ໜັງສືພິມວຽງຈັນໃໝ່ ລາຍງານວ່າ ການກໍ່ສ້າງທາງດ່ວນວຽງຈັນ-ວັງວຽງ ແມ່ນໄດ້ເລີ່ມລົງມືກໍ່ສ້າງນັບແຕ່ ວັນທີ 30 ທັນວາ 2018 ມາຮອດປັດຈຸບັນແມ່ນສໍາເລັດປະມານ 90% ແລະ ຄາດວ່າຈະເປີດການນໍາໃຊ້ຢ່າງເປັນທາງການໃນວັນທີ 2 ທັນວາ 2020 ເຊິ່ງກົງກັບວັນຊາດຂອງ ສປປ ລາວ ຄົບຮອບ 45 ປີ.
ທາງດ່ວນວຽງຈັນ-ວັງວຽງ ມີຄວາມຍາວທັງໝົດ 109 ກິໂລແມັດ, ກວ້າງ 23 ແມັດ, ຖືກອອກແບບຕາມມາດຕະຖານທາງດ່ວນ ຂອງ ສປ ຈີນ, ມີ 4 ຊ່ອງທາງຈະລາຈອນ, ມີ 2 ແລວ ໄປ-ກັບ ຜ່ານ 4 ເມືອງ ນັບແຕ່ເມືອງນາຊາຍທອງ ນະຄອນຫຼວງວຽງຈັນ ຫາ ເມືອງໂພນໂຮງ, ຫີນເຫີບ ແລະ ເມືອງວັງວຽງ ແຂວງວຽງຈັນ; ຄວາມໄວອອກແບບແມ່ນ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ມີອຸໂມງ 1 ແຫ່ງ (ເຂດພູພະນັງ), ມີຂົວຂ້າມທັງໝົດ 34 ແຫ່ງ ເຊິ່ງປະກອບດ້ວຍຂົວຂ້າມທາງ ເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານທົ່ວໄປ 23 ຈຸດ.
ຮຽບຮຽງຂ່າວ: ພຸດສະດີ