ສຳນັກຂ່າວຣອຍເຕີລາຍງານສະຖານະການລັດຖະປະຫານໃນມຽນມາປາບປາມຜູ້ປະທ້ວງທີ່ນັບມື້ນັບຮຸນແຮງຂຶ້ນ. ສະຫະປະຊາຊາດ (UNDP) ອອກຖະແຫຼງການວ່າ ສະເພາະວັນທີ 3 ມີນາ 2021 ມີຜູ້ປະທ້ວງຕາມເມືອງຕ່າງໆ ຖືກສັງຫານລວມກັນເຖິງ 30 ຄົນ ຖືເປັນສະຖິຕິວັນນອງເລືອດທີ່ຮຸນແຮງທີ່ສຸດ ນັກຕັ້ງແຕ່ເກີດການລັດຖະປະຫານຂຶ້ນໃນວັນທີ 1 ກຸມພາ ທີ່ຜ່ານມາ.
ທ່ານ ນາງ ຄຣິສທິນ ຊຣາເນີ ບຣູເກເນີ ທູດພິເສດສະຫະປະຊາຊາດດ້ານມຽນມາ ໄດ້ກ່າວວ່າ “ວັນນີ້ເປັນວັນນອງເລືອດສູງສຸດນັບຈາກມີລັດຖະປະຫານເກີດຂຶ້ນ ສະເພາະວັນນີ້ (3 ມີນາ) ມີປະຊາຊົນເສຍຊີວິດ 38 ຄົນ ແລະ ມີຈຳນວນຜູ້ເສຍຊີວິດເກີນ 50 ຄົນແລ້ວ ນັບຈາກທີ່ເກີດລັດຖະປະຫານ ພ້ອມຍັງມີຜູ້ໄດ້ຮັບບາດເຈັບອີກຈຳນວນຫຼາຍ”.
ທ່ານນາງເອກອັກຄະລັດຖະທູດຍິງກ່າວວ່າ ໃນລະຫວ່າງການສົນທະນາກັບທ່ານ ໂຊວິນ ຮອງຜູ້ນຳ ກອງທັບມຽນມາ ຈາກນັ້ນທ່ານໄດ້ເຕືອນວ່າ ທະຫານຈະຕ້ອງປະເຊີນກັບມາດຕະການທີ່ໂຫດຮ້າຍຈາກບາງປະເທດ ແລະ ຈະຖືກໂດດດ່ຽວເພື່ອຕອບໂຕ້ການລັດຖະປະຫານໃນຄັ້ງນີ້ ແຕ່ຄຳຕອບທີ່ຂ້າພະເຈົ້າໄດ້ຮັບບໍ່ແມ່ນຄວາມສົນໃຈ.
ທັງນີ້, ຄະນະລັດຖະມົນຕີຄວາມໝັ້ນຄົງຂອງ UNDP ຈະເປີດການຫາລືກ່ຽວກັບະຖານະການໃນມຽນມາໃນກອງປະຊຸມປິດໃນວັນສຸກທີ 5 ມີນາ 2021 ໃນຂະນະທີ່ລັດຖະບານອາເມລິກາຮຽກຮ້ອງໃຫ້ຈີນມີບົດບາດທີ່ສ້າງສັນໃນກອງທັບມຽນມາເພື່ອຢຸດຕິການໃຊ້ຄວາມຮຸນແຮງ.
ໂຄສົກກະຊວງການຕ່າງປະເທດທ່ານ ເນັດ ໄພຣຊ໌ ກ່າວວ່າສະຫະລັດຮູ້ສຶກຕົກຕະລຶງຍ້ອນຄວາມຮຸນ ແຮງທີ່ເພີ່ມທະວີຂຶ້ນ ປະທານາທິບໍດີໂຈ ໄບເດນ ກຳລັງທົບທວນມາດຕະການຕອບໂຕ້ທີ່ແນໃສ່ກອງ ທັບມຽນມາໂດຍກົງ. ນອກຈາກນີ້, ສະຫະລັດຍັງຮຽກຮ້ອງໃຫ້ມຽນມາປ່ອຍຕົວນັກຂ່າວທີ່ພົວພັນກັບ ສຳ ນັກຂ່າວສານສະຫະລັດໃນທັນທີຫຼັງຈາກກອງທັບມຽນມາໄດ້ຈັບຕົວນັກຂ່າວ AP, ດຳເນີນຄະດີ ພ້ອມດ້ວຍນັກຂ່າວອີກ 5 ຄົນ.
ຮຽບຮຽງຂ່າວ: ພຸດສະດີ