ສຳນັກຂ່າວຕ່າງປະເທດ ລາຍງານວ່າ ອັງກິດກາຍເປັນປະເທດທຳອິດໃນໂລກທີ່ມີການອະນຸມັດວັກຊີນໂຄວິດ-19 ຂອງບໍລິສັດ Pfizer-BioNTech ເຊິ່ງມີປະສິດທິພາບໃນການປ້ອງກັນໂຣກໂຄວິດ-19 ໄດ້ສູງເຖິງ 95% ໂດຍໜ່ວຍງານ ຂອງອັງກິດລະບຸວ່າ ຈະສາມາດເລີ່ມຊັກວັກຊີນດັ່ງກ່າວໄດ້ຕັ້ງແຕ່ອາທິດໜ້າເປັນຕົ້ນໄປ ແລະ ຈະເລີ່ມຕົ້ນຊັກໃຫ້ກັບກຸ່ມທີ່ມີຄວາມສ່ຽງຫຼາຍທີ່ສຸດ.
ອັງກິດໄດ້ສັ່ງວັກຊີນກວ່າ 40 ລ້ານໂດສ ເຊິ່ງສາມາດຊັກໃຫ້ປະຊາຊົນໄດ້ 20 ລ້ານຄົນ ວັກຊີນຂອງບໍລິສັດ Pfizer-BioNTech ຖືເປັນວັກຊີນຕົວທຳອິດທີ່ປະສົບຄວາມສຳເລັດ ເຊິ່ງໃຊ້ເວລາພັດທະນາ 10 ເດືອນ.
ເຖິງແມ່ນວ່າການຊັກວັກຊີນແລ້ວ ແຕ່ປະຊາຊົນອັງກິດກໍ່ຍັງຕ້ອງປະຕິບັດການຮັກສາໄລຍະຫ່າງທາງສັງຄົມ, ການໃສ່ໜ້າກາກອານາໄມ, ການກວດຫາເຊື້ອໃນກຸ່ມສ່ຽງ ແລະ ການກັກຕົວ ເພື່ອຢັບຢັ້ງການລະບາດຂອງໂຣກໂຄວິດ-19.
ຮຽບຮຽງຂ່າວ: ພຸດສະດີ