Media Laos: ພາກສ່ວນກ່ຽວຂ້ອງຂອງແຂວງສະຫວັນນະເຂດໄດ້ສ້າງໂຮງໝໍພາກສະໜາມເພີ່ມ ສາມາດຮອງຮັບຜູ້ປ່ວຍໂຄວິດໄດ້ເຖິງ 1.000 ຄົນ ທັງນີ້ກໍເພື່ອເປັນການຮອງຮັບສະຖານທີ່ປິ່ນປົວສຳລັບຜູ້ຕິດເຊື້ອພະຍາດໂຄວິດ 19 ໃຫ້ພຽງພໍ ແລະ ຫຼີກລ່ຽງຄວາມແອອັດຂອງຜູ້ຕິດເຊື້ອພາຍໃນສູນປິ່ນປົວ.
ໂຮງໝໍພາກສະໜາມແຫ່ງໃໝ່ນີ້, ທາງຄະນະສະເພາະກິດແຂວງສະຫວັນນະເຂດ ໄດ້ກຳນົດເອົາ ບໍລິສັດອາເດີລານ ລາວຈຳກັດ ເປັນໂຮງໝໍສຳລັບປິ່ນປົວຜູ້ຕິດເຊື້ອພະຍາດໂຄວິດ 19 ເຊິ່ງຈຸດດັ່ງກ່າວແມ່ນມີພື້ນທີ່ກວ້າງຂວາງ ທັງຫ່າງໄກຈາກຊຸມຊົນ ແລະ ສາມາດຮອງຮັບຜູ້ຕິດເຊື້ອໄດ້ສູງເຖິງ 1.000 ຄົນ ຂະນະທີ່ປັດຈຸບັນໂຮງໝໍດັ່ງກ່າວສາມາດເປີດໃຫ້ບໍລິການປິ່ນປົວເປັນທີ່ຮຽບຮ້ອຍແລ້ວ.
ອີງຕາມບົດລາຍງານຂອງຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດພະຍາດໂຄວິດ 19 ຂັ້້ນແຂວງ ໃນວັນທີ 13 ກໍລະກົດ 2021 ຮູ້ວ່າ: ທົ່ວແຂວງສະຫວັນນະເຂດພົບຜູ້ຕິດເຊື້ອພະຍາດໂຄວິດ 19 ສະສົມທັງໝົດ 427 ກໍລະນີ, ຕິດເຊື້ອໃໝ່ 7 ກໍລະນີ, ກໍາລັງປິ່ນປົວ 282 ກໍລະນີ. ໃນນັ້ນ, ເປັນແຮງງານນຳເຂົ້າຈຳນວນ 401 ກໍລະນີ ແລະ ອາດຈະມີຜູ້ຕິດເຊື້ອເພີ່ມຂຶ້ນອີກໃນແຕ່ລະວັນ.
