ທ່ານ ພັນຄໍາ ວິພາວັນ, ນາຍົກລັດຖະມົນຕີແຫ່ງ ສປປ ລາວ ໄດ້ຮຽກຮ້ອງບັນດາແຮງງານລາວຜູ້ທີ່ຕ້ອງການກັບຄືນປະເທດ ແມ່ນໃຫ້ເດີນທາງກັບມາແບບຖືກຕ້ອງຕາມຂັ້ນຕອນຂອງລະບຽບການ, ຫ້າມບໍ່ໃຫ້ມີການລັກລອບເຂົ້າ-ອອກ ຕາມລຳພັງ ທັງນີ້ກໍເພື່ອເປັນການປ້ອງກັນບໍ່ໃຫ້ເຊື້ອພະຍາດໂຄວິດລະບາດໃນຊຸມຊົນ.
ທ່ານນາຍົກກ່າວຕື່ມວ່າ: ລັດຖະບານຖືວ່າ ການເດີນທາງເຂົ້າມາປະເທດຢ່າງຖືກຕ້ອງນັ້ນ ເປັນການກະທຳທີ່ຮັກຊາດ ຮັກບ້ານເກີດເມືອງນອນຂອງຕົນຢ່າງແທ້ຈິງ. ກົງກັນຂ້າມ, ບຸກຄົນໃດຫາກລັກລອບເຂົ້າມາ ຈະແມ່ນດ້ວຍເສັ້ນທາງໃດກໍຕາມ ຖືວ່າເປັນຜູ້ມີຄວາມຜິດຕາມກົດໝາຍ ແລະ ເປັນຜູ້ນຳເອົາຜົນເສຍຫາຍມາໃຫ້ປະເທດຊາດ ເຊິ່ງຈະຖືກດຳເນີນຄະດີຕາມກົດໝາຍຂອງ ສປປ ລາວ.
“ແຮງງານລາວທີ່ລັກລອບອອກນອກປະເທດຜິດກົດໝາຍກໍຄວນເດີນທາງກັບມາຢ່າງຖືກຕ້ອງ ໂດຍໃຫ້ພົວພັນກັບເຈົ້າໜ້າທີ່ສະຖານທູດ, ກົງສູນລາວ ແລະ ເຈົ້າໜ້າທີ່ກ່ຽວຂ້ອງ ແລ້ວສາມາດເດີນທາງຜ່ານດ່ານຕ່າງໆຢ່າງເປັນທາງການໄດ້.” ທ່ານນາຍົກກ່າວໃນໂອກາດຖະແຫຼງຂ່າວຕໍ່ສື່ມວນຊົນກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດຂອງພະຍາດ ໂຄວິດ-19 ຢູ່ ສປປ ລາວ, ໃນວັນທີ 20 ກໍລະກົດ 2021 ທີ່ສໍານັກງານນາຍົກລັດຖະມົນຕີ.
ຂໍ້ມູນຈາກ: Lao National Radio