ໃນວັນທີ 2 ເມສາ 2021 ທີ່ຜ່ານມາ ສໍານັກຂ່າວຕ່າງປະເທດ ໄດ້ລາຍງານເຖິງອຸບັດຕິເຫດທີ່ໄຕ້ຫວັນ, ປະເທດຈີນ ວ່າມີລົດໄຟສາຍດ່ວນຂອງໄຕ້ຫວັນຖ້ຽວທີ 408 ຈາກສະຖານີຊູຫຼິນໃນນະຄອນນິວໄທເປ ທີ່ກໍາລັງເດີນທາງໄປທີ່ເມືອງໄຖຕົງ ໄດ້ຕົກລາງໃນຂະນະທີ່ມີຜູ້ໂດຍສານຢູ່ໃນລົດໄຟທັງໝົດ 374 ຄົນ ໂດຍເຫດການໃນຄັ້ງນີ້ເກີດຈາກລົດບັນທຸກທີ່ລືມໃສ່ເບກມືແລ້ວໄຫຼຕົກລົງຈາກພູທັບໃສ່ລົດໄຟທີ່ກໍາລັງແລ່ນຢູ່ຢ່າງແຮງເຮັດໃຫ້ລົດໄຟຄັນດັ່ງກ່າວຕົກລາງຈົນເກີດມີຜູ້ບາດເຈົບ ແລະ ເສຍຊີວິດ.
ອຸບັດຕິເຫດດັ່ງກ່າວໄດ້ສົ່ງຜົນເຮັດໃຫ້ມີຜູ້ໂດຍສານເສຍຊີວິດຢ່າງໜ້ອຍ 48 ຄົນ ໃນນີ້ເປັນພະນັກງານຂັບລົດໄຟ 1 ຄົນ, ມີຜູ້ບາດເຈັບ 86 ຄົນ. ສ່ວນຫົວລົດໄຟແມ່ນໄດ້ຮັບຄວາມເສຍຫາຍຢ່າງໜັກ. ສຸດທ້າຍຕໍາຫຼວດໄດ້ເຂົ້າຈັບກຸມທ້າວ ຫຼີ່ ອາຍຸ 45 ປີ ຄົນຂັບລົດບັນທຸກຂອງບໍລິສັດຮັບເໝົາສ້ອມແປງໜ້າຜາຂ້າງທາງລົດໄຟຂອງການລົດໄຟໄຕ້ຫວັນ ທີ່ເຮັດໃຫ້ເກີດອຸບັດຕິເຫດຮ້າຍແຮງໃນຄັ້ງນີ້.
