູ່ໂຮງໝໍ ແລະ 0.001% ເສຍຊີວິດ ແຕ່ຈຳນວນຜູ້ເສຍຊີວິດ 1/5 ແມ່ນເກີດຈາກພາວະແຊກຊ້ອນອື່ນໆທີ່ບໍ່ແມ່ນໄວຣັສສາຍພັນໃໝ່ ແລະ ສ່ວນໃຫຍ່ກໍແມ່ນຄົນທີ່ມີອາຍຸ 65 ປີຂຶ້ນໄປ ເຖິງແມ່ນກຸ່ມຄົນເຫຼົ່ານີ້ຈະຕິດເຊື້ອໂຄວິດກໍຕາມ.
ຢ່າງໃດກໍຕາມ, ມີປະຊາກອນປະມານ 99.99% ທີ່ສັກວັກຊີນຕ້ານໂຄວິດ-19 ຄົບຖ້ວນແມ່ນສາມາດຫຼຸດພົ້ນຈາກການຕິດເຊື້ອ ຫຼື ເສຍຊີວິດຈາກໄວຣັສໂຄໂຣນ່າສາຍພັນໃໝ່. ສຳລັບກໍລະນີການຕິດເຊຶ້ອພາຍຫຼັງສັກວັກຊີນນັ້ນ ຖືເປັນສິ່ງທີ່ທາງການແພດຄາດການໄວ້ລ່ວງໜ້າ ເນື່ອງຈາກຍັງບໍ່ມີວັກຊີນຊະນິດໃດ ມີປະສິດທິພາບໃນການປ້ອງກັນການຕິດເຊື້ອໄດ້ເຕັມຮ້ອຍ ແຕ່ກໍມີຫຼັກຖານບາງຢ່າງສະແດງໃຫ້ເຫັນວ່າ ວັກຊີນ ອາດເປັນຕົວຊ່ວຍໃຫ້ອາການຕິດເຊື້ອໂຄວິດເບົາບາງລົງໄດ້.
ຂໍ້ມູນຈາກ: MGR Online