ກະຊວງພະລັງງານ ແລະ ບໍ່ແຮ່ໃຫ້ຮູ້ວ່າ: ລັດມີແຜນຈະກວດກາເລື່ອງຄວາມປອດໄພຂອງເຂື່ອນໄຟຟ້າຕ່າງໆໃນຂອບເຂດທົ່ວປະເທດ ພາຍຫຼັງທີ່ພົບວ່າໃນໄລຍະທີ່ຜ່ານມາໄດ້ມີເຂື່ອນໄຟຟ້າຈໍານວນໜຶ່ງໄດ້ແຕກເຊິ່ງໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນເປັນຈໍານວນຫຼາຍ.
ໜັງສືພິມວຽງຈັນທາມ ລາຍງານວ່າ ທ່ານບົວເທບ ມາໄລຄໍາ, ຫົວໜ້າ ກົມຄຸ້ມຄອງພະລັງງານ, ກະຊວງພະລັງງານແລະ ບໍ່ແຮ່ ໄດ້ກ່າວຕໍ່ທີມງານວຽງຈັນທາຍ ເມື່ອບໍ່ດົນມານີ້ວ່າ: ໃນອີກສອງສາມປີຕໍ່ໜ້າ ຈະເລີ່ມມີການກວດກາຄວາມປອດໄພຕ່າງໆຂອງເຂື່ອນໄຟຟ້າໃນຂອບເຂດທົ່ວປະເທດ ເຊິ່ງມີ 78 ແຫ່ງ ໃນປັດຈຸບັນ ໂດຍມີກຳລັງຕິດຕັ້ງທັງໝົດ 9.972MW.
ກະຊວງພະລັງງານ ແລະ ບໍ່ແຮ່ໃຫ້ຮູ້ຕື່ມອີກວ່າ: ເຂື່ອນທີ່ມີຢູ່ແລ້ວທີ່ກຳລັງຈະຖືກກວດກາ ແລະ ມີຫຼາຍແຫ່ງທີ່ກຳລັງກໍ່ສ້າງພາຍໃຕ້ການຊີ້ນຳຂອງຊ່ຽວຊານສາກົນ, ເຊິ່ງໄດ້ເຮັດໃຫ້ປະເທດລາວມີສະມາຊິກໃນຄະນະກຳມາທິການສາກົນກ່ຽວກັບເຂື່ອນໄຟຟ້າ ຂະໜາດໃຫຍ່. ສປປ ລາວມີເປົ້າໝາຍໃນການສ້າງເຂື່ອນໄຟຟ້າໃຫ້ໄດ້ 100 ແຫ່ງ ຮອດປີ 2030.
ການສົ່ງອອກກະແສໄຟຟ້າແມ່ນລາຍໄດ້ຕົ້ນຕໍຂອງປະເທດລາວ ໂດຍສົ່ງອອກໄປໄທ, ຫວຽດນາມ, ກຳປູເຈຍ ແລະ ມຽນມາ.
ຮຽບຮຽງຂ່າວ: ພຸດສະດີ