ເນື່ອງຈາກສະຖານະການໂຄວິດ-19 ຮຸນແຮງທີ່ຍັງລະບາດຢູ່ໃນປັດຈຸບັນນີ້ ມົນຕີທັງ 11 ຊາດໄດ້ເຂົ້າຮ່ວມການປະຊຸມທາງໄກ ເພື່ອພິຈາລະນາກໍລະນີຫວຽດນາມ ທີ່ຈະເປັນເຈົ້າພາບຊີເກມ ຄັ້ງທີ 31 ຈະຂໍເລື່ອນຈັດການແຂ່ງຂັນຈາກວັນທີ 21 ພະຈິກ ຫາ ວັນທີ 2 ທັນວາ ປີ 2021 ອອກໄປເປັນເດືອນ ເມສາ ຫຼື ພຶດສະພາ ປີ 2022.
ທີ່ປະຊຸມ ໄດ້ຂໍໃຫ້ຫວຽດນາມໃຫ້ຄໍາຕອບທີ່ຊັດເຈນວ່າ ສາມາດຈັດການແຂ່ງຂັນຕາມກໍານົດເກົ່າ ຫຼື ບໍ່, ເຊິ່ງຜູ້ແທນຂອງຫວຽດນາມຍັງຄົງພະຍາຍາມຕໍ່ລອງຈະໃຫ້ຄໍາຕອບພາຍໃນ 10 ມື້ຂ້າງໜ້າ ແຕ່ໃນທີ່ສຸດ ປະທານທີ່ປະຊຸມ ກໍໄດ້ຂໍໃຫ້ທຸກຊາດລົງມະຕິວ່າ ຈະຍັງຄົງໃຫ້ມີການແຂ່ງຂັນຕາມກໍານົດເກົ່າ ຫຼື ບໍ່ ເນື່ອງຈາກສະຖານະການແຜ່ລະບາດຂອງເຊື້ອພະຍາດ ໂຄວິດ-19 ໃນປັດຈຸບັນນີ້ຍັງຮຸນແຮງຢູ່ ເຊິ່ງທີ່ປະຊຸມໄດ້ລົງມະຕິດ້ວຍຄະແນນສຽງ 10 ຊາດ ແລະ ຫວຽດນາມແມ່ນໃຫ້ງົດອອກສຽງ ໃຫ້ຍົກເລີກການແຂ່ງຂັນກິລາຊີເກມ ຄັ້ງທີ 31 ສ່ວນການທີ່ຫວຽດນາມ ຈະຂໍເລື່ອນໄປຈັດເດືອນເມສາ-ພຶດສະພາ ໃນປີໜ້ານັ້ນ ໃຫ້ເປັນເລື່ອງທີ່ໂອລິມປິກຫວຽດນາມຕ້ອງໄປລົມກັບທາງລັດຖະບານເພື່ອໃຫ້ຄໍາຕອບທີ່ຊັດເຈນ ກ່ອນນໍາສະເໜີເຂົ້າສະຫະພັນຊີເກມອີກຄັ້ງ.