ພາກສ່ວນທີ່ກ່ຽວຂ້ອງໄດ້ກຳນົດ 7 ບ້ານທີ່ຂຶ້ນກັບເມືອງໂພນໂຮງ, ແຂວງວຽງຈັນ ເພື່ອເປັນເຂດແດງໃນການເຝົ້າລະວັງການແຜ່ລະບາດຂອງພະຍາດໂຄວິດ-19, ພາຍຫຼັງເກີດການແຜ່ລະບາດເປັນວົງກວ້າງໃນບັນດາໝູ່ບ້ານດັ່ງກ່າວໃນປັດຈຸບັນ.
ວັນທີ 7 ກໍລະກົດ, ມີຜູ້ຕິດເຊື້ອໂຄວິດໃນຊຸມຊົນໃນ 7 ບ້ານເຂດແດງແລ້ວ 45 ຄົນ ລວມມີ ບ້ານຫລັກ 52, ນາເລົາ, ບ້ານໃໝ່, ນາບອນ, ໜອງປຸ່ງ, ໂພນທັນ, , ແລະ ບ້ານສີວິໄລ ເຮັດໃຫ້ຍອດຜູ້ຕິດເຊື້ອສະສົມທົ່ວແຂວງວຽງຈັນຂະນະນີ້ພຸ່ງຂຶ້ນຮອດ 65 ຄົນ.
ທ່ານ ສົມປະສົງ ສຸວັນຄໍາຈັນ, ເຈົ້າເມືອງໆ ໂພນໂຮງ, ແຂວງວຽງຈັນ ໃຫ້ສໍາພາດວ່າ: ທັງ 7 ບ້ານທີ່ຖືກກຳນົດເປັນເຂດແດງ ແມ່ນອະນຸຍາດໃຫ້ເດີນທາງເຂົ້າ-ອອກສະເພາະຜູ້ທີ່ມີຄວາມຈຳເປັນເທົ່ານັ້ນ ໂດຍມີທຸກຂະແໜງການຂອງແຂວງ, ເມືອງ ແລະ ບ້ານທີ່ກ່ຽວຂ້ອງ ເຮັດວຽກຮ່ວມກັນ ເພື່ອຄວບຄຸມການລະບາດຂອງພະຍາດໂຄວິດ-19 ຢ່າງເຂັ້ມງວດ ແລະ ໄດ້ເກັບຕົວຢ່າງຜູ້ທີ່ສໍາຜັດໃກ້ຊິດກັບຜູ້ຕິດເຊື້ອໄປກວດຫາເຊື້ອແລ້ວ 280 ຕົວຢ່າງ ເຊິ່ງປັດຈຸບັນກຳລັງລໍຟັງຜົນກວດ.
ສໍາລັບຜູ້ທີ່ມີຈຸດປະສົງເດີນທາງໄປທາງພາກເໜືອ ຫຼື ເດີນທາງເຂົ້າໄປແຂວງວຽງຈັນ ແຕ່ມີຄວາມຈຳເປັນຕ້ອງຜ່ານບັນດາບ້ານທີ່ກຳນົດເປັນເຂດແດງ ແມ່ນສາມາດເດີນ ທາງຜ່ານໄດ້ ແຕ່ຫ້າມຈອດລົດເດັດຂາດ ເພາະແຕ່ລະບ້ານມີເຈົ້າໜ້າທີ່ກ່ຽວຂ້ອງເວນຍາມຢ່າງເຂັ້ມງວດຈົນກວ່າຈະຄົບກຳນົດ 14 ວັນ.