ຜູ້ປະທ້ວງໃນເຂດຕ່າເກ່ຕະ ທາງຕະເວັນອອກຂອງນະຄອນຍ່າງກຸ້ງ ໃນປະເທດມຽນມາ ນຳຂີ້ເຫຍື້ອມາເທຕາມຖະໜົນຫົນທາງ ເມື່ອວັນທີ 30 ມີນາ 2021 ເພື່ອປະທ້ວງຕໍ່ຕ້ານລັດຖະປະຫານທີ່ເກີດຂື້ນເມື່ອວັນທີ 1 ກຸມພາ ທີ່ຜ່ານມາ, ຂະນະດຽວກັນ ຈຳນວນຜູ້ເສຍຊີວິດຈາກການສະຫຼາຍການຊຸມນຸມທົ່ວປະເທດມີຈຳນວນຫຼາຍກວ່າ 500 ຄົນແລ້ວ.
ດ້ານສະມະຄົມຊ່ວຍເຫຼືອເພື່ອນັກໂທດການເມືອງ (AAPP) ເຜິີຍວ່າ ມີປະຊາຊົນຖືກສັງຫານທົ່ວປະເທດ 14 ຄົນແລ້ວ ເມື່ອວັນຈັນ (29 ມີນາ 2021) ເຊິ່ງ 8 ຄົນໃນກຸ່ມນີ້ຖືກຍິງເສຍຊີວິດທີ່ເຂດຕະໂກ່ງໃຕ້ໃນນະຄອນຍ່າງກຸ້ງ, ການເສຍຊີວິດດັ່ງກ່າວເຮັດໃຫ້ຈຳນວນປະຊາຊົນໃນຊ່ວງເວລາເກືອບ 2 ເດືອນຫຼັງຈາກ ລັດຖະປະຫານຄັ້ງລ່າສຸດມີປະມານ 510 ຄົນແລ້ວ ເຊິ່ງການປະທ້ວງເມື່ອວັນທີ 28 ມີນາ 2021 ເປັນວັນທີ່ມີຜູ້ເສຍຊີວິດສູງສຸດທີ່ 141 ຄົນ.
ຜູ້ເຫັນເຫດການຫຼາຍຄົນກ່າວວ່າ ເມື່ອວັນ 29 ມີນາ 2021 ທະຫານ ແລະ ຕຳຫຼວດມຽນມາໃຊ້ອາວຸດໜັກກວ່າທີ່ເຄີຍໃຊ້ທີ່ຜ່ານມາ ແຕ່ຍັງບໍ່ຊັດເຈນວ່າເປັນອາວຸດລຸ້ນໃດ.
ດ້ານສະຖານີໂທລະພາບຂອງທະຫານມຽນມາ ກ່າວອອກອາກາດໂຈມຕີຜູ້ປະທ້ວງຕໍ່ຕ້ານລັດຖະປະຫານຢ່າງໜັກວ່າເປັນ “ກຸ່ມຄົນກໍ່ການຮ້າຍດ້ວຍຄວາມຮຸນແຮງ”.
ທ່ານ ອັນໂຕນິອູ ກູເຕຣຣີດ ເລຂາທິການໃຫຍ່ອົງການສະຫະປະຊາຊາດ ( UN ) ຮຽກຮ້ອງໃຫ້ທະຫານມຽນມ້າຢຸດຂ້າປະຊາຊົນ ແລະ ຢຸດຕິການປາບປາມຜູ້ຊຸມນຸມ.
ການໃຊ້ຄວາມຮຸນແຮງດັງກ່າວຂອງທະຫານມຽນມາ ສ້າງຄວາມກັງວົນໃຫ້ກັບກຸ່ມກອງກຳລັງໃນປະເທດເພີ່ມອີກຫຼາຍກຸ່ມ, ເມື່ອບໍ່ດົນມານີ້ ມີກຸ່ມກອງກຳລັງທີ່ປະກອບດ້ວຍກອງກຳລັງພັນທະມິດປະຊາທິປະໄຕແຫ່ງຊາດມຽນມາ, ກອງກຳລັງອາຣະກັນ ແລະ ກອງກຳລັງປົດປ່ອຍແຫ່ງຊາດຕະອາງ ເຕືອນກອງທັບມຽນມາວ່າ ຖ້າຫາກບໍ່ຢຸດຂ້າ ປະຊາຊົນທີ່ຊຸມນຸມດ້ວຍຄວາມສະຫງົບ ພວກຕົນຈະຮ່ວມມືກັບກອງກຳລັງອື່ນໆ ເພື່ອຕໍ່ສູ້ກັບກອງທັບມຽນມາ.
ສ່ວນກອງກຳລັງສະຫະພາບແຫ່ງຊາດກະຫລ່ຽງ ( KNU ) ທີ່ຕໍ່ສູ້ກັບກອງທັບມຽນມາຢ່າງຍາວນານ ແຕ່ເຄີຍລົງນາມຢຸດຍິງໄປແລ້ວ ກໍ່ກັບມາຕໍ່ສູ້ອີກຄັ້ງ ສິ່ງດັ່ງກ່າວເຮັດໃຫ້ຊາວບ້ານປະມານ 3,000 ຄົນ ໜີເຂົ້າໄປໃນປະເທດໄທ ຫຼັງຈາກກອງທັບມຽນມາໄດ້ນຳໃຊ້ເຮືອບິນຖີ້ມລະເບີດໃສ່ເຂດ KNU ເພື່ອແກ້ແຄ້ນທີ່ KNU ຍຶດຖານທັບ ແລະ ຂ້າທະຫານໄປ 10 ຄົນ.
ຮຽບຮຽງຂ່າວ: ພຸດສະດີ