ບໍລິສັດ ຜະລິດ-ໄຟຟ້າລາວ ມະຫາຊົນ (EDL – Gen) ໄດ້ແຈ້ງໃຫ້ຜູ້ຖືຫຸ້ນວ່າບໍ່ອະນຸມັດຈ່າຍເງິນປັນຜົນຈາກການດໍາເນີນທຸລະກິດຂອງບໍລິສັດໃນໄລຍະ 6 ເດືອນຕົ້ນປີ 2020 ເນື່ອງຈາກການຜະລິດໄຟຟ້າບໍ່ໄດ້ຕາມແຜນທີ່ວາງໄວ້.
ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ອອກໜັງສືໃບລາຍງານຂອງ ບໍລິສັດ ເລກທີ 136/ຜ-ຟຟລ ລົງວັນທີ 25 ສິງຫາ 2020 ກ່ຽວກັບການແຈ້ງມະຕິທີ່ສໍາຄັນຂອງກອງປະຊຸມສະພາບໍລິຫານສະໄໝສາມັນຄັ້ງທີ 3/2020 ຕໍ່ສໍານັກງານຄະນະກໍາມະການຄຸ້ມຄອງຫຼັກຊັບ ແລະ ຕະຫຼາດຫຼັກຊັບລາວ ຮັບຊາບໂດຍມີວາລະສໍາຄັນ ດັ່ງນີ້:
1. ກ່ຽວກັບການຮັບຮອງເອົາບົດລາຍງານການດໍາເນີນທຸລະກິດ ລວມທັງລາຍງານການເງິນຂອງບໍລິສັດ 6 ເດືອນຕົ້ນປີ 2020 (01/01/2020 – 30/06/2020) ເຊິ່ງຜູ້ກວດສອບພາຍນອກໄດ້ມີການທົບທວນແລ້ວ ແລະ ໃຫ້ນໍາເລື່ອງນີ້ລາຍງານຕໍ່ກອງປະຊຸມສາມັນຜູ້ຖືຫຸ້ນ ປະຈໍາປີ 2020 ເພື່ອພິຈາລະ ນາຮັບຮອງ.
2. ອະນຸມັດບໍ່ຈ່າຍເງິນປັນຜົນຈາກການດໍາເນີນທຸລະກິດຂອງບໍລິສັດ 6 ເດືອນຕົ້ນປີ 2020 (01/01/2020 – 30/06/2020) ເນື່ອງຈາກສະພາບອາກາດໃນລະດູຝົນບໍ່ເອື້ອອໍານວຍ, ແຫ້ງແລ້ງ, ຝົນບໍ່ຕົກຖືກຕາມລະດູການ ສົ່ງຜົນເຮັດໃຫ້ມີນໍ້າບໍ່ພຽງພໍເຂົ້າໃນການຜະລິດພະລັງງານໄຟຟ້າ ແລະ ເຮັດໃຫ້ການຜະລິດບໍ່ໄດ້ຕາມແຜນທີ່ວາງໄວ້ ລວມທັງການຜະລິດຂອງບັນດາເຂື່ອນຜູ້ຜະລິດໄຟຟ້າເອກະລາດທີ່ບໍລິສັດເຂົ້າຖືຫຸ້ນ ບໍ່ສາມາດຜະລິດພະລັງງານໄຟຟ້າໄດ້ຕາມແຜນການ.
ດັ່ງນັ້ນ, ຈຶ່ງໄດ້ສົ່ງຜົນກະທົບໃຫ້ບໍລິສັດຂາດທຶນເປັນຈໍານວນເງິນ 15,53 ຕື້ກີບ ແລະ ໃຫ້ນໍາເລື່ອງນີ້ລາຍງານຕໍ່ກອງປະຊຸມສາມັນຜູ້ຖືຫຸ້ນ ປະຈໍາປີ 2020 ເພື່ອພິຈາລະນາອະນຸມັດ.
ຮຽບຮຽງຂ່າວ: ພຸດສະດີ